ទឹកភ្នែកស្ត្រីម៉េម៉ាយ! សន្សំប្រាក់ជិតមួយជីវិតសង់ផ្ទះ តែជួបអ្នកម៉ៅការខ្វះទំនួលខុសត្រូវ បាត់បង់ទុនស្ទើរទាំងអស់ អំពាវនាវដល់ឯកឧត្ដម ស សុខា ឱ្យជួយរកយុត្តិធម៌ជូនស្ត្រីរងគ្រោះ

(ព្រៃវែង)៖ ស្ត្រីម៉េម៉ាយម្នាក់នៅខេត្តព្រៃវែង កំពុងរងទុក្ខយ៉ាងខ្លាំង បន្ទាប់ពីប្រាក់សន្សំជិតមួយជីវិតសម្រាប់សង់ផ្ទះ ត្រូវរងការខាតបង់ធ្ងន់ធ្ងរ ដោយសារតែការជឿទុកចិត្តលើអ្នកម៉ៅការសំណង់ម្នាក់ ដែលខ្វះសុចរិតភាព និងមិនគោរពកិច្ចសន្យា។

ស្ត្រីរងគ្រោះឈ្មោះ ផង់ សារ៉េម អាយុ ៥៦ឆ្នាំ បានចុះកិច្ចសន្យាម៉ៅសាងសង់ផ្ទះថ្មទំហំ ៦ម៉ែត្រ គុណ ៩ម៉ែត្រ ក្នុងតម្លៃ ១៣,០០០ដុល្លារ ប្រភេទ «ម៉ៅដាច់ កាន់សោចូលនៅ» នៅភូមិបន្ទាបុស្ស ឃុំអន្សោង ស្រុកកំពង់ត្របែក ខេត្តព្រៃវែង។ ប៉ុន្តែក្រោយបង់ប្រាក់អស់ដល់ ១២,២០០ដុល្លារ សំណង់ទើបសម្រេចបានប្រមាណ ៤០ភាគរយ ប៉ុណ្ណោះ។

ប្រភពបានឲ្យដឹងថា ទោះនៅសល់ត្រឹម ៨០០ដុល្លារ តាមកិច្ចសន្យា ដើម្បីបញ្ចប់ការងារ ក៏អ្នកម៉ៅការនៅតែទាមទារប្រាក់បន្ថែម ហើយនៅពេលម្ចាស់ផ្ទះមិនអាចបន្តបង់បាន ក៏បានបោះបង់ការងារ បិទការទំនាក់ទំនង និងប្រើពាក្យសម្ដីគំរាមកំហែង​ ខណៈផ្ទះដែលក្រុមជាងម៉ៅការបានសាងសង់ខាងលើនោះ ដូចបាយឡុកបាយឡ គ្មានគុណភាព ធ្វើឱ្យតែបានៗ ចុងដៃចុងជើង។

ករណីនេះ បានធ្វើឲ្យមហាជនមានការភ្ញាក់ផ្អើល និងអាណិតអាសូរយ៉ាងខ្លាំង ព្រោះសម្រាប់ស្ត្រីម៉េម៉ាយដែលមានជីវភាពលំបាក ប្រាក់នេះគឺជាទុនសន្សំដ៏មានតម្លៃសម្រាប់កសាងជីវិត និងទីជម្រកសម្រាប់គ្រួសារ។

ជាមួយគ្នានេះ មហាជនសូមអំពាវនាវដល់ ឯកឧត្ដម ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានក្រុមការងារគណបក្សចុះមូលដ្ឋានខេត្តព្រៃវែង មេត្តាជួយពិនិត្យ និងអន្តរាគមន៍រកយុត្តិធម៌ជូនស្ត្រីរងគ្រោះ ព្រមទាំងស្នើឲ្យអាជ្ញាធរខេត្តព្រៃវែង និងសមត្ថកិច្ចពាក់ព័ន្ធ ចាត់វិធានការតាមផ្លូវច្បាប់ចំពោះអ្នកម៉ៅការដែលពាក់ព័ន្ធ ដើម្បីទប់ស្កាត់កុំឲ្យករណីបោកទំនុកចិត្តបែបនេះកើតមានឡើងបន្តទៀត៕