មិនខ្លាចច្បាប់? ម្ចាស់សំណង់ «ឈុន គា» បន្តសាងសង់ ទោះមានលិខិតផ្អាក

(កណ្ដាល)៖ ករណីសំណង់អគារឃ្លាំងមួយ មានឈ្មោះ «ឈុន គា» ស្ថិតនៅជាប់ផ្លូវជាតិលេខ២ ភូមិក្រពើហារកើត សង្កាត់ព្រែកឬស្សី ក្រុងតាខ្មៅ ខេត្តកណ្ដាល កំពុងក្លាយជាបញ្ហាដែលទាក់ទាញការចាប់អារម្មណ៍ពីសាធារណជន ខណៈមានការរាយការណ៍ថា ការសាងសង់នេះ ត្រូវបានអនុវត្តដោយគ្មានលិខិតអនុញ្ញាតត្រឹមត្រូវពីសមត្ថកិច្ចជំនាញ និងមិនមានកិច្ចសន្យាជាប់ព្រុំតាមបច្ចេកទេសផងដែរ។

អ្វីដែលបង្កឲ្យមានការព្រួយបារម្ភបន្ថែមទៀត គឺម្ចាស់ការដ្ឋាននៅតែបន្តសកម្មភាពសាងសង់ ទោះបីមានលិខិតផ្អាកការដ្ឋានពីរដ្ឋបាលក្រុងតាខ្មៅ ចុះថ្ងៃទី៧ ខែមេសា ឆ្នាំ២០២៦ ដែលចេញដោយលោក ឃឹម សំភារ អភិបាលក្រុងតាខ្មៅក៏ដោយ។ ស្ថានភាពនេះ បានលើកឡើងសំណួរចម្បងមួយថា៖ តើអំណាចនៃលិខិតផ្អាក មានប្រសិទ្ធភាពប៉ុណ្ណា បើមិនត្រូវបានគោរពអនុវត្ត?

តាមច្បាប់ស្ដីពីសំណង់ ការសាងសង់គ្រប់ប្រភេទ ត្រូវតែមានការអនុញ្ញាតជាមុន និងគោរពតាមបទប្បញ្ញត្តិបច្ចេកទេស ដើម្បីធានាសុវត្ថិភាព សណ្តាប់ធ្នាប់ និងការអភិវឌ្ឍប្រកបដោយចីរភាព។ ការមិនគោរពច្បាប់ មិនត្រឹមតែបង្កហានិភ័យដល់អ្នករស់នៅជុំវិញប៉ុណ្ណោះទេ ប៉ុន្តែថែមទាំងប៉ះពាល់ដល់សណ្ដាប់ធ្នាប់សាធារណៈ និងសុវត្ថិភាពសំណង់ទូទៅផងដែរ។

មតិសាធារណៈមួយចំនួន ក៏បានលើកឡើងថា ប្រសិនបើមានការអនុវត្តច្បាប់មិនស្មើភាព ឬមានភាពអសកម្មពីសមត្ថកិច្ច វាអាចនាំឲ្យកើតមានគំរូអវិជ្ជមាន ដែលប៉ះពាល់ដល់ការគោរពច្បាប់ជាសាធារណៈ។

ក្នុងន័យនេះ អាជ្ញាធរមានសមត្ថកិច្ច គួរតែពិនិត្យ និងអនុវត្តវិធានការយ៉ាងតឹងរឹង ច្បាស់លាស់ និងស្មើភាព ដើម្បីធានាថា ច្បាប់មិនត្រឹមតែមានស្រាប់ប៉ុណ្ណោះទេ ប៉ុន្តែត្រូវបានអនុវត្តយ៉ាងមានប្រសិទ្ធភាព។ ព្រមទាំងត្រូវបង្ហាញភាពច្បាស់លាស់ចំពោះសាធារណជន អំពីជំហានច្បាប់ដែលត្រូវអនុវត្តចំពោះករណីបំពានបែបនេះ។

សំណួរដែលនៅតែចាំចម្លើយ គឺ៖ តើច្បាប់ស្ដីពីសំណង់ នឹងត្រូវអនុវត្តយ៉ាងដូចម្តេច ប្រសិនបើការបំពាននៅតែបន្តដោយគ្មានការចាត់វិធានការតឹងរឹង?

ពាក់ព័ន្ធករណីសំណង់អគារឃ្លាំងមួយ មានឈ្មោះ «ឈុន គា»​ កំពុងសាងសង់បំពានលិខិតផ្អាកការដ្ឋាន​ខាងលើ មហាជនបានស្នើដល់ឯកឧត្ដម គួច ចំរើន អភិបាលខេត្តកណ្ដាលមេត្តាចាត់មន្ត្រីជំនាញចុះស្រាវជ្រាវ ស៊ើបអង្កេត និងមានវិធានការតឹងរ់ឹងចំពោះក្រុមអ្នកមិនគោរពច្បាប់ស្ដីពីសំណង់ផង៕
IMG_3944