ដឹងការពិតហើយ! ករណីឃាតកម្មនៅកៀនស្វាយ បុរសជាប្ដីខឹងមកយកប្រពន្ធត្រឡប់ទៅផ្ទះវិញ តែប្រពន្ធមិនព្រមទៅ ស្លាប់ទាំងពីរនាក់

(កណ្តាល)៖ សមត្ថកិច្ចបានបង្ហាញព័ត៌មានជុំវិញករណីហិង្សាក្នុងគ្រួសារមួយ ដែលបានឈានដល់អំពើឃាតកម្មដ៏គួរឲ្យភ្ញាក់ផ្អើល និងបញ្ចប់ដោយការបាត់បង់ជីវិតទាំងសងខាង។ ហេតុការណ៍នេះបានកើតឡើងនៅថ្ងៃទី២៧ ខែមេសា ឆ្នាំ២០២៦ វេលាម៉ោងប្រមាណ ១១:២០នាទី នៅចំណុចចំការជី ស្ថិតក្នុងភូមិរទាំង ឃុំភូមិធំ ស្រុកកៀនស្វាយ ខេត្តកណ្តាល។

តាមរបាយការណ៍ពីប៉ុស្តិ៍នគរបាលរដ្ឋបាលភូមិធំ បានឱ្យដឹងថា ជនបង្កជាបុរសអាយុ ៤៤ឆ្នាំ មុខរបរកសិករ បានទៅជួបប្រពន្ធក្នុងគោលបំណងនាំត្រឡប់ទៅផ្ទះវិញ ប៉ុន្តែដោយសារតែភាគីស្ត្រីមិនព្រមតាមទៅវិញ បានបង្កឱ្យកើតជាជម្លោះពាក្យសម្ដីយ៉ាងតានតឹង មុនឈានទៅប្រើហិង្សា បណ្ដាលឱ្យស្ត្រីរងគ្រោះបាត់បង់ជីវិតនៅកន្លែងកើតហេតុ។

ក្រោយកើតហេតុ ជនបង្កក៏បានធ្វើសកម្មភាពបង្កគ្រោះថ្នាក់ដល់ខ្លួនឯង បណ្ដាលឱ្យស្លាប់ផងដែរ។ សមត្ថកិច្ចបានរកឃើញវត្ថុតាងជាកូនកាំបិតចុងស្រួចចំនួន២ ដោយសង្ស័យថាជាមធ្យោបាយប្រើប្រាស់ក្នុងហេតុការណ៍នេះ។

បច្ចុប្បន្ន កម្លាំងជំនាញនៃស្នងការដ្ឋាននគរបាលខេត្តកណ្តាល និងអធិការដ្ឋាននគរបាលស្រុកកៀនស្វាយ កំពុងបន្តស្រាវជ្រាវ និងអនុវត្តនីតិវិធីច្បាប់ ដើម្បីបញ្ជាក់លម្អិតពីមូលហេតុ និងស្ថានភាពពាក់ព័ន្ធជុំវិញករណីនេះ។

បើតាមប្រភពពីលោកអធិការ ព្រំុ សំណាង បានឱ្យដឹងថា មូលហេតុគឺខឹងមកយកប្រពន្ធទៅផ្ទះវិញ តែប្រពន្ធមិនទៅ។

ករណីនេះ ជាការរំលឹកមួយពីសារៈសំខាន់នៃការដោះស្រាយបញ្ហាគ្រួសារ និងជម្លោះផ្ទាល់ខ្លួនដោយសន្តិវិធី ដើម្បីបង្ការកុំឱ្យកើតមានវិបត្តិដែលនាំទៅដល់ការបាត់បង់ជីវិត៕