ក្រុមក្មេងទំនើងបង្ហោះម៉ូតូ ត្រូវអាវុធហត្ថកំពង់ស្ពឺបង្ក្រាប ឃាត់ខ្លួន ៥នាក់!

(កំពង់ស្ពឺ)៖ ក្រុមក្មេងទំនើងប្រុសស្រីមួយក្រុម ដែលនិយមធ្វើសកម្មភាពបង្ហោះម៉ូតូតាមដងផ្លូវសាធារណៈ បង្កភាពអនាធិបតេយ្យ និងគ្រោះថ្នាក់ដល់សង្គម ត្រូវបានកម្លាំងកងរាជអាវុធហត្ថខេត្តកំពង់ស្ពឺ ចុះបង្ក្រាប និងឃាត់ខ្លួនបានចំនួន ០៥នាក់ យកមកអប់រំណែនាំ និងធ្វើកិច្ចសន្យាបញ្ឈប់សកម្មភាព ខណៈម៉ូតូត្រូវបានដកហូតរក្សាទុកជាបណ្តោះអាសន្ន។

ប្រតិបត្តិការនេះ អនុវត្តតាមគោលការណ៍ដឹកនាំរបស់ឯកឧត្តម នាយឧត្តមសេនីយ៍ សៅ សុខា និងមានការណែនាំពីឯកឧត្តម បណ្ឌិត ជាម ច័ន្ទសោភ័ណ អភិបាលខេត្ត ក្រោមការបញ្ជាផ្ទាល់យ៉ាងម៉ឺងម៉ាត់របស់លោកឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺ។

ហេតុការណ៍បានកើតឡើងនៅវេលាម៉ោងប្រមាណ ១០:៣០នាទី ព្រឹកថ្ងៃទី១៩ ខែមេសា ឆ្នាំ២០២៦ នៅចំណុចមុខ Saga PUB ដែលក្រុមនេះបានបង្ហោះម៉ូតូយ៉ាងហ៊ានព្រហើន បង្កការភ័យខ្លាចដល់ប្រជាពលរដ្ឋ និងប៉ះពាល់ដល់សុវត្ថិភាពសាធារណៈ។

ជនពាក់ព័ន្ធទាំង ០៥នាក់ ត្រូវបានសមត្ថកិច្ចកំណត់អត្តសញ្ញាណ ហើយវត្ថុតាងដែលដកហូតរួមមាន ម៉ូតូចំនួន ០២គ្រឿង (ម៉ាក Dream គ្មានស្លាកលេខ) និងទូរសព្ទដៃ ០១គ្រឿង។

បច្ចុប្បន្ន ក្រុមក្មេងទំនើងទាំងនេះ ត្រូវបានអប់រំណែនាំ និងធ្វើកិច្ចសន្យាចំពោះមុខមាតាបិតា និងអាណាព្យាបាល ដើម្បីបញ្ឈប់សកម្មភាពដែលបង្កគ្រោះថ្នាក់ដល់សង្គម និងបំផ្លាញកិត្តិយសគ្រួសារ។ ចំណែកម៉ូតូ ត្រូវបានរក្សាទុករយៈពេល ០៣ខែ នៅទីបញ្ជាការកងរាជអាវុធហត្ថខេត្តកំពង់ស្ពឺ៕IMG_8565 IMG_8592