អភិបាលខេត្តកណ្ដាលជំរុញរឹតបន្តឹងការគ្រប់គ្រងសំណង់អត់ច្បាប់ និងរៀបចំសណ្តាប់ធ្នាប់ទីប្រជុំជន

(កណ្ដាល)៖ ក្នុងកិច្ចប្រជុំគណៈអភិបាលខេត្តប្រចាំអឌ្ឍមាសទី១ ខែមេសា ឆ្នាំ២០២៦ ឯកឧត្តម គួច ចំរើន អភិបាលនៃគណៈអភិបាលខេត្តកណ្ដាល បានផ្ដោតសំខាន់លើបញ្ហាការគ្រប់គ្រងសំណង់ និងសណ្តាប់ធ្នាប់សាធារណៈ ដោយជំរុញឱ្យអាជ្ញាធរក្រុង-ស្រុកទាំងអស់ បង្កើនការត្រួតពិនិត្យ និងអនុវត្តច្បាប់ឱ្យបានម៉ឺងម៉ាត់។

ឯកឧត្តមបានមានប្រសាសន៍ថា សំណង់មិនមានច្បាប់អនុញ្ញាត និងសំណង់មិនរៀបរយ កំពុងបង្កផលប៉ះពាល់ដល់សោភ័ណភាពទីប្រជុំជន និងអាចនាំឱ្យកើតមានហានិភ័យសុវត្ថិភាពសាធារណៈ។ ដូច្នេះ អាជ្ញាធរមូលដ្ឋានត្រូវចុះពិនិត្យជាបន្តបន្ទាប់ ដោយណែនាំម្ចាស់សំណង់ឱ្យអនុវត្តតាមនីតិវិធីសុំច្បាប់អនុញ្ញាតឱ្យបានត្រឹមត្រូវ មុននឹងដំណើរការសាងសង់។

ជាមួយគ្នានេះ អាជ្ញាធរត្រូវបន្តធ្វើបច្ចុប្បន្នភាពទិន្នន័យសំណង់គ្រប់ប្រភេទ ជាពិសេសសំណង់អត់ច្បាប់ និងសំណង់មិនរៀបរយ ដើម្បីងាយស្រួលក្នុងការគ្រប់គ្រង និងចាត់វិធានការឱ្យបានទាន់ពេលវេលា។ ការអនុវត្តវិធានការទាំងនេះ ត្រូវធ្វើឡើងក្នុងស្មារតីទន់ភ្លន់ ប៉ុន្តែមានភាពម៉ឺងម៉ាត់ ដើម្បីធានាបាននូវប្រសិទ្ធភាព និងការគោរពច្បាប់ពីភាគីពាក់ព័ន្ធ។

លើសពីនេះ ឯកឧត្តមអភិបាលខេត្ត ក៏បានណែនាំឱ្យបន្តរុះរើសំណង់ ឬសំយាបដែលរំលោភលើដីចំណីផ្លូវ និងបង្កការកកស្ទះចរាចរណ៍ ដើម្បីស្ដារឡើងវិញនូវសណ្តាប់ធ្នាប់ និងសោភ័ណភាពតាមដងផ្លូវសាធារណៈ។

ការផ្ដោតលើការគ្រប់គ្រងសំណង់នេះ ត្រូវបានមើលឃើញថា ជាជំហានសំខាន់មួយក្នុងការលើកកម្ពស់របៀបរៀបរយទីប្រជុំជន និងធានាការអភិវឌ្ឍប្រកបដោយចីរភាពនៅក្នុងខេត្តកណ្ដាល។

ប៉ុន្តែជាក់ស្ដែង ការអនុវត្តនៅមូលដ្ឋានមួយចំនួននៅតែបង្ហាញពីភាពខ្វះភាពម៉ឺងម៉ាត់ និងមិនទាន់ស្មើភាពគ្នា។ ជាពិសេសនៅតំបន់មួយចំនួនដូចជា ស្រុកស្អាង និងស្រុកកណ្ដាលស្ទឹង បញ្ហាសំណង់អត់ច្បាប់ និងសំណង់សាងសង់រំលោភលើដីចំណីផ្លូវ ត្រូវបានគេកត់សម្គាល់ថា នៅតែមានការកើនឡើងដោយគ្មានការទប់ស្កាត់បានទាន់ពេលវេលា។ ស្ថានភាពនេះ បង្ហាញឱ្យឃើញថា ការគ្រប់គ្រងនៅមូលដ្ឋាន មិនទាន់អនុវត្តបានតាមទិសដៅ និងការណែនាំរបស់ថ្នាក់ដឹកនាំខេត្តបានពេញលេញនៅឡើយទេ ខណៈដែលបញ្ហាសំណង់អត់ច្បាប់ កំពុងបង្កផលប៉ះពាល់ទាំងសោភ័ណភាពទីប្រជុំជន ការប្រើប្រាស់ផ្លូវសាធារណៈ និងសុវត្ថិភាពរយៈពេលវែង។

មតិសាធារណជនបានលើកឡើងថា ប្រសិនបើគ្មានការចុះពិនិត្យជាប្រចាំ និងអនុវត្តច្បាប់ដោយគ្មានការលំបាកចិត្ត នោះវិធានការដែលបានដាក់ចេញ អាចនឹងនៅត្រឹមជាការណែនាំប៉ុណ្ណោះ ខណៈបញ្ហានឹងបន្តរីករាលដាល។ ក្នុងន័យនេះ អាជ្ញាធរមូលដ្ឋានត្រូវបង្កើនតួនាទីទទួលខុសត្រូវ ដោយមិនត្រឹមតែចេញសេចក្ដីណែនាំប៉ុណ្ណោះទេ ប៉ុន្តែត្រូវចុះអនុវត្តជាក់ស្ដែង ដាក់ចំណាត់ការលើសំណង់ខុសច្បាប់ឱ្យបានទាន់ពេលវេលា និងមានប្រសិទ្ធភាព។ ការអនុវត្តត្រូវមានភាពស្មើភាព មិនរើសអើង និងត្រូវធ្វើឡើងជាបន្តបន្ទាប់ ដើម្បីបង្កើនការគោរពច្បាប់ពីសំណាក់ប្រជាពលរដ្ឋ។ ការគ្រប់គ្រងសំណង់ មិនមែនជាការងារសាមញ្ញទេ ប៉ុន្តែជាចំណុចស្នូលមួយនៃការអភិវឌ្ឍទីប្រជុំជនឱ្យមានរបៀបរៀបរយ។ ប្រសិនបើអាជ្ញាធរអាចអនុវត្តបានតាមគោលការណ៍ដែលបានដាក់ចេញ នោះវានឹងជួយបង្កើនទាំងសោភ័ណភាព សុវត្ថិភាព និងគុណភាពជីវិតរបស់ប្រជាពលរដ្ឋនៅក្នុងខេត្តកណ្ដាលបានយ៉ាងមានប្រសិទ្ធភាព៕