អាជ្ញាធរខេត្តកណ្តាលចុះពិនិត្យទីតាំងស្នើសុំបើកផ្លូវថ្មីនៅក្រុងតាខ្មៅ ដើម្បីសម្រួលចរាចរណ៍ និងលើកកម្ពស់ជីវភាពប្រជាពលរដ្ឋ

(កណ្តាល)៖ នៅព្រឹកថ្ងៃទី២៤ ខែមេសា ឆ្នាំ២០២៦ ក្រុមការងារជំនាញដឹកនាំដោយ លោក ប៊ុន ផេង អភិបាលរងខេត្តកណ្តាល រួមជាមួយអាជ្ញាធរមូលដ្ឋានសង្កាត់ស្វាយរលំ និងភាគីពាក់ព័ន្ធ បានចុះពិនិត្យ និងអង្កេតទីតាំងដីមួយកន្លែង ស្ថិតនៅភូមិលេខ២ សង្កាត់ស្វាយរលំ ក្រុងតាខ្មៅ ខេត្តកណ្តាល បន្ទាប់ពីមានសំណើសុំបើកផ្លូវសាធារណៈ។

ក្នុងឱកាសនោះ ក្រុមការងារបានជួបពិភាក្សាដោយផ្ទាល់ជាមួយម្ចាស់ដី និងប្រជាពលរដ្ឋរស់នៅតាមសងខាងផ្លូវ ដើម្បីបង្កើនតម្លាភាព ការយោគយល់ និងការសហការគ្នា ក្នុងដំណើរការអនុវត្តគម្រោង។ ការបើកផ្លូវថ្មីនេះ ត្រូវបានរំពឹងថានឹងជួយសម្រួលដល់ការធ្វើដំណើររបស់ប្រជាពលរដ្ឋ និងរួមចំណែកលើកកម្ពស់ជីវភាពរស់នៅក្នុងតំបន់ឱ្យកាន់តែប្រសើរឡើង។

យោងតាមការចង្អុលបង្ហាញរបស់ម្ចាស់សំណើ ក្រុមការងារបានចុះពិនិត្យស្ថានភាពជាក់ស្តែង និងវាស់វែងទីតាំងដីលេខ 08110702-0337 ដែលជាកម្មសិទ្ធិរបស់ឈ្មោះ ស្រ៊ុន សុខអេង។ ម្ចាស់ដីបានយល់ព្រម និងឯកភាពដកបង្គោលព្រំដី ដើម្បីអនុញ្ញាតឱ្យអាជ្ញាធរអនុវត្តការបើកផ្លូវតាមផែនការដែលបានកំណត់។

ជាលទ្ធផល កិច្ចប្រជុំ និងការចុះពិនិត្យបានប្រព្រឹត្តទៅដោយរលូន ក្នុងបរិយាកាសសហការ និងយោគយល់គ្នា រវាងអាជ្ញាធរ ម្ចាស់ដី និងប្រជាពលរដ្ឋ ដែលបង្ហាញពីស្មារតីរួមចំណែកអភិវឌ្ឍន៍មូលដ្ឋាន និងដោះស្រាយបញ្ហាដោយសន្តិវិធី និងប្រសិទ្ធភាព៕