២ថ្ងៃ ២ប្រតិបត្តិការ! លោកស្នងការ ឈឿន សុចិត្ត បញ្ជាឱ្យនគរបាលស្អាងតាមឃាត់ខ្លួនជនត្រូវចោទ ៣នាក់ តាមដីកាតុលាការបានជោគជ័យ!
(កណ្ដាល)៖ ក្រោមបទបញ្ជាយ៉ាងម៉ឺងម៉ាត់របស់លោកឧត្ដមសេនីយ៍ទោ ឈឿន សុចិត្ត ស្នងការនគរបាលខេត្តកណ្ដាល កម្លាំងនគរបាលស្រុកស្អាងបានបង្ហាញប្រសិទ្ធភាពការងារផ្នែកអនុវត្តច្បាប់ ដោយបើកប្រតិបត្តិការស្រាវជ្រាវ និងអនុវត្តដីកាបង្គាប់ឲ្យចាប់ខ្លួនពីសាលាដំបូងខេត្តកណ្ដាល ដោយឃាត់ខ្លួនជនត្រូវចោទសរុបចំនួន៣នាក់ ក្នុងរយៈពេល២ថ្ងៃជាប់គ្នា គឺថ្ងៃទី១៦ និងទី១៧ ខែមេសា ឆ្នាំ២០២៦ ពាក់ព័ន្ធនឹងករណីផ្សេងៗគ្នា។
តាមប្រភពពីសមត្ថកិច្ចបានឲ្យដឹងថា ក្នុងករណីទី១ កាលពីវេលាម៉ោង ១១៖៥០នាទី ថ្ងៃទី១៦ ខែមេសា ឆ្នាំ២០២៦ កម្លាំងផ្នែកនគរបាលយុត្តិធម៌ស្រុកស្អាង សហការជាមួយប៉ុស្តិ៍នគរបាលរដ្ឋបាលព្រែកអំបិលបានចុះប្រតិបត្តិការនៅចំណុចភូមិកូនជ្រែ ឃុំព្រែកអំបិល ឃាត់ខ្លួនជនត្រូវចោទចំនួន ២នាក់ រួមមាន៖ មឿន រ៉ាម៉ូ អាយុ ២២ឆ្នាំ និង ពៅ រ៉ន អាយុ ១៩ឆ្នាំ ដែលរស់នៅក្នុងមូលដ្ឋានកើតហេតុ។ ការឃាត់ខ្លួននេះអនុវត្តតាមដីកាលេខ ៩៧៩ ចុះថ្ងៃទី២៦ ខែកញ្ញា ឆ្នាំ២០២៥ ពាក់ព័ន្ធបទលួចមានស្ថានទម្ងន់ទោស ដែលបានប្រព្រឹត្តកាលពីថ្ងៃទី១៥ ខែមេសា ឆ្នាំ២០២៥។
ដោយឡែក ក្នុងករណីទី២ កាលពីវេលាម៉ោង ១១និង៣០នាទី ថ្ងៃទី១៧ ខែមេសា ឆ្នាំ២០២៦ កម្លាំងផ្នែកប្រឆាំងគ្រឿងញៀនស្រុក សហការជាមួយប៉ុស្តិ៍នគរបាលរដ្ឋបាលស្វាយប្រទាល បានចុះអនុវត្តដីកាចាប់ខ្លួនជនត្រូវចោទម្នាក់ឈ្មោះ ផ្លា ខ្នាង អាយុ ៣៥ឆ្នាំ នៅចំណុចភូមិព្រែកតាតិន ឃុំស្វាយប្រទាល។ ប្រតិបត្តិការនេះធ្វើឡើងតាមដីកាបង្គាប់ឲ្យចាប់ខ្លួនលេខ ០២៧ ចុះថ្ងៃទី១០ ខែមករា ឆ្នាំ២០២៥ ពាក់ព័ន្ធនឹងបទល្មើសដែលបានកើតឡើងកាលពីថ្ងៃទី៣ ខែធ្នូ ឆ្នាំ២០២៤ នៅភូមិឫស្សីជ្រោយ។
បច្ចុប្បន្ន ជនត្រូវចោទទាំង៣នាក់ ត្រូវបានសមត្ថកិច្ចឃាត់ខ្លួនបណ្ដោះអាសន្ននៅអធិការដ្ឋាននគរបាលស្រុកស្អាង ដើម្បីរៀបចំសំណុំរឿងបញ្ជូនទៅសាលាដំបូងខេត្តកណ្ដាល ចាត់ការបន្តតាមនីតិវិធីច្បាប់។
ករណីនេះបង្ហាញពីការបន្តរឹតបន្តឹងអនុវត្តច្បាប់ និងការបង្កើនប្រសិទ្ធភាពការងាររបស់សមត្ថកិច្ចក្នុងការទប់ស្កាត់ និងបង្ក្រាបបទល្មើសនៅតាមមូលដ្ឋាន ខណៈអាជ្ញាធរអំពាវនាវឲ្យប្រជាពលរដ្ឋសហការផ្តល់ព័ត៌មាន ដើម្បីរក្សាសន្តិសុខសង្គមឲ្យកាន់តែប្រសើរ៕
