សមត្ថកិច្ចឆ្មក់អគារខុនដូរ ចាប់ជនបរទេស៥៥នាក់ ពាក់ព័ន្ធ Online Scam និងគ្រឿងញៀន

(ភ្នំពេញ)៖ ក្នុងការបន្តពង្រឹងសន្តិសុខសង្គម និងទប់ស្កាត់បទល្មើសបច្ចេកវិទ្យា កម្លាំងគណៈបញ្ជាការឯកភាពរាជធានីភ្នំពេញ បានបើកប្រតិបត្តិការចុះបង្ក្រាបទីតាំងសង្ស័យមួយ ស្ថិតនៅអគារខុនដូរ ZHUOYUFENG ក្នុងខណ្ឌមានជ័យ ដោយឃាត់ខ្លួនជនបរទេសសរុប ៥៥នាក់ ពាក់ព័ន្ធនឹងសកម្មភាពឆបោកតាមប្រព័ន្ធអនឡាញ និងបទល្មើសគ្រឿងញៀន។

ប្រតិបត្តិការនេះបានអនុវត្តក្រោមការដឹកនាំផ្ទាល់ពីលោក ឃួង ស្រេង អភិបាលរាជធានីភ្នំពេញ និងឧត្តមសេនីយ៍ឯក ជួន ណារិន្ទ ស្នងការនគរបាលរាជធានីភ្នំពេញ ដោយមានការសម្របសម្រួលនីតិវិធីពីតំណាងអយ្យការ និងការចូលរួមពីកម្លាំងចម្រុះពាក់ព័ន្ធ។

តាមរបាយការណ៍លទ្ធផលប្រតិបត្តិការ កម្លាំងសមត្ថកិច្ចបានរកឃើញថា ក្នុងចំណោមជនបរទេសទាំង៥៥នាក់ មាន ៤៤នាក់ ស្នាក់នៅខុសច្បាប់ ខណៈជនជាតិវៀតណាមចំនួន ១១នាក់ (ស្រី ៣នាក់) ត្រូវបានសង្ស័យពាក់ព័ន្ធដោយផ្ទាល់នឹងសកម្មភាព Online Scam ដែលប្រើល្បិចអូសទាញជនរងគ្រោះឱ្យវិនិយោគប្រាក់ ដើម្បីទទួលបានប្រាក់ចំណេញក្លែងក្លាយ។

ក្នុងប្រតិបត្តិការនេះ សមត្ថកិច្ចក៏បានដកហូតវត្ថុតាងសំខាន់ៗ រួមមាន កុំព្យូទ័រយួរដៃ ១៤គ្រឿង ទូរស័ព្ទដៃ ០៦គ្រឿង និងសារធាតុសង្ស័យជាគ្រឿងញៀនចម្រុះប្រមាណ ១០គីឡូក្រាម ដែលជាសញ្ញាបង្ហាញពីបណ្តាញប្រតិបត្តិការមានលក្ខណៈរៀបចំ និងមានទំហំធំ។

អាជ្ញាធរបានបញ្ជាក់ថា ករណីនេះជាផ្នែកមួយនៃការបង្ក្រាបបណ្តាញឧក្រិដ្ឋកម្មឆ្លងដែន ដែលកំពុងប្រើប្រាស់បច្ចេកវិទ្យាដើម្បីលួចបន្លំ និងបង្កហានិភ័យដល់សង្គម។ ទន្ទឹមនឹងនេះ ក៏បានអំពាវនាវឱ្យប្រជាពលរដ្ឋមានការប្រុងប្រយ័ត្នខ្ពស់ ចំពោះការផ្តល់ព័ត៌មានផ្ទាល់ខ្លួន ឬការវិនិយោគតាមអនឡាញដែលមិនមានប្រភពច្បាស់លាស់។

បច្ចុប្បន្ន ជនសង្ស័យ និងវត្ថុតាងទាំងអស់ ត្រូវបានបញ្ជូនទៅស្នងការដ្ឋាននគរបាលរាជធានីភ្នំពេញ ដើម្បីបន្តនីតិវិធីតាមច្បាប់ ខណៈសមត្ថកិច្ចកំពុងពង្រីកការស៊ើបអង្កេត ដើម្បីបំបែកបណ្តាញពាក់ព័ន្ធផ្សេងទៀត៕