ភូមិគ្រឹះអត់ច្បាប់សាងសង់ដល់៨០% ទើបអាជ្ញាធរចុះផ្អាក៖ ចន្លោះប្រហោងនៃការគ្រប់គ្រង ឬការអនុវត្តច្បាប់មិនទាន់តឹងរឹង?

(កណ្តាល)៖ នៅថ្ងៃទី២២ ខែមេសា ឆ្នាំ២០២៦ អាជ្ញាធរស្រុកកណ្ដាលស្ទឹង ខេត្តកណ្ដាល បានចុះអនុវត្តវិធានការផ្អាកសកម្មភាពសាងសង់លើភូមិគ្រឹះមួយដែលត្រូវបានអះអាងថា សាងសង់ដោយគ្មានលិខិតអនុញ្ញាត ស្ថិតនៅភូមិពនចាន ឃុំព្រែកស្លែង។ ភូមិគ្រឹះនេះមានម្ចាស់ឈ្មោះ ហេង ហុង ហើយតាមការបញ្ជាក់ពីមន្ត្រីជំនាញ សំណង់បានអនុវត្តរួចរាល់ប្រមាណ ៨០% មុនពេលមានការចុះផ្អាក។

ម្ចាស់សំណង់បានអះអាងថា ខ្លួនបានដាក់ពាក្យស្នើសុំលិខិតអនុញ្ញាតសាងសង់ទៅថ្នាក់ខេត្តរួចហើយ ប៉ុន្តែមិនទាន់ទទួលបានលទ្ធផលត្រឡប់វិញ។ តើម្ចាស់ភូមិគ្រឹះទើបស្នើសុំលិខិតអនុញ្ញាតសាងសង ឬក៏ភាពយឺតយ៉ាវបណ្ដាលមកពីរដ្ឋបាលខេត្តកណ្ដាល?

ទោះជាយ៉ាងណា ប្រភពពីមេភូមិ មេឃុំ និងមន្ត្រីសាលាស្រុកបានបញ្ជាក់ស្របគ្នាថា ភូមិគ្រឹះខាងលើអត់មានច្បាប់ទេ គឺមិនមានឯកសារអនុញ្ញាតសាងសង់ត្រូវបានកត់ត្រាផ្លូវការឡើយ។

បើតាមប្រភពផ្សេងទៀតបានអះអាងថា សាច់ញាតិម្ចាស់ភូមិគ្រឹះបានធ្វើការសម្របសម្រួលជាមួយអាជ្ញាធរស្រុកតាមមាត់ហើយ។ លោកបន្តថា លោកបានស្នើសុំអនុញ្ញាតពីលោកអភិបាលស្រុករួចហើយ។ ខណៈលោក អ៊ូច សាវឿន អភិបាលស្រុកកណ្ដាលស្ទឹង បានបញ្ជាក់ថា លោកមិនហាមឃាត់ក្នុងការសាងសង់ទេ ប៉ុន្តែបានណែនាំឲ្យម្ចាស់ទៅសុំច្បាប់តាមនីតិវិធីត្រឹមត្រូវ ហើយក៏បានបញ្ជាក់ថា លោកនឹងចាត់ក្រុមការងារចុះពិនិត្យ និងផ្អាក ប្រសិនបើរកឃើញថា គ្មានលិខិតអនុញ្ញាត។

ទន្ទឹមនឹងនេះ ប្រធានការិយាល័យសំណង់ខេត្តកណ្ដាល លោក សុខ សុវណ្ណារិទ្ធិ បានអះអាងថា មិនទាន់ទទួលបានព័ត៌មានអំពីករណីនេះឡើយ។

សាធារណជនបានលើកឡើងថា ករណីនេះបង្ហាញពីចន្លោះប្រហោងមួយច្បាស់លាស់ក្នុងការគ្រប់គ្រងសំណង់នៅមូលដ្ឋាន។ ការអនុញ្ញាតឲ្យសំណង់អត់ច្បាប់អាចដំណើរការរហូតដល់៨០% មុនពេលមានវិធានការផ្អាក បង្ហាញថា ការត្រួតពិនិត្យមិនទាន់មានប្រសិទ្ធភាព ឬមិនទាន់អនុវត្តបានទាន់ពេលវេលា។

ប្រភពបន្តថា ការអះអាងពីការស្នើសុំអនុញ្ញាតតាមមាត់ ឬការសម្របសម្រួលក្រៅប្រព័ន្ធផ្លូវការ គឺជាចំណុចដែលគួរត្រូវបានពិនិត្យយ៉ាងម៉ត់ចត់ ដើម្បីធានាថា គ្មានការបំពានលើគោលការណ៍នីតិរដ្ឋ និងការអនុវត្តច្បាប់មានតម្លាភាព។

មហាជនបាន​លើកឡើងទៀតថា អាជ្ញាធរគ្រប់លំដាប់ថ្នាក់គួរតែពង្រឹងយន្តការត្រួតពិនិត្យជាប្រចាំ ចាប់ពីដំណាក់កាលដំបូងនៃការសាងសង់ ដើម្បីទប់ស្កាត់មិនឲ្យមានការអនុវត្តខុសច្បាប់យូរអង្វែង។ ព្រមទាំងគួរតែបង្កើនភាពច្បាស់លាស់ក្នុងនីតិវិធីផ្ដល់អនុញ្ញាត ដើម្បីកាត់បន្ថយភាពសង្ស័យពីសាធារណជន និងធានាបាននូវភាពយុត្តិធម៌សម្រាប់គ្រប់ភាគីពាក់ព័ន្ធ។

ករណីនេះមិនត្រឹមតែជាបញ្ហារបស់ម្ចាស់សំណង់ឯកជនទេ ប៉ុន្តែជាការបង្ហាញពីតម្រូវការចាំបាច់ក្នុងការកែលម្អប្រព័ន្ធគ្រប់គ្រង និងអនុវត្តច្បាប់ឲ្យមានប្រសិទ្ធភាព ប្រាកដថា ការអភិវឌ្ឍត្រូវដើរតាមគន្លងច្បាប់ និងមានតម្លាភាព។

គួរំលឹកថា នៅក្នុងកិច្ចប្រជុំគណៈអភិបាលខេត្តប្រចាំអឌ្ឍមាសទី១ ខែមេសា ឆ្នាំ២០២៦ លោក គួច ចំរើន អភិបាលខេត្តកណ្ដាលបានជំរុញឱ្យអាជ្ញាធរក្រុង-ស្រុកទាំងអស់ បង្កើនការត្រួតពិនិត្យសំណង់ និងអនុវត្តច្បាប់ឱ្យបានម៉ឺងម៉ាត់។

ទន្ទឹមនោះ មហាជនសំនូមពរឲ្យ លោក គួច ចំរើន អភិបាលខេត្តកណ្ដាលចាត់មន្ត្រីជំនាញចុះស្រាវជ្រាវឲ្យបានម៉ឹងម៉ាត់បំផុតចំពោះសំណង់អត់ច្បាប់នៅទូទាំងខេត្តកណ្ដាល ជាពិសេសក្នុងស្រុកកណ្ដាលស្ទឹង៕