ឈើខុសច្បាប់ត្រូវដកហូត ប៉ុន្តែបណ្តាញធំៗនៅក្រោយឆាកនៅតែស្ងៀមស្ងាត់

(ក្រចេះ)៖ នៅថ្ងៃទី២១ ខែមេសា ឆ្នាំ២០២៦ សង្កាត់រដ្ឋបាលព្រៃឈើរលួសមានជ័យ នៃខណ្ឌរដ្ឋបាលព្រៃឈើក្រចេះ បានចុះប្រតិបត្តិការបង្ក្រាបបទល្មើសព្រៃឈើក្នុងតំបន់សហគមន៍ព្រៃឈើស្រែជិះ ដោយប្រទះឃើញទីតាំងធ្វើសន្និធិឈើដោយគ្មានលិខិតអនុញ្ញាតចំនួន១កន្លែង ស្ថិតក្នុងភូមិស្រែជិះ ឃុំស្រែជិះ ស្រុកអូរគ្រៀងសែនជ័យ ខេត្តក្រចេះ។

ក្នុងប្រតិបត្តិការនេះ សមត្ថកិច្ចបានដកហូតវត្ថុតាងរួមមាន៖
ឈើមូលប្រភេទលេខ១ (សុក្រម) ចំនួន ៥កំណាត់ ស្មើនឹង ១,៤៣១ម៉ែត្រត្រីគុណ ឈើអារប្រភេទលេខ១ (ស្រឡៅ) ចំនួន ៦កំណាត់ ស្មើនឹង ១,៣២០ម៉ែត្រត្រីគុណ វត្ថុចាប់យកទាំងនេះ ត្រូវបានដឹកជញ្ជូនទៅរក្សាទុកជាបណ្ដោះអាសន្ននៅស្នាក់ការសង្កាត់រដ្ឋបាលព្រៃឈើរលួសមានជ័យ ដើម្បីបន្តនីតិវិធីតាមច្បាប់។

យ៉ាងណាក៏ដោយ ទោះបីជាប្រតិបត្តិការនេះត្រូវបានចាត់ទុកថាជាជំហានវិជ្ជមានក្នុងការការពារធនធានព្រៃឈើក្តី ក៏មានមតិសាធារណៈមួយចំនួនលើកឡើងថា ការបង្ក្រាបគួរត្រូវបានអនុវត្តឱ្យមានភាពជាប់លាប់ និងមានប្រសិទ្ធភាពបន្ថែម ដោយមិនគួរតែមានត្រឹមតែការចុះបង្ក្រាបតាមដងករណី ឬតំបន់ណាមួយប៉ុណ្ណោះទេ ខណៈបទល្មើសព្រៃឈើនៅតែមានសកម្មភាពជាបន្តបន្ទាប់ក្នុងតំបន់ខ្លះៗ។

បន្ថែមពីនេះ ការស្វែងរកមូលដ្ឋាន និងអ្នកនៅពីក្រោយសកម្មភាពសន្និធិឈើខុសច្បាប់ គួរត្រូវបានអនុវត្តឱ្យបានជាក់លាក់ និងតឹងរឹងជាងមុន ដើម្បីបញ្ឈប់បណ្តាញបទល្មើសឱ្យមានប្រសិទ្ធភាពពិតប្រាកដ មិនមែនត្រឹមតែការដកហូតវត្ថុតាងតែប៉ុណ្ណោះ។

បើតាមការលើកឡើងរបស់លោក តាន់ គឹមសួ បានបញ្ជាក់ថា ការរីកចម្រើននៃការអនុវត្តការងារនេះ មិនអាចខ្វះការជំរុញ និងលើកទឹកចិត្តពីថ្នាក់ដឹកនាំបានឡើយ ជាពិសេសការគាំទ្រពីលោកជំទាវ អឹម រចនា ដែលបានជួយជំរុញឱ្យមន្ត្រីអនុវត្តតួនាទី និងភារកិច្ចរបស់ខ្លួនឱ្យបានត្រឹមត្រូវ និងមានការទទួលខុសត្រូវខ្ពស់។

ការខិតខំប្រឹងប្រែងក្នុងការជំរុញឱ្យមានការអនុវត្តច្បាប់យ៉ាងត្រឹមត្រូវនេះ ត្រូវបានគេចាត់ទុកថាជាកត្តាសំខាន់មួយ ក្នុងការពង្រឹងការពារធនធានធម្មជាតិ ប៉ុន្តែជាមួយគ្នានេះ ក៏ត្រូវការការត្រួតពិនិត្យ ធ្វើតាមដាន និងវាយតម្លៃលទ្ធផលជាបន្តបន្ទាប់ ដើម្បីធានាថាការអនុវត្តមិនមានភាពរអាក់រអួល ឬរលូនតែផ្ទៃក្រៅប៉ុណ្ណោះ៕