រដ្ឋបាលខេត្តកណ្តាលជូនដំណឹងដល់ម្ចាស់រណ្តៅដីទាំងអស់ បង្កើនវិធានការសុវត្ថិភាព បន្ទាប់ពីកើតមានហានិភ័យជាញឹកញាប់

(កណ្តាល)៖ រដ្ឋបាលខេត្តកណ្តាលបានជូនដំណឹងដល់ម្ចាស់រណ្តៅដីគ្រប់ប្រភេទ នៅក្នុងភូមិសាស្ត្រខេត្ត ដោយអំពាវនាវឱ្យពង្រឹងវិធានការសុវត្ថិភាព បន្ទាប់ពីសង្កេតឃើញថា កាលពីពេលថ្មីៗនេះ មានករណីក្មេងលង់ទឹក និងការធ្លាក់សត្វ ព្រមទាំងយានយន្តចូលក្នុងរណ្តៅដីជ្រៅៗ បានកើតមានជាញឹកញាប់។

តាមសេចក្ដីជូនដំណឹង បានបញ្ជាក់ថា មូលហេតុចម្បងនៃហានិភ័យទាំងនេះ បណ្តាលមកពីការធ្វេសប្រហែសរបស់ម្ចាស់រណ្តៅ ដោយមិនបានរៀបចំធ្វើរបងព័ទ្ធ ឬដាក់ស្លាកសញ្ញាព្រមានឱ្យបានត្រឹមត្រូវ ជាពិសេសនៅតំបន់ដែលមានប្រជាពលរដ្ឋរស់នៅក្បែរ។

ដើម្បីធានាសុវត្ថិភាពសាធារណៈ និងកាត់បន្ថយគ្រោះថ្នាក់ដែលអាចកើតមាន រដ្ឋបាលខេត្តកណ្តាល បានណែនាំឱ្យម្ចាស់រណ្តៅដីអនុវត្តវិធានការសំខាន់ៗ រួមមាន៖

*ត្រូវរៀបចំធ្វើរបង ឬចងខ្សែហ៊ុមព័ទ្ធជុំវិញរណ្តៅដីឱ្យបានម៉ឺងម៉ាត់។

*ត្រូវដាក់ស្លាកសញ្ញាព្រមាន បញ្ជាក់អំពីគ្រោះថ្នាក់ និងហាមឃាត់មិនឱ្យចូលក្បែរ។

*ក្នុងករណីមានហេតុការណ៍គ្រោះថ្នាក់កើតឡើង ម្ចាស់រណ្តៅត្រូវទទួលខុសត្រូវតាមច្បាប់ជាធរមាន។

រដ្ឋបាលខេត្តក៏បានអំពាវនាវឱ្យម្ចាស់រណ្តៅទាំងអស់ ចូលរួមសហការអនុវត្តតាមការណែនាំខាងលើ ដោយមានការទទួលខុសត្រូវខ្ពស់ ដើម្បីការពារជីវិត និងទ្រព្យសម្បត្តិរបស់ប្រជាពលរដ្ឋនៅតំបន់ជុំវិញ៕