ស្នងការដ្ឋាននគរបាលខេត្តកណ្ដាល កោះហៅឱ្យផេក «សារព័ត៌មាន រស្មីឯករាជ្យ» បង្ហាញភស្តុតាង និងបំភ្លឺជុំវិញព័ត៌មានចុះផ្សាយ

(កណ្តាល)៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល បានចេញសេចក្តីបំភ្លឺជាផ្លូវការ ដោយបដិសេធទាំងស្រុងចំពោះខ្លឹមសារដែលផេកហ្វេសប៊ុកមួយឈ្មោះ «សារព័ត៌មាន រស្មីឯករាជ្យ» បានចុះផ្សាយ ពាក់ព័ន្ធការចោទប្រកាន់ទៅលើនាយប៉ុស្តិ៍នគរបាលអន្តោប្រវេសន៍ច្រកទ្វារព្រំដែនអន្តរជាតិជ្រៃធំ ថាពាក់ព័ន្ធនឹងការអនុញ្ញាតឱ្យនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់ពីប្រទេសវៀតណាមចូលមកកម្ពុជា។

តាមការបញ្ជាក់ពីស្នងការដ្ឋាននគរបាលខេត្តកណ្តាល ខ្លឹមសារដែលត្រូវបានផ្សព្វផ្សាយនោះ គឺជាព័ត៌មានមិនពិត គ្មានមូលដ្ឋានច្បាស់លាស់ និងអាចបង្កឱ្យមានការភាន់ច្រឡំដល់សាធារណជន ព្រមទាំងប៉ះពាល់ដល់កិត្តិយស និងសេចក្តីថ្លៃថ្នូររបស់មន្ត្រីអនុវត្តច្បាប់ដែលកំពុងបំពេញភារកិច្ចនៅតាមបន្ទាត់ព្រំដែន។

ជាមួយគ្នានេះ ស្នងការដ្ឋានក៏បានអំពាវនាវឱ្យម្ចាស់ផេក «សារព័ត៌មាន រស្មីឯករាជ្យ» ចេញមុខបំភ្លឺ និងបង្ហាញភស្តុតាងពាក់ព័ន្ធនឹងការចុះផ្សាយរបស់ខ្លួនឱ្យបានច្បាស់លាស់ និងទទួលខុសត្រូវចំពោះព័ត៌មានដែលបានផ្សព្វផ្សាយ ដើម្បីជៀសវាងការបង្កផលប៉ះពាល់ដល់ស្ថាប័ន និងមន្ត្រីជំនាញពាក់ព័ន្ធ។

ការចេញមុខបដិសេធនេះ ធ្វើឡើងបន្ទាប់ពីផេកខាងលើបានផ្សាយខ្លឹមសារចោទប្រកាន់ថា មានការឃុបឃិតរវាងមន្ត្រីប្រចាំច្រកជ្រៃធំ និងឈ្មួញ ក្នុងការនាំចូលទំនិញខុសច្បាប់ និងទំនិញខូចគុណភាពពីប្រទេសវៀតណាម ដែលព័ត៌មាននោះកំពុងទទួលបានការចាប់អារម្មណ៍យ៉ាងខ្លាំងនៅលើបណ្តាញសង្គម។

មជ្ឈដ្ឋានមហាជនកំពុងរង់ចាំការបំភ្លឺបន្ថែមពីម្ចាស់ផេក «សារព័ត៌មាន រស្មីឯករាជ្យ» និងបង្ហាញភស្តុតាងជាក់ស្តែង ដើម្បីធានាថា ការផ្សព្វផ្សាយព័ត៌មានស្ថិតលើគោលការណ៍វិជ្ជាជីវៈ សច្ចធម៌ និងការទទួលខុសត្រូវខ្ពស់៕