ក្រសួងសាធារណការបន្តរឹតបន្តឹងការត្រួតពិនិត្យយានយន្តដឹកលើសទម្ងន់ ដើម្បីការពារហេដ្ឋារចនាសម្ព័ន្ធផ្លូវថ្នល់

(ភ្នំពេញ)៖ លោក សេង ឈួន រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានគណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ បានដឹកនាំកិច្ចប្រជុំបូកសរុបលទ្ធផលការងារប្រចាំខែមេសា ឆ្នាំ២០២៦ នៅទីស្ដីការក្រសួង ដោយមានការចូលរួមពីឯកឧត្តមអនុរដ្ឋលេខាធិការទទួលបន្ទុក ប្រធាន អនុប្រធាន សមាជិកលេខាធិការដ្ឋាន ប្រធាន អនុប្រធានសមាជិកជញ្ជីងទូទាំងប្រទេស ក្រុមការងារចល័ត និងមន្ត្រីពាក់ព័ន្ធជាច្រើនរូប។

កិច្ចប្រជុំនេះ ត្រូវបានរៀបចំឡើងក្នុងគោលបំណងពិនិត្យ និងបូកសរុបលទ្ធផលការងារប្រចាំខែមេសា របស់គណៈកម្មាធិការសម្របសម្រួលអចិន្ត្រៃយ៍ ព្រមទាំងពង្រឹងការអនុវត្តតួនាទី ភារកិច្ច និងការទទួលខុសត្រូវរបស់មន្ត្រីជំនាញ ឱ្យកាន់តែមានប្រសិទ្ធភាព និងត្រឹមត្រូវបន្ថែមទៀត។ ទន្ទឹមនឹងនេះ កិច្ចប្រជុំក៏បានលើកយកបញ្ហាប្រឈមនានា មកពិភាក្សា និងស្វែងរកដំណោះស្រាយរួម ដើម្បីធានាថាការត្រួតពិនិត្យយានយន្តនៅតាមស្ថានីយជញ្ជីងនីមួយៗ អាចប្រព្រឹត្តទៅដោយរលូន និងអនុលោមតាមច្បាប់ និងបទប្បញ្ញត្តិជាធរមាន។

យោងតាមរបាយការណ៍លទ្ធផលប្រចាំខែមេសា ឆ្នាំ២០២៦ ការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ សម្រេចបានចំនួនសរុប ៣៤៦,៦១៩គ្រឿង ក្នុងនោះយានយន្តលើសទម្ងន់កម្រិតអនុគ្រោះមានចំនួន ១១១,៨៣៩គ្រឿង និងយានយន្តដែលត្រូវផាកពិន័យមានចំនួន ២៤៣គ្រឿង។

ក្នុងឱកាសនោះ ក្រសួងសាធារណការ និងដឹកជញ្ជូន បានអំពាវនាវយ៉ាងទទូចដល់គ្រប់ភាគីពាក់ព័ន្ធ ឱ្យបញ្ឈប់ការអន្តរាគមន៍ក្នុងករណីឃាត់យានយន្តដឹកលើសទម្ងន់កម្រិតកំណត់ ដើម្បីធានាឱ្យការអនុវត្តច្បាប់ប្រព្រឹត្តទៅដោយតម្លាភាព ប្រសិទ្ធភាព និងស្មើភាព។ ជាមួយគ្នានេះ ក្រសួងបានបញ្ជាក់ជំហរយ៉ាងច្បាស់ថា នឹងបន្តរឹតបន្តឹងការអនុវត្តច្បាប់ និងវិធានការពាក់ព័ន្ធយ៉ាងតឹងរ៉ឹងបំផុត ដោយគ្មានការលើកលែងឡើយ។

វិធានការនេះ ត្រូវបានចាត់ទុកថាជាផ្នែកសំខាន់ក្នុងការការពារហេដ្ឋារចនាសម្ព័ន្ធផ្លូវថ្នល់ កាត់បន្ថយការខូចខាតផ្លូវដោយសារការដឹកលើសទម្ងន់ និងរួមចំណែកលើកកម្ពស់សុវត្ថិភាពក្នុងការធ្វើដំណើររបស់ប្រជាពលរដ្ឋ ក៏ដូចជាការរក្សាគុណភាពផ្លូវឱ្យមានភាពរឹងមាំ និងប្រើប្រាស់បានយូរអង្វែង៕