លោកមេបញ្ជាការ ម៉េង ស្រ៊ុន បញ្ជាដឹកនាំកម្លាំងជំនាញ រៀបចំពិធីបញ្ជុះបឋមសិលាអគារថ្មី បង្ហាញពីការពង្រឹងសមត្ថភាពស្ថាប័ន

(កំពង់ស្ពឺ)៖ ដោយទទួលបានការអនុញ្ញាត និងការចង្អុលបង្ហាញពី ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស នៅព្រឹកថ្ងៃទី២២ ខែមេសា ឆ្នាំ២០២៦ លោកឧត្តមសេនីយ៍ត្រី ម៉េង ស្រ៊ុន មេបញ្ជាការ កងរាជអាវុធហត្ថខេត្តកំពង់ស្ពឺ បានដឹកនាំកម្លាំងជំនាញរៀបចំកិច្ចប្រជុំ ដើម្បីត្រៀមការបញ្ជុះបឋមសិលា អគារសេនាធិការថ្មី នៃបញ្ជាការដ្ឋានកងរាជអាវុធហត្ថខេត្ត ដែលគ្រោងនឹងប្រព្រឹត្តទៅនាពេលឆាប់ៗខាងមុខនេះ។

កិច្ចប្រជុំខាងលើ ប្រព្រឹត្តទៅក្រោមវត្តមានលោកឧត្តមសេនីយ៍ត្រី នាង សាត រងខុទ្ទកាល័យ កងរាជអាវុធហត្ថលើផ្ទៃប្រទេស ព្រមទាំងមានការចូលរួមពីមេបញ្ជាការរង ប្រធានមន្ទីរ នាយការិយាល័យ និងមន្ត្រីពាក់ព័ន្ធជាច្រើនរូប ដែលបានពិភាក្សាលម្អិតលើផែនការរៀបចំកម្មវិធី និងការចែកចាយភារកិច្ចទៅតាមជំនាញនីមួយៗ។

តាមការបញ្ជាក់របស់លោកឧត្តមសេនីយ៍ត្រី ម៉េង ស្រ៊ុន កិច្ចប្រជុំនេះមានគោលបំណងសំខាន់ក្នុងការរៀបចំការងារជាមុន ដើម្បីធានាឲ្យពិធីបញ្ជុះបឋមសិលា អគារសេនាធិការថ្មី ប្រព្រឹត្តទៅដោយរលូន មានរបៀបរៀបរយ និងមានប្រសិទ្ធភាពខ្ពស់។ ក្នុងនោះ ក្រុមការងារដែលចូលរួមក៏បានលើកឡើងពីចំណុចបន្ថែមមួយចំនួន ដើម្បីពង្រឹងគុណភាពនៃការរៀបចំ និងកាត់បន្ថយកំហុសឆ្គងដែលអាចកើតមាន។

ជាមួយគ្នានេះ លោកមេបញ្ជាការបានធ្វើការបែងចែកភារកិច្ចយ៉ាងច្បាស់លាស់ទៅតាមផ្នែកជំនាញនីមួយៗ ដោយកំណត់ឲ្យមានការត្រួតពិនិត្យ និងទទួលខុសត្រូវច្បាស់លាស់ សំដៅធានាឲ្យការអនុវត្តមានប្រសិទ្ធភាព និងសម្រេចបានតាមផែនការកំណត់។

គួរបញ្ជាក់ថា អគារសេនាធិការថ្មី នៃបញ្ជាការដ្ឋានកងរាជអាវុធហត្ថខេត្តកំពង់ស្ពឺ មានទីតាំងស្ថិតនៅតាមបណ្តោយផ្លូវជាតិលេខ៤ ក្នុងភូមិអន្លង់គង់ ឃុំត្រពាំងគង ស្រុកសំរោងទង ខេត្តកំពង់ស្ពឺ។ គម្រោងសាងសង់នេះ ត្រូវបានចាប់ផ្តើមរៀបចំតាំងពីឆ្នាំ២០២៥ ដោយកាលពីថ្ងៃទី២៦ ខែកញ្ញា ឆ្នាំ២០២៥ លោកឧត្តមសេនីយ៍ត្រី ម៉េង ស្រ៊ុន បានដឹកនាំក្រុមការងារចុះត្រួតពិនិត្យវឌ្ឍនភាពការងារជាក់ស្តែង ដែលនៅពេលនោះបានសម្រេចការចាក់ដី និងសាងសង់របងជុំវិញជាបណ្តោះអាសន្នរួចរាល់។

ការស្ថាបនាអគារថ្មីនេះ ត្រូវបានមើលឃើញថាជាជំហានសំខាន់មួយ ក្នុងការពង្រឹងសមត្ថភាពការងារ និងលើកកម្ពស់ប្រសិទ្ធភាពប្រតិបត្តិការរបស់កងរាជអាវុធហត្ថខេត្តកំពង់ស្ពឺ ស្របតាមទិសដៅកំណែទម្រង់រដ្ឋបាល និងសន្តិសុខសាធារណៈ៕