មេបញ្ជាការកងរាជអាវុធហត្ថខេត្តកំពង់ស្ពឺ បង្ហាញស្នាដៃមុឺងម៉ាត់! បង្ក្រាបគ្រឿងញៀនជិត១គីឡូក្រាម ឃាត់ខ្លួនជនសង្ស័យម្នាក់ ខណៈ Hotline 1292 កំពុងផ្ដល់ទំនុកចិត្តដល់ពលរដ្ឋ
(កំពង់ស្ពឺ)៖ កងរាជអាវុធហត្ថខេត្តកំពង់ស្ពឺ ក្រោមការដឹកនាំប្រកបដោយភាពម៉ត់ចត់ ម៉ឺងម៉ាត់ និងទទួលខុសត្រូវខ្ពស់ពីសំណាក់ លោកឧត្តមសេនីយ៍ត្រី ម៉េង ស្រ៊ុន មេបញ្ជាការ កងរាជអាវុធហត្ថខេត្តកំពង់ស្ពឺ បាននិងកំពុងបង្ហាញសកម្មភាពយ៉ាងសកម្ម ក្នុងការបម្រើប្រជាពលរដ្ឋ ថែរក្សាសន្តិសុខសណ្តាប់ធ្នាប់ និងខិតខំបង្ក្រាបបទល្មើសគ្រប់ប្រភេទនៅក្នុងមូលដ្ឋាន ដោយមិនខ្លាចនឿយហត់។
ជាក់ស្តែង កម្លាំងកងរាជអាវុធហត្ថខេត្តកំពង់ស្ពឺ ទើបតែសម្រេចបានលទ្ធផលដ៏គួរឲ្យកត់សម្គាល់មួយ ក្នុងការបង្ក្រាបករណីគ្រឿងញៀន ដោយដកហូតបានសារធាតុញៀនជិត១គីឡូក្រាម និងឃាត់ខ្លួនជនសង្ស័យបានចំនួន០១នាក់ ខណៈកម្លាំងជំនាញកំពុងកសាងសំណុំរឿងបញ្ជូនទៅកាន់សាលាដំបូងខេត្តកំពង់ស្ពឺ ដើម្បីចាត់ការតាមនីតិវិធីច្បាប់។
ប្រតិបត្តិការនេះ ធ្វើឡើងដោយអនុវត្តតាមគោលការណ៍ដឹកនាំយ៉ាងមុឺងម៉ាត់របស់ ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ និងជាមេបញ្ជាការ កងរាជអាវុធហត្ថលើផ្ទៃប្រទេស ព្រមទាំងមានការណែនាំជាប្រចាំពី ឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ ជាពិសេសក្រោមការបញ្ជាផ្ទាល់យ៉ាងយកចិត្តទុកដាក់ពីសំណាក់ លោក ឧត្តមសេនីយ៍ត្រី ម៉េង ស្រ៊ុន និងមានការសម្របសម្រួលនីតិវិធីពី ឯកឧត្តម ព្រះរាជអាជ្ញា អមសាលាដំបូងខេត្តកំពង់ស្ពឺ។
បើយោងតាមរបាយការណ៍សមត្ថកិច្ច នៅវេលាម៉ោង១២ និង០៧នាទីរសៀល ថ្ងៃទី០៥ ខែឧសភា ឆ្នាំ២០២៦ កម្លាំងមូលដ្ឋានកងរាជអាវុធហត្ថក្រុងច្បារមន បានចុះបង្រ្កាបករណីគ្រឿងញៀនចំនួន១ករណី ស្ថិតនៅភូមិអូរវែង ឃុំកាហែង ស្រុកសំរោងទង ខេត្តកំពង់ស្ពឺ និងបានឃាត់ខ្លួនជនសង្ស័យម្នាក់ ឈ្មោះ គង់ បញ្ញា ភេទប្រុស អាយុ២៤ឆ្នាំ មុខរបរមិនពិតប្រាកដ មានទីលំនៅបច្ចុប្បន្ននៅភូមិរកាធំ សង្កាត់រកាធំ ក្រុងច្បារមន ខេត្តកំពង់ស្ពឺ។
ក្នុងប្រតិបត្តិការនោះ សមត្ថកិច្ចដកហូតបានវត្ថុតាងរួមមាន ម្សៅក្រាមថ្លាសង្ស័យជាសារធាតុញៀនចំនួន១៤កញ្ចប់ធំ ម៉ូតូចំនួន០១គ្រឿង ទូរសព្ទដៃ០១គ្រឿង ជញ្ជីងថ្លឹង០១គ្រឿង ថង់សម្រាប់វេចខ្ចប់គ្រឿងញៀន និងឧបករណ៍ប្រើប្រាស់គ្រឿងញៀនមួយចំនួនទៀត។
បច្ចុប្បន្ន ជនសង្ស័យ និងវត្ថុតាង ត្រូវបានកម្លាំងជំនាញការិយាល័យប្រឆាំងគ្រឿងញៀន នៃមន្ទីរស្រាវជ្រាវ និងបង្រ្កាបបទល្មើស កងរាជអាវុធហត្ថខេត្តកំពង់ស្ពឺ កំពុងកសាងសំណុំរឿងបញ្ជូនទៅសាលាដំបូងខេត្តកំពង់ស្ពឺ ដើម្បីអនុវត្តតាមនីតិវិធីច្បាប់។
មិនតែប៉ុណ្ណោះ មហាជនក្នុងមូលដ្ឋានក៏បានកោតសរសើរចំពោះសកម្មភាពការងាររបស់ថ្នាក់ដឹកនាំកងរាជអាវុធហត្ថខេត្តកំពង់ស្ពឺ ដែលតែងប្រឹងប្រែង ព្យាយាម និងយកចិត្តទុកដាក់ខ្ពស់ក្នុងការបម្រើប្រជាពលរដ្ឋ ដោយបានបង្កើតប្រព័ន្ធ Hotline 1292 ដើម្បីផ្ដល់ភាពងាយស្រួលដល់ប្រជាពលរដ្ឋក្នុងការរាយការណ៍ព័ត៌មាន និងស្នើសុំអន្តរាគមន៍បានទាន់ពេលវេលា។ សកម្មភាពទាំងនេះ ត្រូវបានចាត់ទុកថា ជាការទទួលខុសត្រូវ ជាឆន្ទៈ និងជាការប្ដេជ្ញាចិត្តរបស់ «អ្នកបម្រើដ៏ស្មោះត្រង់របស់ប្រជាពលរដ្ឋ»៕
