សង្ស័យម្ចាស់អាគារពាក់ព័ន្ធបណ្តាញឆបោកអនឡាញ ខណៈប្រពន្ធត្រូវបានឃាត់ខ្លួន បន្តស្វែងរកខ្លួនម្ចាស់

(កណ្ដាល)៖ ករណីពាក់ព័ន្ធបណ្តាញឆបោកតាមប្រព័ន្ធអនឡាញមួយ កំពុងទាក់ទាញការចាប់អារម្មណ៍ពីមហាជន បន្ទាប់ពីមានការចោទប្រកាន់ថា ម្ចាស់ទីតាំងអាគារមួយ បានដឹង និងឮអំពីសកម្មភាពខុសច្បាប់ ប៉ុន្តែបន្តអនុញ្ញាតឲ្យជួលប្រើប្រាស់ ដើម្បីប្រព្រឹត្តបទល្មើស។

តាមការបញ្ជាក់របស់លោក ផែង វណ្ណៈ នៅថ្ងៃទី២៣ ខែមេសា តាមរយៈបណ្ដាញសង្គម បានឲ្យដឹងថា ម្ចាស់អាគារឈ្មោះ លឹម សេងងួន បានដឹងអំពីសកម្មភាពឆបោកតាមអនឡាញ ប៉ុន្តែមិនបានទប់ស្កាត់ឡើយ។ លោកក៏បានអះអាងថា បច្ចុប្បន្ន ម្ចាស់អាគាររូបនេះបានរត់គេចខ្លួន ខណៈសមត្ថកិច្ចបានឃាត់ខ្លួនប្រពន្ធរបស់គាត់ បញ្ជូនទៅតុលាការ ដើម្បីអនុវត្តតាមនីតិវិធីច្បាប់។

បើតាមប្រភពដដែល ម្ចាស់អាគារឈ្មោះ លឹម សេងងួន ត្រូវបានសង្ស័យថា អាចមានការពាក់ព័ន្ធដោយផ្ទាល់ ឬដោយអនុលោមន៍ ក្នុងការអនុញ្ញាតឲ្យប្រើទីតាំងសម្រាប់ប្រតិបត្តិការឆបោកតាមប្រព័ន្ធអនឡាញ។ បច្ចុប្បន្ន សមត្ថកិច្ចកំពុងបន្តស្វែងរក ដើម្បីនាំខ្លួនមកសួរនាំ និងអនុវត្តតាមច្បាប់។

ជាមួយគ្នានេះ កម្លាំងសមត្ថកិច្ចនៃអគ្គស្នងការដ្ឋាននគរបាលជាតិ បានឃាត់ខ្លួនស្ត្រីម្នាក់ ដែលជាប្រពន្ធរបស់ម្ចាស់អាគារ ហើយបានបញ្ជូនទៅតុលាការ ដើម្បីបន្តនីតិវិធីតាមផ្លូវច្បាប់។

មតិសាធារណៈថា ករណីនេះបានបង្ហាញពីភាពចាំបាច់ក្នុងការពង្រឹងការត្រួតពិនិត្យលើការជួលអចលនទ្រព្យ ជាពិសេសទីតាំងដែលអាចត្រូវបានប្រើប្រាស់សម្រាប់សកម្មភាពខុសច្បាប់។

មហាជនបានលើកឡើងថា ម្ចាស់ទីតាំងគួរតែមានការត្រួតពិនិត្យអត្តសញ្ញាណ និងគោលបំណងប្រើប្រាស់របស់អ្នកជួលឲ្យបានតឹងរឹង ដើម្បីជៀសវាងការចូលរួមដោយអចេតនា ឬដោយចេតនា ក្នុងបទល្មើស។ ក្នុងបរិបទ បទល្មើសឆបោកអនឡាញកំពុងកើនឡើង ការអនុវត្តច្បាប់យ៉ាងតឹងរឹងលើអ្នកពាក់ព័ន្ធ និងការចូលរួមសហការពីគ្រប់ភាគី នឹងជួយទប់ស្កាត់ និងបង្កើនសន្តិសុខសង្គមឲ្យកាន់តែមានប្រសិទ្ធភាព ៕