បង្ក្រាបទីតាំង Online Scam ២កន្លែងនៅប៉ោយប៉ែត ឃាត់មនុស្សជាង៣០០នាក់ សមត្ថកិច្ចបាញ់អាវុធទប់ស្កាត់ការរត់គេច

(បន្ទាយមានជ័យ)៖ កម្លាំងអគ្គស្នងការដ្ឋាននគរបាលជាតិ នៅថ្ងៃទី២២ ខែមេសា ឆ្នាំ២០២៦ បានបើកប្រតិបត្តិការបង្ក្រាបទីតាំងសង្ស័យប្រព្រឹត្តបទល្មើស Online Scam ចំនួន ២កន្លែង ស្ថិតនៅក្នុងសង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ ដោយឃាត់ខ្លួនមនុស្សជាង ៣០០នាក់ ក្នុងនោះភាគច្រើនជាជនបរទេស។

ប្រតិបត្តិការនេះអនុវត្តតាមបទបញ្ជារបស់នាយឧត្តមសេនីយ៍ ស ថេត អគ្គស្នងការនគរបាលជាតិ ហើយដឹកនាំផ្ទាល់ដោយលោកឧត្តមសេនីយ៍ឯក ហែម សុវត្ថិ អគ្គស្នងការរងនគរបាលជាតិ ក្រោមការសម្របសម្រួលពីតំណាងអយ្យការអមសាលាដំបូងខេត្តបន្ទាយមានជ័យ។

តាមសេចក្ដីរាយការណ៍ពីប្រភពព័ត៌មានបានឲ្យដឹងថា ក្នុងអំឡុងប្រតិបត្តិការ កម្លាំងសមត្ថកិច្ចបានបង្ខំចិត្តប្រើប្រាស់អាវុធបាញ់ជាច្រើនគ្រាប់ ដើម្បីទប់ស្កាត់ក្រុមជនសង្ស័យដែលព្យាយាមរត់គេចចេញពីទីតាំង។ សមត្ថកិច្ចបានគ្រប់គ្រងស្ថានការណ៍វិញបានដោយសុវត្ថិភាព។

ជាមួយគ្នានេះ កម្លាំងជំនាញក៏បានរកឃើញ និងដកហូតវត្ថុតាងជាច្រើនដែលពាក់ព័ន្ធនឹងសកម្មភាពប្រព្រឹត្តបទល្មើស Online Scam ដើម្បីយកទៅធ្វើការស្រាវជ្រាវបន្ថែមតាមនីតិវិធីច្បាប់។
ប្រភពដដែលបានបញ្ជាក់ថា ជនសង្ស័យទាំងអស់កំពុងត្រូវបានសមត្ថកិច្ចរៀបចំសំណុំរឿង បញ្ជូនទៅកាន់ស្ថាប័នតុលាការដើម្បីចាត់ការតាមច្បាប់ ខណៈសមត្ថកិច្ចក៏កំពុងបន្តស៊ើបអង្កេតស្វែងរកបណ្តាញពាក់ព័ន្ធផ្សេងទៀតដែលអាចមានជាប់ទាក់ទងនឹងករណីនេះផងដែរ។

ប្រតិបត្តិការនេះត្រូវបានមើលឃើញថា ជាផ្នែកមួយនៃយុទ្ធនាការរបស់អាជ្ញាធរក្នុងការបង្ក្រាបបទល្មើសបច្ចេកវិទ្យា ដែលកំពុងកើតមានកាន់តែស្មុគស្មាញ និងឆ្លងកាត់ព្រំដែន ក្នុងគោលបំណងធានាសុវត្ថិភាពសង្គម និងការពារប្រជាពលរដ្ឋពីការបោកប្រាស់តាមប្រព័ន្ធអនឡាញ៕