ក្រោមស្លាកកីឡា លាក់ល្បែងស៊ីសង៖ តើអាជ្ញាធរខណ្ឌ៧មករា មើលរំលងឬអត់ដឹងពិត?

(ភ្នំពេញ)៖ ទីតាំងតារាងបាល់ទះដ៏ធំមួយ ស្ថិតនៅក្នុងប្លុកសង្កាត់វាលវង់ ខណ្ឌប្រាំពីរមករា រាជធានីភ្នំពេញ កំពុងត្រូវបានប្រជាពលរដ្ឋ និងអ្នកចូលរួមសកម្មភាពនៅទីនោះ លើកឡើងថា បានបម្លែងខ្លួនពីទីកន្លែងកីឡា ទៅជាទីតាំងបង្កប់ល្បែងស៊ីសងច្រើនប្រភេទ ដោយមានការដាក់ភ្នាល់លុយច្រើនរាប់ពាន់ដុល្លារ។

តាមការរាយការណ៍ពីប្រជាពលរដ្ឋនៅជិតតំបន់ និងអ្នកទៅលេងកីឡា បានឲ្យដឹងថា សកម្មភាពល្បែងស៊ីសងត្រូវបានធ្វើឡើងយ៉ាងចំហ និងមានលក្ខណៈសកម្មជារៀងរាល់ថ្ងៃ ក្រោមស្លាកយីហោក្លិបបាល់ទះផ្សារដេប៉ូ ដែលត្រូវបានគេស្គាល់ថា ជាកម្មសិទ្ធិរបស់អ្នកមានឥទ្ធិពលមួយរូប។ ទីតាំងនេះស្ថិតនៅខាងកើតផ្លូវលេខ ២១៥ ក្នុងសង្កាត់វាលវង់ ហើយមិនទាន់ឃើញមានសកម្មភាពចុះត្រួតពិនិត្យ ឬបង្ក្រាបពីសំណាក់អាជ្ញាធរមូលដ្ឋានឡើយ។

ប្រជាពលរដ្ឋបានបង្ហាញការព្រួយបារម្ភថា ការប្រមូលផ្តុំរបស់ក្រុមអ្នកញៀនល្បែង និងសកម្មភាពភ្នាល់ប្រាក់ធំៗ អាចបង្កឲ្យមានហានិភ័យផ្នែកអសន្តិសុខសង្គម ដូចជាការកើតមានបទល្មើសផ្សេងៗ និងប៉ះពាល់ដល់សុវត្ថិភាពរស់នៅប្រចាំថ្ងៃរបស់ពលរដ្ឋនៅជុំវិញតំបន់។

ទោះជាយ៉ាងណា ភាពស្ងៀមស្ងាត់របស់អាជ្ញាធរខណ្ឌ៧មករា ក្នុងការឆ្លើយតបចំពោះបញ្ហានេះ កំពុងបង្កើតសំណួរពីសាធារណជន អំពីប្រសិទ្ធភាពនៃការអនុវត្តច្បាប់ និងតួនាទីត្រួតពិនិត្យនៅមូលដ្ឋាន។ មតិមួយចំនួនបានសង្កត់ធ្ងន់ថា ការខ្វះវិធានការច្បាស់លាស់ អាចបណ្តាលឲ្យមានការយល់ច្រឡំ ឬការសង្ស័យពីភាពតម្លាភាពនៃអាជ្ញាធរ។

គួរបញ្ជាក់ថា តាមគោលការណ៍របស់រាជរដ្ឋាភិបាល និងក្រសួងមហាផ្ទៃ បានហាមឃាត់យ៉ាងតឹងរឹងចំពោះសកម្មភាពល្បែងស៊ីសងគ្រប់ប្រភេទ។ ដូច្នេះ ករណីនេះត្រូវការការពិនិត្យ និងបំភ្លឺឲ្យបានច្បាស់លាស់ពីសំណាក់អាជ្ញាធរពាក់ព័ន្ធ ដើម្បីបញ្ចប់ការសង្ស័យ និងធានាថា ការអនុវត្តច្បាប់ត្រូវបានអនុវត្តយ៉ាងស្មើភាព និងមានប្រសិទ្ធភាព។

មហាជនបានលើកឡើងថា អាជ្ញាធរមូលដ្ឋានគួរតែចូលរួមសកម្មក្នុងការត្រួតពិនិត្យ និងចាត់វិធានការឲ្យបានទាន់ពេលវេលា ប្រសិនបើមានការបំពានច្បាប់ពិតប្រាកដ។ ព្រមទាំងបង្ហាញព័ត៌មានជាសាធារណៈឲ្យបានច្បាស់ ដើម្បីរក្សាទុកទំនុកចិត្តរបស់ប្រជាពលរដ្ឋ និងធានាសុវត្ថិភាពសង្គមជាសរុប៕