PRADO បុកកន្ទុយរថយន្តធំយ៉ាងពេញទំហឹង! អតីតប្រធានផ្នែករដ្ឋបាលជលផលក្រុងសំពៅពូនរងរបួសធ្ងន់ កៀបជាប់ក្នុងឡាន

(កណ្តាល)៖ បុរសវ័យចំណាស់ម្នាក់ដែលជាមន្ត្រីចូលនិវត្តន៍ បានរងរបួសធ្ងន់ និងកៀបជាប់ក្នុងរថយន្ត បន្ទាប់ពីបើកបររថយន្តម៉ាក PRADO ក្នុងល្បឿនលឿន ទៅបុកកន្ទុយរថយន្តធំមួយគ្រឿងយ៉ាងពេញទំហឹង ខណៈដែលតៃកុងរថយន្តធំនោះ បានបើករត់គេចខ្លួនបាត់ពីកន្លែងកើតហេតុ។

ហេតុការណ៍គ្រោះថ្នាក់ចរាចរណ៍នេះ បានកើតឡើងនៅវេលាម៉ោង ២៣៖០៥នាទីយប់ ថ្ងៃទី១៩ ខែមេសា ឆ្នាំ២០២៦ លើកំណាត់ផ្លូវជាតិលេខ២១ ស្ថិតក្នុងភូមិទួលក្រសាំង សង្កាត់រកាខ្ពស់ ក្រុងតាខ្មៅ ខេត្តកណ្តាល។

តាមការបញ្ជាក់ពីលោកវរសេនីយ៍ត្រី ឃុន ណារិទ្ធ នាយប៉ុស្តិ៍នគរបាលរដ្ឋបាលរកាខ្ពស់ បានឲ្យដឹងថា ជនរងគ្រោះមានឈ្មោះ ទៀន ស៊ឹមម្លី អាយុ ៦៨ឆ្នាំ ជាអតីតប្រធានផ្នែករដ្ឋបាលជលផលក្រុងសំពៅពូន ដែលបានចូលនិវត្តន៍ ហើយមានទីលំនៅក្បែរកន្លែងកើតហេតុ។

មុនពេលកើតហេតុ ជនរងគ្រោះបានបើកបររថយន្តម៉ាក PRADO ពណ៌ទឹកប្រាក់ ពាក់ផ្លាកលេខ ភ្នំពេញ 2M-5994 ក្នុងទិសដៅពីលិចទៅកើត។ លុះដល់ចំណុចកើតហេតុ ក៏បានជ្រុលទៅបុកពីក្រោយរថយន្តធំមួយគ្រឿងមិនស្គាល់ម៉ាក ដែលកំពុងធ្វើដំណើរខាងមុខ បណ្ដាលឲ្យរថយន្តរងការខូចខាតផ្នែកខាងមុខយ៉ាងធ្ងន់ធ្ងរ និងផ្ទុះពោងសុវត្ថិភាពទាំងពីរ ខណៈអ្នកបើកបរត្រូវបានកៀបជាប់ក្នុងខាងក្នុងរថយន្ត។

ក្រោយកើតហេតុ កម្លាំងសមត្ថកិច្ចបានចុះអន្តរាគមន៍ភ្លាមៗ ដោយប្រើឧបករណ៍គាស់ទ្វារ ដើម្បីជួយសង្គ្រោះ និងដឹកជញ្ជូនជនរងគ្រោះទៅកាន់មន្ទីរពេទ្យបង្អែកជ័យជំនះ។ ចំណែករថយន្តធំដែលពាក់ព័ន្ធ បានបើករត់គេចខ្លួនបាត់ស្រមោល មុនពេលសមត្ថកិច្ចទៅដល់កន្លែងកើតហេតុ។

តាមការសន្និដ្ឋានបឋម គ្រោះថ្នាក់នេះអាចបណ្តាលមកពីការបើកបរក្នុងល្បឿនលឿន និងខ្វះការប្រុងប្រយ័ត្ន មិនបានវាយតម្លៃស្ថានភាពផ្លូវខាងមុខឲ្យបានច្បាស់លាស់។

មតិមហាជនលើកឡើងថា ករណីនេះបន្តជាការជូនដំណឹងដល់អ្នកបើកបរ​ទាំងអស់ ឲ្យគោរពច្បាប់ចរាចរណ៍ កាត់បន្ថយល្បឿន និងរក្សាគម្លាតសុវត្ថិភាព ដើម្បីជៀសវាងហានិភ័យដែលអាចបង្កគ្រោះថ្នាក់ដល់ជីវិត និងទ្រព្យសម្បត្តិ។ ក៏ដូចជាការជំរុញឲ្យសមត្ថកិច្ចពង្រឹងការតាមដាន និងស្វែងរកយានយន្តដែលរត់គេចពីកន្លែងកើតហេតុ ដើម្បីអនុវត្តច្បាប់ឲ្យបានតឹងរ៉ឹង និងយុត្តិធម៌៕