ឯកឧត្តម ជុំ កុសល លើកឡើងថា៖ «ខ្មែរត្រូវតែខ្លាំង» ដើម្បីបន្តកសាងអនាគតជាតិ

(ភ្នំពេញ)៖ ឯកឧត្តម ជុំ កុសល រដ្ឋលេខាធិការក្រសួងព័ត៌មាន នៅថ្ងៃទី១០ ខែឧសភា ឆ្នាំ២០២៦នេះ បានលើកឡើងនូវទស្សនៈដ៏មានន័យថា «ខ្មែរត្រូវតែខ្លាំង» ដោយរំលឹកពីប្រវត្តិសាស្ត្រជាតិថា ប្រជាជាតិខ្មែរធ្លាប់មានភាពរុងរឿង និងអស្ចារ្យតាំងពីអតីតកាល ជាពិសេសក្នុងសម័យអាណាចក្រខ្មែរ ដែលបានបន្សល់ទុកនូវសមិទ្ធផលប្រវត្តិសាស្ត្រដ៏ល្បីល្បាញសម្រាប់ពិភពលោក។

ឯកឧត្តមបានបញ្ជាក់ថា ទោះបីជាប្រទេសកម្ពុជាធ្លាប់ធ្លាក់ចូលក្នុងសោកនាដកម្មដ៏ឈឺចាប់បំផុត ក្នុងអំឡុងឆ្នាំ១៩៧៥ ដល់ឆ្នាំ១៩៧៩ ក្រោមរបបប្រល័យពូជសាសន៍ប៉ុលពត ដែលធ្វើឲ្យជាតិធ្លាក់ដល់ចំណុចសូន្យក៏ដោយ ក៏ប្រជាជាតិខ្មែរនៅតែអាចងើបឡើងវិញបាន។

ចាប់តាំងពីការផ្តួលរំលំរបបនោះនៅឆ្នាំ១៩៧៩មក កម្ពុជាបានចាប់ផ្តើមស្ដារនិងកសាងប្រទេសឡើងវិញពីគ្រឹះសូន្យ ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន ដែលបាននាំមកនូវសន្តិភាព ស្ថិរភាពនយោបាយ និងការអភិវឌ្ឍលើគ្រប់វិស័យ រហូតធ្វើឲ្យប្រទេសមានការរីកចម្រើនដូចសព្វថ្ងៃ។

ឯកឧត្តម ជុំ កុសល បានគូសបញ្ជាក់ថា ក្នុងបច្ចុប្បន្ន និងអនាគត កម្ពុជា​ត្រូវបន្តភាពរឹងមាំបន្ថែមទៀត ដោយសារមានការបន្តដឹកនាំរបស់សម្តេចមហាបវរធិបតី ហ៊ុន ម៉ាណែត ដែលកំពុងជំរុញការអភិវឌ្ឍជាតិដោយស្វាហាប់ ទំនុកចិត្ត និងចក្ខុវិស័យវែងឆ្ងាយ។

សារនៃពាក្យ «ខ្មែរត្រូវតែខ្លាំង» គឺជាការលើកទឹកចិត្តឲ្យប្រជាជនខ្មែរទាំងមូល បន្តរួបរួមគ្នា រក្សាសន្តិភាព និងពង្រឹងសមត្ថភាព ដើម្បីធានាថា កម្ពុជា​នឹងបន្តរីកចម្រើន និងរឹងមាំជានិច្ច៕