បែកធ្លាយរឿងក្ដៅនៅអង្គស្នួល! ផ្ទុះការតវ៉ាពីប្រជាពលរដ្ឋ ចោទមន្ត្រីពាក់ព័ន្ធសំណង់ ដើរទារលុយពីអ្នកសង់ផ្ទះតូចៗ

(កណ្ដាល)៖ ប្រជាពលរដ្ឋជាច្រើនគ្រួសារ នៅស្រុកអង្គស្នួល ខេត្តកណ្ដាល បានដាក់លិខិតស្នើសុំអន្តរាគមន៍ទៅឯកឧត្តម គួច ចំរើន អភិបាលខេត្តកណ្ដាល ដើម្បីសុំឱ្យជួយពិនិត្យ និងស៊ើបអង្កេតលើករណីដែលពួកគេចោទប្រកាន់ថា មានមន្ត្រីពាក់ព័ន្ធការងារសំណង់ម្នាក់ បានដើរទាមទារប្រាក់ពីប្រជាពលរដ្ឋដែលកំពុងសាងសង់ផ្ទះស្នាក់នៅលក្ខណៈតូចតាច។

យោងតាមខ្លឹមសារពាក្យបណ្ដឹង ប្រជាពលរដ្ឋអះអាងថា មន្ត្រីរូបនោះតែងចុះពិនិត្យសំណង់តាមមូលដ្ឋាន និងទាមទារឱ្យម្ចាស់សំណង់ទៅបំពេញបែបបទច្បាប់ ឬបង់ប្រាក់ចន្លោះពី ២០០ ទៅ ៣០០ ដុល្លារ ជាថ្នូរនឹងការអនុញ្ញាតឱ្យបន្តសាងសង់ដោយគ្មានការរារាំង។

ប្រជាពលរដ្ឋបានបញ្ជាក់ថា សំណង់ដែលពួកគេកំពុងសាងសង់ គ្រាន់តែជាផ្ទះស្នាក់នៅសម្រាប់គ្រួសារ មិនមែនជាឃ្លាំង រោងចក្រ ឬសំណង់អាជីវកម្មខ្នាតធំនោះទេ ប៉ុន្តែបែរជារងសម្ពាធ និងការទាមទារថវិកា ដែលធ្វើឱ្យបន្ទុកជីវភាពរបស់ពួកគេកាន់តែធ្ងន់ធ្ងរ។

ករណីនេះ សាធារណជនបានលើកឡើងថា ប្រសិនបើការចោទប្រកាន់នេះជាការពិត វាមិនត្រឹមតែប៉ះពាល់ដល់ជីវភាពប្រជាពលរដ្ឋប៉ុណ្ណោះទេ ប៉ុន្តែថែមទាំងអាចប៉ះពាល់ដល់ទំនុកចិត្តរបស់ប្រជាពលរដ្ឋចំពោះការអនុវត្តច្បាប់ និងការគ្រប់គ្រងរដ្ឋបាលថ្នាក់មូលដ្ឋានផងដែរ។

សាធារណជនក៏បានលើកឡើងថា ការអនុវត្តច្បាប់គួរតែប្រព្រឹត្តទៅដោយស្តង់ដារ ស្មើភាព និងតម្លាភាព មិនគួរអនុវត្តតឹងរ៉ឹងតែទៅលើប្រជាពលរដ្ឋដែលមានជីវភាពខ្វះខាត ខណៈសំណង់ធំៗ ឬគម្រោងអាជីវកម្មមួយចំនួន ត្រូវបានគេមើលឃើញថា ហាក់មិនទទួលការត្រួតពិនិត្យក្នុងកម្រិតដូចគ្នា។

ប្រជាពលរដ្ឋស្នើឱ្យអាជ្ញាធរខេត្ត និងស្ថាប័នពាក់ព័ន្ធ ចុះស៊ើបអង្កេតឱ្យបានច្បាស់លាស់ ដើម្បីស្វែងរកយុត្តិធម៌ជូនពលរដ្ឋ និងទប់ស្កាត់ការប្រើប្រាស់អំណាចខុសគោលការណ៍ ដែលអាចបង្កផលប៉ះពាល់ដល់ទំនុកចិត្តរបស់ប្រជាពលរដ្ឋនាពេលអនាគត។

បើតាមប្រភពពីមន្ត្រីមូលដ្ឋានស្រុកអង្គស្នួលបានខ្សឹបឱ្យដឹងថា រឿងសំណង់គឺលោកអភិបាលស្រុកបានឱ្យក្រុមជំនួយការផ្ទាល់ខ្លួនចុះធ្វើជាប្រចាំ និងមិនធ្វើតាមប្រព័ន្ធរដ្ឋបាលទេ។

ពាក់ព័ន្ធនឹងករណីនេះ ក្រុមការងារមន្ទីរអធិការកិច្ចខេត្តកណ្ដាល ក៏បានចុះទៅធ្វើអធិការកិច្ចលើទីតាំង និងស្វែងរកព័ត៌មានពាក់ព័ន្ធផងដែរ។ ទោះជាយ៉ាងណា រហូតមកដល់ពេលនេះ បណ្ដាញសារព័ត៌មាន The Mirror News នៅមិនទាន់ទទួលបានការបញ្ជាក់អំពីលទ្ធផលនៃការស៊ើបអង្កេតពីប្រធានមន្ទីរអធិការកិច្ចខេត្តនៅឡើយទេ ដោយសារពុំទាន់មានមធ្យោបាយទំនាក់ទំនងផ្ទាល់។

ដោយឡែក The Mirror News ក៏មិនទាន់អាចសុំការបំភ្លឺពីលោក នូ សុវណ្ណារិទ្ធិ អភិបាលស្រុកអង្គស្នួល បានដូចគ្នា បន្ទាប់ពីការទំនាក់ទំនងតាមប្រព័ន្ធតេលេក្រាម មិនទទួលបានការឆ្លើយតប។

អង្គភាព The Mirror News នឹងបន្តរង់ចាំការបំភ្លឺពីមន្ត្រី និងស្ថាប័នពាក់ព័ន្ធ ដើម្បីផ្សព្វផ្សាយជូនសាធារណជនឱ្យបានគ្រប់ជ្រុងជ្រោយ ត្រឹមត្រូវ និងមានតុល្យភាព៕