ការពារកិត្តិយសជាតិ! គណៈកម្មាធិការសិទ្ធិមនុស្សទាមទារ The Wall Street Journal កែតម្រូវការប្រើពាក្យ «Scambodia»
(ភ្នំពេញ)៖ គណៈកម្មាធិការសិទ្ធិមនុស្សកម្ពុជា (គ.ស.ម.ក.) បានផ្ញើលិខិតជាផ្លូវការទៅកាន់ The Wall Street Journal បន្ទាប់ពីសារព័ត៌មានអន្តរជាតិមួយនេះ បានប្រើប្រាស់ពាក្យ «Scambodia» ក្នុងអត្ថបទមួយ ដែលត្រូវបានផ្សាយកាលពីថ្ងៃទី១៩ ខែមេសា ឆ្នាំ២០២៦ ដោយចាត់ទុកថា ជាការប៉ះពាល់យ៉ាងធ្ងន់ធ្ងរដល់កិត្តិយសជាតិ និងសេចក្តីថ្លៃថ្នូររបស់ប្រជាជនកម្ពុជា។
តាមការបញ្ជាក់របស់ គ.ស.ម.ក. បញ្ហា Scam Online មិនមែនជាបញ្ហារបស់ប្រទេសណាមួយប៉ុណ្ណោះទេ ប៉ុន្តែជាបញ្ហាសាកល ដែលបណ្ដាប្រទេសទាំងអស់ កំពុងសហការគ្នាទប់ស្កាត់ និងបង្ក្រាប។ ដូច្នេះ ការភ្ជាប់ឈ្មោះប្រទេសជាមួយពាក្យមានន័យអវិជ្ជមាន គឺជាការបង្ខូចឈ្មោះជាតិ និងបង្កើតការយល់ច្រឡំដល់សាធារណជនអន្តរជាតិ។
គ.ស.ម.ក. ក៏បានលើកឡើងថា ការប្រើប្រាស់ពាក្យពេចន៍បែបនេះ បង្ហាញពីកង្វះវិជ្ជាជីវៈ និងក្រមសីលធម៌សារព័ត៌មាន ដែលអាចនាំឲ្យមានការរើសអើង និងប៉ះពាល់ដល់សិទ្ធិមនុស្សជាមូលដ្ឋាន រួមទាំងសិទ្ធិក្នុងការរក្សាកិត្តិយស និងសេចក្តីថ្លៃថ្នូររបស់ប្រជាជនប្រមាណជិត ១៨លាននាក់។
ក្នុងន័យនេះ គ.ស.ម.ក. បានរំលឹកថា សេរីភាពនៃការបញ្ចេញមតិ និងសេរីភាពសារព័ត៌មាន គឺជាគោលការណ៍សំខាន់ក្នុងសង្គមប្រជាធិបតេយ្យ ប៉ុន្តែត្រូវអនុវត្តដោយមានការទទួលខុសត្រូវ និងគោរពតាមបទបញ្ញត្តិនៃ United Nations ព្រមទាំងឯកសារអន្តរជាតិស្តីពីសិទ្ធិមនុស្ស ដូចជា Universal Declaration of Human Rights និង International Covenant on Civil and Political Rights។
ជាមួយគ្នានេះ គ.ស.ម.ក. បានដាក់សំណើច្បាស់លាស់ទៅកាន់ The Wall Street Journal រួមមាន៖ *លុបពាក្យ «Scambodia» ចេញពីអត្ថបទជាបន្ទាន់ *ចេញការកែតម្រូវ ឬបំភ្លឺ ដោយផ្អែកលើការរាយការណ៍ត្រឹមត្រូវ និងមានតុល្យភាព *ជៀសវាងការប្រើពាក្យប្រមាថក្នុងការផ្សាយនាពេលអនាគត *ធ្វើការសុំទោសជាផ្លូវការចំពោះការប្រើប្រាស់ចំណងជើង
កែសម្រួលចំណងជើងឡើងវិញ ឲ្យមានភាពត្រឹមត្រូវ និងគ្មានលក្ខណៈរើសអើង។
អ្នកវិភាគមួយចំនួនយល់ថា ករណីនេះជាការរំលឹកដ៏សំខាន់ចំពោះវិស័យសារព័ត៌មានអន្តរជាតិ ឲ្យពង្រឹងគុណភាពវិជ្ជាជីវៈ និងគោរពក្រមសីលធម៌ ដោយជៀសវាងការប្រើប្រាស់ពាក្យពេចន៍ដែលអាចបង្កឲ្យមានការយល់ច្រឡំ ឬប៉ះពាល់ដល់កិត្តិយសប្រទេស និងប្រជាជន។ ការរក្សាតុល្យភាពរវាងសេរីភាពនៃការបញ្ចេញមតិ និងការទទួលខុសត្រូវវិជ្ជាជីវៈ គឺជាចំណុចស្នូលក្នុងការធានាឲ្យសារព័ត៌មានបន្តរក្សាបាននូវជំនឿជាក់ និងតម្លៃនៅក្នុងសង្គមសកល៕
