ខេត្តកណ្តាលព្រមានជាថ្មី! សំណង់លើដីចំណីផ្លូវ នឹងត្រូវរុះរើ ដោយមិនទទួលខុសត្រូវ

(កណ្ដាល)៖ នៅថ្ងៃទី២០ ខែមេសា ឆ្នាំ២០២៦នេះ រដ្ឋបាលខេត្តកណ្តាលបានចេញសេចក្តីជូនដំណឹងលើកទី២ ដើម្បីពង្រឹងការហាមឃាត់ និងទប់ស្កាត់សកម្មភាពសាងសង់សំណង់ខុសច្បាប់ ការលក់ដូរ ការធ្វើអាជីវកម្ម និងការដាក់ផ្ទាំងផ្សាយពាណិជ្ជកម្មគ្មានអនុញ្ញាត លើដីចំណីផ្លូវសាធារណៈ ក្នុងភូមិសាស្ត្រខេត្តទាំងមូល។

យោងតាមគោលការណ៍ច្បាប់ និងលិខិតបទដ្ឋានជាច្រើន រដ្ឋបាលខេត្តបានបញ្ជាក់ថា បើទោះបីមានការជូនដំណឹងលើកទី១កន្លងមកក៏ដោយ ក៏នៅតែមានប្រជាពលរដ្ឋ និងអាជីវករមួយចំនួនបន្តរំលោភលើដីចំណីផ្លូវ ដោយសាងសង់សំណង់រឹង បើកអាជីវកម្ម ឬដាក់តាំងទំនិញលើចិញ្ចើមផ្លូវ ដែលបណ្តាលឱ្យបាត់បង់សោភណភាពទីក្រុង បង្កការកកស្ទះចរាចរណ៍ និងប៉ះពាល់ដល់សុវត្ថិភាពសាធារណៈ។

អាជ្ញាធរបានពន្យល់ថា សកម្មភាពទាំងនេះមិនត្រឹមតែបង្កឧបសគ្គដល់ការធ្វើដំណើររបស់ប្រជាពលរដ្ឋទេ ប៉ុន្តែថែមទាំងរារាំងដល់ប្រតិបត្តិការសង្គ្រោះបន្ទាន់ ដូចជា រថយន្តពន្លត់អគ្គិភ័យ និងរថយន្តសង្គ្រោះជីវិត ព្រមទាំងប៉ះពាល់ដល់គម្រោងពង្រីកផ្លូវ និងអភិវឌ្ឍន៍ហេដ្ឋារចនាសម្ព័ន្ធនៅថ្ងៃអនាគត។

យោងតាមច្បាប់ស្តីពីផ្លូវថ្នល់ ឆ្នាំ២០១៤ មាត្រា៧១ និង៧៤ ការសាងសង់ ឬទន្ទ្រានលើដីផ្លូវសាធារណៈ អាចនាំឱ្យប្រឈមទណ្ឌកម្មទាំងពិន័យ និងពន្ធនាគារ ប្រសិនបើមិនគោរពតាមការណែនាំរបស់អាជ្ញាធរ។

ក្នុងន័យនេះ រដ្ឋបាលខេត្តបានដាក់ចេញវិធានការច្បាស់លាស់ រួមមាន ការបញ្ឈប់សកម្មភាពសាងសង់ និងលក់ដូរលើដីចំណីផ្លូវ ការរុះរើសំណង់ដោយស្ម័គ្រចិត្ត និងការត្រៀមអនុវត្តវិធានការរដ្ឋបាលចំពោះអ្នកមិនសហការ ដោយមិនទទួលខុសត្រូវលើការខូចខាតទ្រព្យសម្បត្តិ។

សាធារណជនបានលើកឡើងថា ការចេញសេចក្តីជូនដំណឹងលើកទី២នេះ បង្ហាញពីការប្តេជ្ញារបស់អាជ្ញាធរក្នុងការរៀបចំសណ្តាប់ធ្នាប់សាធារណៈ និងធានាសុវត្ថិភាពសង្គម៕