ឯកឧត្ដម ឧបនាយករដ្ឋមន្ត្រី ស៊ុន ចាន់ថុល ដឹកនាំកិច្ចប្រជុំជាមួយសមាគមធុរកិច្ចជប៉ុន ពិភាក្សាលើបច្ចុប្បន្នភាពវិនិយោគនៅកម្ពុជា

(ភ្នំពេញ)៖ ឯកឧត្ដម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១នៃក្រុមប្រឹក្សាអភិវឌ្ឍន៍កម្ពុជា (CDC) រួមជាមួយលោក Akira Yoshimoto ប្រធានសមាគមធុរកិច្ចជប៉ុនប្រចាំនៅកម្ពុជា (JBAC) នាព្រឹកថ្ងៃទី២៧ ខែមេសា ឆ្នាំ២០២៦ បានដឹកនាំកិច្ចប្រជុំពិភាក្សា និងផ្លាស់ប្តូរយោបល់ ស្តីពីបច្ចុប្បន្នភាពប្រតិបត្តិការរបស់ក្រុមហ៊ុនជប៉ុនដែលកំពុងវិនិយោគនៅកម្ពុជា។

កិច្ចប្រជុំនេះមានការចូលរួមពីតំណាងក្រសួង-ស្ថាប័នពាក់ព័ន្ធ ព្រមទាំងតំណាងក្រុមហ៊ុនជប៉ុនជាច្រើន ដែលកំពុងមានប្រតិបត្តិការវិនិយោគនៅក្នុងប្រទេសកម្ពុជា ដោយផ្តោតសំខាន់លើការស្តាប់មតិយោបល់ និងសំណើថ្មីៗពីវិស័យឯកជន ដើម្បីពិនិត្យ និងជំរុញការគាំទ្របន្ថែម សំដៅបង្កើនប្រសិទ្ធភាពប្រតិបត្តិការ និងបរិយាកាសវិនិយោគឱ្យកាន់តែប្រសើរឡើង។

ក្នុងឱកាសនោះ ឯកឧត្ដម ស៊ុន ចាន់ថុល បានសម្តែងការស្វាគមន៍យ៉ាងកក់ក្តៅចំពោះវត្តមានថ្នាក់ដឹកនាំសមាគម តំណាងក្រសួង-ស្ថាប័ន និងវិស័យឯកជនជប៉ុនដែលបានចូលរួមយ៉ាងសកម្ម ព្រមទាំងថ្លែងអំណរគុណដល់វិនិយោគិនជប៉ុនដែលបានជឿជាក់ និងបន្តពង្រីកទុនវិនិយោគនៅកម្ពុជា។

ជាមួយគ្នានេះ លោក Akira Yoshimoto ក៏បានថ្លែងអំណរគុណដល់រាជរដ្ឋាភិបាលកម្ពុជា ដែលតែងតែបើកទូលាយទទួលស្តាប់ការលើកឡើងរបស់វិស័យឯកជន និងផ្តល់ការគាំទ្រយ៉ាងជាប់លាប់។ លោកបានបញ្ជាក់ថា ការយកចិត្តទុកដាក់ពីប្រមុខរាជរដ្ឋាភិបាល និងក្រសួង-ស្ថាប័នពាក់ព័ន្ធ បានធ្វើឱ្យសមាជិកសមាគមជប៉ុនមានទំនុកចិត្ត និងសុទិដ្ឋិនិយមកាន់តែខ្ពស់ចំពោះការបន្តបណ្តាក់ទុនវិនិយោគនៅកម្ពុជា៕