សមត្ថកិច្ចកម្ពុជារៀបចំបណ្ដេញជនជាតិថៃជាង ៦០០នាក់ ចេញពីកម្ពុជា ក្រោយពាក់ព័ន្ធបទល្មើស Scam Online នៅប៉ោយប៉ែត

(បន្ទាយមានជ័យ)៖ កម្លាំងសមត្ថកិច្ចកម្ពុជា នៅរសៀលថ្ងៃទី៣០ ខែមេសា ឆ្នាំ២០២៦នេះ កំពុងរៀបចំនីតិវិធីបណ្ដេញជនជាតិថៃជាង ៦០០នាក់ ត្រឡប់ទៅប្រទេសដើមវិញ បន្ទាប់ពីឃាត់ខ្លួនពាក់ព័ន្ធនឹងបទល្មើសឆបោកតាមប្រព័ន្ធអនឡាញ (Scam Online) និងបទល្មើសពាក់ព័ន្ធមួយចំនួនទៀត នៅក្រុងប៉ោយប៉ែត ខេត្តបន្ទាយមានជ័យ។

យោងតាមសេចក្ដីរាយការណ៍ពីសមត្ថកិច្ច បានឲ្យដឹងថា ជនជាតិថៃទាំងនោះ ត្រូវបានចាប់ខ្លួនក្នុងប្រតិបត្តិការបង្ក្រាបនាពេលថ្មីៗនេះ ក្រោយរកឃើញជាប់ពាក់ព័ន្ធនឹងសកម្មភាពឆបោកតាមប្រព័ន្ធបច្ចេកវិទ្យា និងបទល្មើសផ្សេងៗទៀត។

គិតត្រឹមវេលាម៉ោងជិត ៤រសៀលថ្ងៃដដែល កម្លាំងនគរបាលអន្តោប្រវេសន៍ កំពុងបន្តអនុវត្តនីតិវិធីបណ្ដេញចេញជាបន្តបន្ទាប់ ដោយមួយចំនួនត្រូវបានរៀបចំឯកសាររួចរាល់ ខណៈមួយចំនួនទៀតកំពុងត្រូវដឹកជញ្ជូនទៅកាន់ច្រកទ្វារព្រំដែន ដើម្បីបញ្ជូនត្រឡប់ទៅប្រទេសថៃវិញ។

សូមបញ្ជាក់ថា ក្នុងរយៈពេលប៉ុន្មានថ្ងៃចុងក្រោយនេះ កម្លាំងជំនាញនៃអគ្គស្នងការដ្ឋាននគរបាលជាតិ បានសហការជាមួយគណៈបញ្ជាការឯកភាពខេត្តបន្ទាយមានជ័យ ដែលរួមមានកម្លាំងនគរបាល អាវុធហត្ថ និងយោធា ក្រោមការសម្របសម្រួលពីព្រះរាជអាជ្ញាអមសាលាដំបូងខេត្ត បើកប្រតិបត្តិការបង្ក្រាបទីតាំងប្រព្រឹត្តបទល្មើសឆបោកតាមប្រព័ន្ធអនឡាញនៅក្រុងប៉ោយប៉ែត។
ក្នុងប្រតិបត្តិការនោះ សមត្ថកិច្ចបានរកឃើញ និងឃាត់ខ្លួនជនបរទេសជាច្រើននាក់ ដែលភាគច្រើនជាជនជាតិចិន។ ដោយសារចំនួនមនុស្សមានច្រើន និងមានការសម្រុករត់ចេញពីអគារ កម្លាំងសមត្ថកិច្ចបានសម្រេចផ្ទុះអាវុធព្រមានជាច្រើនគ្រាប់ ដើម្បីទប់ស្កាត់ និងគ្រប់គ្រងស្ថានការណ៍ឲ្យស្ថិតក្រោមការគ្រប់គ្រងរបស់សមត្ថកិច្ច៕