ថ្នាក់ដឹកនាំអាវុធហត្ថខេត្តកំពង់ស្ពឺ បង្ហាញទឹកចិត្តមនុស្សធម៌ ចុះសួរសុខទុក្ខ និងលើកទឹកចិត្តគ្រួសារមន្ត្រីក្រោយសម្រាលកូន

(កំពង់ស្ពឺ)៖ នាព្រឹកថ្ងៃទី០៤ ខែឧសភា ឆ្នាំ២០២៦ លោកឧត្តមសេនីយ៍ត្រី ម៉េង ស៊្រុន មេបញ្ជាការកងរាជអាវុធហត្ថខេត្តកំពង់ស្ពឺ បានដឹកនាំក្រុមការងារកងរាជអាវុធហត្ថខេត្តកំពង់ស្ពឺ សហការជាមួយក្រុមការងារសហភាពសហព័ន្ធយុវជនកម្ពុជា (សសយក) នៃបញ្ជាការដ្ឋានកងរាជអាវុធហត្ថខេត្តកំពង់ស្ពឺ ព្រមទាំងក្រុមការងារស្ម័គ្រចិត្តកាកបាទក្រហមកម្ពុជា អញ្ជើញចុះសួរសុខទុក្ខលោកស្រី ជា សុខលី ភរិយារបស់លោកអនុសេនីយ៍ឯក បេន រដ្ឋា នាយការិយាល័យផែនការ មន្ទីរកសាងកម្លាំង នៃបញ្ជាការដ្ឋានកងរាជអាវុធហត្ថខេត្តកំពង់ស្ពឺ ដែលកំពុងសម្រាកព្យាបាលក្រោយការសម្រាលកូន នៅមន្ទីរពេទ្យ អ៊ឹម រស្មី ស្ថិតក្នុងភូមិស្នោទី១ សង្កាត់សុព័រទេព ក្រុងច្បារមន ខេត្តកំពង់ស្ពឺ។

ការចុះសួរសុខទុក្ខនេះ គឺជាការបង្ហាញពីទឹកចិត្តសាមគ្គីភាព ការយកចិត្តទុកដាក់ និងការគាំទ្រយ៉ាងកក់ក្តៅពីថ្នាក់ដឹកនាំ និងមិត្តរួមការងារ ចំពោះកងកម្លាំង និងក្រុមគ្រួសារ ដែលតែងតែរួមចំណែកបំពេញភារកិច្ចបម្រើជាតិ និងប្រជាពលរដ្ឋដោយស្មោះត្រង់។

ក្នុងឱកាសនោះ លោកឧត្តមសេនីយ៍ត្រី ម៉េង ស៊្រុន និងក្រុមការងារ បានសម្តែងនូវការសាកសួរសុខទុក្ខ ព្រមទាំងផ្ញើសារលើកទឹកចិត្ត និងជូនពរដល់លោកស្រី ជា សុខលី ឲ្យឆាប់មានសុខភាពរឹងមាំវិញ និងសូមឲ្យទារកតូចមានសុខភាពល្អបរិបូរណ៍ លូតលាស់រឹងមាំ ប្រកបដោយសុភមង្គល និងអនាគតដ៏ភ្លឺស្វាង។

សកម្មភាពនេះ បានឆ្លុះបញ្ចាំងពីវប្បធម៌នៃការចែករំលែកក្តីស្រឡាញ់ ការយកចិត្តទុកដាក់ និងការលើកទឹកចិត្តគ្នាទៅវិញទៅមក ដែលជាកម្លាំងចិត្តដ៏សំខាន់ក្នុងការពង្រឹងសាមគ្គីភាព និងភាពកក់ក្តៅក្នុងមហាគ្រួសារកងរាជអាវុធហត្ថ៕