រថយន្ត Jeep បុកម៉ូតូរបួស២នាក់ រួចបើករត់ បន្សល់ស្លាកលេខនៅកន្លែងកើតហេតុ

(ភ្នំពេញ)៖ គ្រោះថ្នាក់ចរាចរណ៍មួយបានកើតឡើងនៅវេលាម៉ោង ១១ និង ៣០ នាទីយប់ ថ្ងៃទី២១ ខែមេសា ឆ្នាំ២០២៦ នៅចំណុចផ្លូវបំបែកជាបួន តាមបណ្តោយផ្លូវ១០០៣ កែងផ្លូវ១៩៥៨ ស្ថិតក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ បណ្តាលឲ្យមនុស្ស២នាក់រងរបួសធ្ងន់ស្រាល ខណៈរថយន្តបង្កបានបើកគេចខ្លួនបាត់ពីកន្លែងកើតហេតុ។

តាមប្រភពព័ត៌មាននៅទីតាំងកើតហេតុបានឲ្យដឹងថា រថយន្តស៊េរីទំនើបម៉ាក Jeep ពាក់ស្លាកលេខភ្នំពេញ 2CK-2355 បានបើកបុកជាមួយម៉ូតូម៉ាក Honda Dream ពាក់ស្លាកលេខភ្នំពេញ 1CQ-8646 នៅចំណុចផ្លូវបំបែក បណ្ដាលឲ្យជនរងគ្រោះប្រុសស្រី២នាក់ ដែលជាបងប្អូនថ្លៃនឹងគ្នា រងរបួសធ្ងន់ស្រាល។

ក្រោយបង្កហេតុ អ្នកបើកបររថយន្តមិនបានឈប់ដោះស្រាយ ឬជួយសង្គ្រោះជនរងគ្រោះនោះទេ ប៉ុន្តែបានបើកគេចខ្លួនចេញពីទីតាំង បន្សល់ទុកតែស្លាកលេខរថយន្តនៅកន្លែងកើតហេតុ ដែលក្លាយជាភស្តុតាងសំខាន់សម្រាប់សមត្ថកិច្ចក្នុងការស្វែងរកម្ចាស់យានយន្ត។

ជនរងគ្រោះត្រូវបានប្រជាពលរដ្ឋ និងក្រុមសង្គ្រោះបន្ទាន់ ជួយដឹកបញ្ជូនទៅមន្ទីរពេទ្យភ្លាមៗ ដើម្បីព្យាបាល។ ចំណែកម៉ូតូរងគ្រោះ និងស្លាកលេខរថយន្ត ត្រូវបានសមត្ថកិច្ចយកទៅរក្សាទុកនៅប៉ុស្តិ៍នគរបាលរដ្ឋបាលភ្នំពេញថ្មី ដើម្បីបន្តនីតិវិធីស្រាវជ្រាវ និងស្វែងរកជនបង្ក ឲ្យចូលខ្លួនមកទទួលខុសត្រូវតាមច្បាប់។

ពាក់ព័ន្ធនឹងករណី «បុកហើយរត់» ប្រភពច្បាប់បានបញ្ជាក់ថា ទោះបីគ្រោះថ្នាក់ចរាចរណ៍អាចកើតឡើងដោយអចេតនាក៏ដោយ ក៏ការរត់គេចខ្លួនក្រោយបង្កហេតុ គឺជាសកម្មភាពបំពានច្បាប់ធ្ងន់ធ្ងរ ដែលអាចនាំឲ្យទទួលទោសបន្ថែម។

យោងតាមមាត្រា ៥៤៣ នៃក្រមព្រហ្មទណ្ឌ អ្នកបើកបរដែលដឹងថាបានបង្កគ្រោះថ្នាក់ ប៉ុន្តែរត់គេចខ្លួន ដើម្បីគេចវេះការទទួលខុសត្រូវ អាចប្រឈមនឹងទោសដាក់ពន្ធនាគារពី ៦ខែ ដល់ ២ឆ្នាំ និងពិន័យជាប្រាក់ពី ១លាន ដល់ ៤លានរៀល។

ជាមួយគ្នានេះ មាត្រា ៨៣ នៃច្បាប់ស្តីពីចរាចរណ៍ផ្លូវគោក ក៏បានកំណត់ថា ករណីបើកបរដោយធ្វេសប្រហែស បណ្ដាលឲ្យអ្នកដទៃរងរបួស អាចត្រូវផ្ដន្ទាទោសដាក់ពន្ធនាគារពី ៦ខែ ដល់ ២ឆ្នាំ និងពិន័យពី ២លាន ដល់ ១០លានរៀល។ ប្រសិនបើមានកត្តាធ្ងន់ ដូចជា រត់គេចខ្លួន ស្រវឹង ឬគ្មានប័ណ្ណបើកបរ ទោសអាចកើនឡើងដល់ពី ១ឆ្នាំ ដល់ ៣ឆ្នាំ និងពិន័យពី ៤លាន ដល់ ១៥លានរៀល។

អាជ្ញាធរបានអំពាវនាវដល់អ្នកបើកបរទាំងអស់ ឲ្យគោរពច្បាប់ចរាចរណ៍ និងមានស្មារតីទទួលខុសត្រូវខ្ពស់ ពិសេសនៅពេលកើតមានគ្រោះថ្នាក់ គួរឈប់យានយន្តភ្លាមៗ ជួយសង្គ្រោះជនរងគ្រោះ និងរាយការណ៍ទៅ

សមត្ថកិច្ច ដើម្បីជួយសម្រួលដំណើរការតាមច្បាប់។ ការរត់គេចខ្លួនមិនមែនជាដំណោះស្រាយទេ ផ្ទុយទៅវិញ វាធ្វើឲ្យបញ្ហាកាន់តែធ្ងន់ធ្ងរ និងបង្កើនទោសទណ្ឌបន្ថែម៕