សំណង់សង្ស័យអត់ច្បាប់កំពុងរះឡើងកណ្ដាលភូមិកំពង់សំណាញ់១ បង្កការព្រួយបារម្ភពីសុវត្ថិភាព និងសណ្ដាប់ធ្នាប់សាធារណៈ ខណៈសំណង់១ទីតាំងក្បែរនោះ មានច្បាប់ត្រឹមត្រូវ!

(កណ្ដាល)៖ ប្រជាពលរដ្ឋរស់នៅភូមិកំពង់សំណាញ់១ សង្កាត់កំពង់សំណាញ់ ក្រុងតាខ្មៅ ខេត្តកណ្ដាល កំពុងបង្ហាញការព្រួយបារម្ភយ៉ាងខ្លាំង បន្ទាប់ពីមានសំណង់សង្ស័យអត់ច្បាប់មួយទីតាំង កំពុងសាងសង់ឡើងយ៉ាងសកម្ម នៅតាមបណ្ដោយផ្លូវបេតុងក្នុងតំបន់នេះ ដោយគ្មានភាពច្បាស់លាស់អំពីលិខិតអនុញ្ញាតតាមច្បាប់។​​ខណៈសំណង់មួយទីតាំងទៀតទំហំសឹងប៉ុនគ្នានៅតាមបណ្ដោយផ្លូវបេតុងជាមួយគ្នា ក្បែរគ្នា គេមានច្បាប់អនុញ្ញាតសាងសង់ និងច្បាប់អនុញ្ញាតបើកការដ្ឋានសាងសង់ត្រឹមត្រូវ។

តាមការបញ្ជាក់ពីមេភូមិកំពង់សំណាញ់១ បានឲ្យដឹងថា សំណង់ទាំងពីរនេះ «មិនទាន់មានច្បាប់អនុញ្ញាតសំណង់នៅឡើយទេ» ដែលជាការរំលោភច្បាប់ស្ដីពីសំណង់យ៉ាងច្បាស់។ ការសាងសង់ដោយគ្មានការត្រួតពិនិត្យបច្ចេកទេស និងគ្មានអាជ្ញាបណ្ណត្រឹមត្រូវ អាចបង្កហានិភ័យដល់សុវត្ថិភាពសាធារណៈ ពិសេសចំពោះអ្នករស់នៅជុំវិញ និងអ្នកធ្វើដំណើរតាមផ្លូវ។

អ្នកស្រុកបានលើកឡើងថា ប្រសិនបើស្ថានការណ៍នេះមិនត្រូវបានទប់ស្កាត់ឲ្យទាន់ពេលវេលា នឹងអាចនាំឲ្យមានបញ្ហាខ្វះសណ្ដាប់ធ្នាប់សាធារណៈ កើតមានការប្រកួតប្រជែងសាងសង់ដោយគ្មានគោរពច្បាប់ និងប៉ះពាល់ដល់ការគ្រប់គ្រងអភិវឌ្ឍន៍ទីក្រុងនៅអនាគត។

ជាមួយគ្នានេះ ប្រជាពលរដ្ឋសូមអំពាវនាវយ៉ាងគោរពដល់ឯកឧត្តម គួច ចំរើន អភិបាលខេត្តកណ្ដាល និងលោក ឃឹម សំភារ អភិបាលក្រុងតាខ្មៅ មេត្តាចាត់ចែងឲ្យមន្ត្រីជំនាញពាក់ព័ន្ធ ចុះត្រួតពិនិត្យជាក់ស្តែងលើទីតាំងសំណង់ទាំងនេះ ពិនិត្យសុពលភាពឯកសារ និងចាត់វិធានការតាមផ្លូវច្បាប់ ដើម្បីទប់ស្កាត់ការរំលោភបំពាន និងធានាសុវត្ថិភាពសាធារណៈ។

ការអនុវត្តច្បាប់ឲ្យបានតឹងរ៉ឹង និងស្មើភាព គឺជាគន្លឹះសំខាន់ក្នុងការពង្រឹងសណ្ដាប់ធ្នាប់ សុវត្ថិភាព និងជំនឿទុកចិត្តរបស់ប្រជាពលរដ្ឋលើអាជ្ញាធរ។
​
បណ្ដាញសារព័ត៌មាន The Mirror News នឹងបន្តរង់ចាំការបំភ្លឺ និងព័ត៌មានបន្ថែមពីគ្រប់ភាគីពាក់ព័ន្ធ ដើម្បីធានាឱ្យការផ្សាយព័ត៌មានមានភាពត្រឹមត្រូវ សុក្រឹតភាព និងអនុលោមតាមវិជ្ជាជីវៈសារព័ត៌មាន។ នៅពេលទទួលបានព័ត៌មានផ្លូវការបន្ថែម នឹងធ្វើការអាប់ដេតជូនសាធារណជនជាបន្តបន្ទាប់៕