បង្ក្រាបគ្រឿងញៀននៅឧដុង្គម៉ែជ័យ! អាវុធហត្ថកំពង់ស្ពឺឃាត់ខ្លួនជនសង្ស័យ៣នាក់ បញ្ជូនទៅតុលាការ!

(កំពង់ស្ពឺ)៖ កម្លាំងកងរាជអាវុធហត្ថខេត្តកំពង់ស្ពឺ បានបន្តអនុវត្តវិធានការយ៉ាងតឹងរឹងក្នុងការបង្ក្រាបបទល្មើសគ្រឿងញៀន ដោយឃាត់ខ្លួនជនសង្ស័យប្រុសស្រីចំនួន ០៣នាក់ និងបញ្ជូនទៅកាន់សាលាដំបូងខេត្ត ដើម្បីចាត់ការតាមច្បាប់ បន្ទាប់ពីរកឃើញពាក់ព័ន្ធនឹងសកម្មភាពគ្រឿងញៀនក្នុងភូមិសាស្ត្រក្រុងឧដុង្គម៉ែជ័យ។

ប្រតិបត្តិការនេះ ត្រូវបានអនុវត្តក្រោមបទបញ្ជាដ៏ម៉ឺងម៉ាត់របស់ លោកឧត្តមសេនីយ៍ត្រី ម៉េង ស្រ៊ុន មេបញ្ជាការ កងរាជអាវុធហត្ថខេត្តកំពង់ស្ពឺ និងមានការសម្របសម្រួលនីតិវិធីពីឯកឧត្តម ព្រះរាជអាជ្ញា អមសាលាដំបូងខេត្តកំពង់ស្ពឺ។ នៅវេលាម៉ោង ១១:៣០នាទី ថ្ងៃទី១៩ ខែមេសា ឆ្នាំ២០២៦ កម្លាំងមន្ទីរស្រាវជ្រាវ និងបង្រ្កាបបទល្មើស សហការជាមួយកម្លាំងមូលដ្ឋានក្រុងឧដុង្គម៉ែជ័យ ដឹកនាំដោយលោកវរសេនីយ៍ត្រី សេង រ៉ាម៉ូវ បានចុះស្រាវជ្រាវ កំណត់មុខសញ្ញា និងឈានដល់ការឃាត់ខ្លួនជនសង្ស័យទាំង ០៣នាក់ នៅចំណុចភូមិប្រវឹកពង សង្កាត់ព្រះស្រែ ក្រុងឧដុង្គម៉ែជ័យ ខេត្តកំពង់ស្ពឺ។

ជនសង្ស័យរួមមាន៖ *ឈ្មោះ ចយ ធារី ភេទស្រី អាយុ ២៥ឆ្នាំ មុខរបរមិនពិតប្រាកដ។ *ឈ្មោះ ហ៊ាន សុធន់ ភេទប្រុស អាយុ ៣២ឆ្នាំ មុខរបរមិនពិតប្រាកដ។ *ឈ្មោះ កុសល វិសាល ភេទប្រុស អាយុ ៣៣ឆ្នាំ មុខរបរជាងសំណង់។ អ្នកទាំងបី មានទីលំនៅដូចគ្នា ស្ថិតនៅភូមិប្រវឹកពង សង្កាត់ព្រះស្រែ ក្រុងឧដុង្គម៉ែជ័យ ខេត្តកំពង់ស្ពឺ។

ក្នុងប្រតិបត្តិការ សមត្ថកិច្ចបានដកហូតវត្ថុតាងរួមមាន ម្សៅក្រាមសថ្លាសង្ស័យជាសារធាតុញៀនចំនួន ០៤កញ្ចប់ ទម្ងន់សរុប ១២.០៧ក្រាម ទូរសព្ទចំនួន ០៣គ្រឿង ដាវ ០១ដើម កាំបិតចុងស្រួច ០១ កន្ត្រៃ ០១ អត្តសញ្ញាណប័ណ្ណសញ្ជាតិខ្មែរ ០១សន្លឹក និងសម្ភារៈពាក់ព័ន្ធមួយចំនួនផ្សេងទៀត។

បច្ចុប្បន្ន ជនសង្ស័យទាំង ៣នាក់ រួមទាំងវត្ថុតាង ត្រូវបានការិយាល័យប្រឆាំងគ្រឿងញៀន នៃមន្ទីរស្រាវជ្រាវ និងបង្រ្កាបបទល្មើស កងរាជអាវុធហត្ថខេត្តកំពង់ស្ពឺ កសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមនីតិវិធីច្បាប់។

អាជ្ញាធរបានអំពាវនាវដល់ប្រជាពលរដ្ឋ សហការជាមួយសមត្ថកិច្ច ដើម្បីទប់ស្កាត់ និងបង្ក្រាបបទល្មើសគ្រឿងញៀន ដែលជាហានិភ័យធ្ងន់ធ្ងរប៉ះពាល់ដល់សន្តិសុខសង្គម និងអនាគតយុវជន៕