បើកបញ្ច្រាស់ទិស បង្កគ្រោះថ្នាក់ធ្ងន់! តែព័ត៌មានស្លាប់គឺមិនពិត!

(កណ្ដាល)៖ នៅពេលព័ត៌មានលើបណ្ដាញសង្គមកំពុងរីករាលដាលយ៉ាងលឿន ករណីគ្រោះថ្នាក់ចរាចរណ៍មួយនៅស្រុកអង្គស្នួល ខេត្តកណ្ដាល ក៏បានក្លាយជាប្រធានបទក្តៅ ប៉ុន្តែការផ្សព្វផ្សាយខ្លះវិញមិនទាន់ផ្ទៀងផ្ទាត់ច្បាស់លាស់ បង្កឲ្យមានការភាន់ច្រឡំក្នុងសាធារណៈ។

ក្រុមការងារព័ត៌មាន និងប្រតិកម្មរហ័ស នៃអធិការដ្ឋាននគរបាលស្រុកអង្គស្នួល បានចេញមុខបំភ្លឺជាផ្លូវការ បន្ទាប់ពីមានគេហទំព័រ និងផេកហ្វេសប៊ុកមួយចំនួន បានផ្សាយថា គ្រោះថ្នាក់ម៉ូតូបុករថយន្ត Prius បណ្ដាលឲ្យស្ត្រីម្នាក់បាត់បង់ជីវិត។ តាមការស្រាវជ្រាវជាក់ស្តែងរបស់សមត្ថកិច្ច បញ្ជាក់ថា ព័ត៌មាននោះ មិនពិត ទេ។

ហេតុការណ៍នេះ បានកើតឡើងនៅវេលាម៉ោងប្រមាណ២០:២៥នាទីយប់ថ្ងៃទី១៧ ខែមេសា ឆ្នាំ២០២៦ លើកំណាត់ផ្លូវជាតិលេខ៤ ចន្លោះគីឡូម៉ែត្រ ២០-២១ ស្ថិតក្នុងភូមិព្រៃទន្លាប់ ឃុំបែកចាន។ ជាក់ស្តែង គឺជាការប៉ះទង្គិចរវាងម៉ូតូ Honda Dream C125 និងរថយន្ត Toyota Prius បណ្តាលឲ្យមានអ្នករងរបួសធ្ងន់ម្នាក់ និងស្រាលម្នាក់ ខណៈយានយន្តទាំងពីរខូចខាតតិចតួច។

តាមរបាយការណ៍ សមត្ថកិច្ចបញ្ជាក់ថា មូលហេតុសំខាន់គឺបណ្តាលមកពី ការបើកបរបញ្ច្រាស់ទិសចរាចរណ៍ របស់ម៉ូតូ ដែលធ្វើឲ្យបុកចំពីមុខរថយន្តដែលកំពុងបត់ចូលផ្លូវជាតិ។ បន្ទាប់ពីកើតហេតុ ជនរងគ្រោះត្រូវបានបញ្ជូនទៅសង្គ្រោះបន្ទាន់ និងបច្ចុប្បន្នកំពុងសម្រាកព្យាបាលនៅមន្ទីរពេទ្យព្រះកុសុមៈ មិនមានការស្លាប់ដូចការចែកចាយលើបណ្ដាញសង្គមឡើយ។

ការបំភ្លឺនេះ បង្ហាញពីតួនាទីសំខាន់របស់អាជ្ញាធរ ក្នុងការឆ្លើយតបព័ត៌មានឆាប់រហ័ស ដើម្បីទប់ស្កាត់ព័ត៌មានមិនពិត។ ទោះជាយ៉ាងណា វាក៏ជាការរំលឹកដល់ម្ចាស់គណនីបណ្ដាញសង្គម និងអ្នកសារព័ត៌មានខ្លះៗថា គួរត្រូវមាន វិជ្ជាជីវៈ និងក្រមសីលធម៌ ក្នុងការផ្សព្វផ្សាយ ដោយផ្ទៀងផ្ទាត់ប្រភពឲ្យបានច្បាស់ មុននឹងចែករំលែកទៅសាធារណៈ។

ជាមួយគ្នានេះផងដែរ សាធារណជនត្រូវបានអំពាវនាវឲ្យបង្កើនការប្រុងប្រយ័ត្នក្នុងការបើកបរ គោរពច្បាប់ចរាចរណ៍ ជាពិសេសការបើកបរតាមទិសដៅត្រឹមត្រូវ ដើម្បីជៀសវាងគ្រោះថ្នាក់អាចកើតឡើងដោយមិនគិតទុកជាមុន៕