វត្តភ្នំកក្រើក! យុវជន១១នាក់ត្រូវបានចាប់ខ្លួន ករណីគប់ និងវាយឡាន!

(ភ្នំពេញ)៖ នគរបាលរាជធានីភ្នំពេញបានចាត់វិធានការយ៉ាងតឹងរ៉ឹងចំពោះក្រុមយុវជនដែលបង្កអសន្តិសុខសាធារណៈនៅតំបន់វត្តភ្នំ ដោយបានចាប់ខ្លួនជនពាក់ព័ន្ធបានចំនួន ១១នាក់ហើយ ខណៈអ្នកផ្សេងទៀតកំពុងត្រូវបានស្រាវជ្រាវបន្ត ដើម្បីនាំខ្លួនមកអនុវត្តតាមច្បាប់។

បើតាមការបញ្ជាក់របស់លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ នៅព្រឹកថ្ងៃទី២១ ខែមេសា ឆ្នាំ២០២៦នេះ បានឲ្យដឹងថា ក្នុងចំណោមយុវជនដែលត្រូវបានចាប់ខ្លួន មានអ្នកដែលបានចូលរួមប្រព្រឹត្តអំពើបំផ្លិចបំផ្លាញផ្សេងៗ ដូចជា កាច់ផ្លាកលេខយានយន្ត កាន់ផ្លែដូងគប់ និងកាន់ការ៉ូឡាគប់ទៅលើរថយន្តប្រជាពលរដ្ឋ ដែលបង្កការភ័យខ្លាច និងប៉ះពាល់ដល់សន្តិសុខសង្គមយ៉ាងធ្ងន់ធ្ងរ។

លោកស្នងការបានអំពាវនាវយ៉ាងតឹងរ៉ឹងដល់យុវជនដែលនៅសេសសល់ និងកំពុងរត់គេចខ្លួន ឲ្យចូលខ្លួនមកអធិការដ្ឋាននគរបាលខណ្ឌដូនពេញ ដើម្បីដោះស្រាយតាមផ្លូវច្បាប់ ជាពិសេសអ្នកដែលបានបំផុសបំផុលឲ្យកើតមានហេតុការណ៍នេះ ដែលបច្ចុប្បន្នកំពុងត្រូវបានតាមដានយ៉ាងជិតស្និទ្ធ។

ក្នុងនាមជាអ្នកអនុវត្តច្បាប់ លោកឧត្តមសេនីយ៍ឯក ជួន ណារិន្ទ បានសង្កត់ធ្ងន់ថា ក្រុមយុវជនមួយចំនួនតូចដែលដើរផ្លូវខុស គួរតែត្រឡប់មកកែខ្លួនឡើងវិញ ព្រោះគ្រួសារមានវិន័យ និងប្រទេសមានច្បាប់ជាគោល។ លោកបន្ថែមថា ច្បាប់មិនអាចអនុញ្ញាតឲ្យមនុស្សតែប៉ុន្មាននាក់ បង្កភាពចលាចលក្នុងសង្គម ហើយរួចខ្លួនបាននោះឡើយ។

ករណីនេះ មិនត្រឹមតែជាការអនុវត្តច្បាប់ប៉ុណ្ណោះទេ ប៉ុន្តែជាសារព្រមានច្បាស់លាស់មួយទៅកាន់យុវជនទាំងអស់ ឲ្យគោរពច្បាប់ និងទទួលខុសត្រូវលើអំពើរបស់ខ្លួន ដើម្បីរក្សាសន្តិភាព និងសណ្ដាប់ធ្នាប់សង្គមឲ្យបានល្អប្រសើរជាបន្ត៕