គម្រោងស្ពានដីឥដ្ឋ-ថ្មគរ សម្រេចបានជិតពាក់កណ្តាល ខណៈវឌ្ឍនភាពលឿនជាងផែនការ

(កណ្តាល)៖ គិតត្រឹមថ្ងៃទី២២ ខែមេសា ឆ្នាំ២០២៦ គម្រោងសាងសង់ស្ពានដីឥដ្ឋ-ថ្មគរ សម្រេចបានវឌ្ឍនភាពការងារប្រមាណ ៤៧,៦ភាគរយ ហើយលឿនជាងផែនការដើមចំនួន ២,៦០ភាគរយ បង្ហាញពីល្បឿនអនុវត្តគម្រោងដែលមានប្រសិទ្ធភាព និងការគ្រប់គ្រងល្អពីភាគីពាក់ព័ន្ធ។

ស្ពាននេះ ត្រូវបានបើកការដ្ឋានសាងសង់នៅថ្ងៃទី៧ ខែមិថុនា ឆ្នាំ២០២៣ ជាមួយគម្រោងផ្លូវល្បឿនលឿនភ្នំពេញ-បាវិត ក្រោមអធិបតីភាពដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី បច្ចុប្បន្នជាប្រធានព្រឹទ្ធសភា និងឯកឧត្តម វ៉ាង វិនធៀន អតីតឯកអគ្គរដ្ឋទូតចិនប្រចាំកម្ពុជា។

តាមព័ត៌មានពីក្រសួងសាធារណការ និងដឹកជញ្ជូន ស្ពានដីឥដ្ឋ-ថ្មគរ មានទីតាំងត្រើយខាងលិច ស្ថិតនៅឃុំដីឥដ្ឋ ស្រុកកៀនស្វាយ ខណៈត្រើយខាងកើត ស្ថិតនៅឃុំថ្មគរ ស្រុកល្វាឯម ខេត្តកណ្តាល។ គម្រោងនេះត្រូវបានចាត់ទុកថា ជាអគារសំណង់មួយមានសារៈសំខាន់ក្នុងការតភ្ជាប់បណ្តាញដឹកជញ្ជូន និងជំរុញសេដ្ឋកិច្ច នៅភាគខាងត្បូង និងភាគខាងកើតនៃរាជធានីភ្នំពេញ។

ជាពិសេស ស្ពាននេះនឹងភ្ជាប់ទៅមហាវិថី ស៊ី ជីនពីង (ផ្លូវក្រវាត់ក្រុងទី៣) ត្រង់ចំណុចផ្លូវជាតិលេខ១ និងត្រើយខាងកើត នឹងបន្តភ្ជាប់ទៅគម្រោងផ្លូវល្បឿនលឿនភ្នំពេញ-បាវិត ដែលជាគម្រោងយុទ្ធសាស្ត្រសំខាន់សម្រាប់ការដឹកជញ្ជូន និងពាណិជ្ជកម្មជាតិ និងអន្តរជាតិ។

ការរីកចម្រើនលឿនជាងផែនការនេះ ក៏បង្ហាញពីសញ្ញាវិជ្ជមានមួយ ក្នុងការលើកកម្ពស់សមត្ថភាពហេដ្ឋារចនាសម្ព័ន្ធ និងការតភ្ជាប់តំបន់ ដែលនឹងមានផលប្រយោជន៍យ៉ាងច្រើនដល់សេដ្ឋកិច្ច និងជីវភាពប្រជាពលរដ្ឋក្នុងតំបន់នាពេលអនាគត៕