មូលដ្ឋានជាអាទិភាព! លោក ម៉េង ស្រ៊ុន ជំរុញដោះស្រាយបញ្ហាពលរដ្ឋដោយផ្ទាល់

(កំពង់ស្ពឺ)៖ លោក ម៉េង ស្រ៊ុន សមាជិកអចិន្ត្រៃយ៍នៃគណៈកម្មាធិការគណបក្សខេត្តកំពង់ស្ពឺ និងជាប្រធានក្រុមការងារគណបក្សចុះមូលដ្ឋានឃុំអមលាំងបានអញ្ជើញជាអធិបតីភាពដឹកនាំកិច្ចប្រជុំបូកសរុបលទ្ធផលការងារប្រចាំខែមីនា និងលើកទិសដៅអនុវត្តបន្តសម្រាប់ខែមេសា ឆ្នាំ២០២៦ នៅឃុំអមលាំង ស្រុកថ្ពង។

កិច្ចប្រជុំបានប្រព្រឹត្តទៅកាលពីព្រឹកថ្ងៃទី១២ ខែមេសា ឆ្នាំ២០២៦ ដោយមានការចូលរួមពីក្រុមការងារថ្នាក់ខេត្ត ស្រុក ឃុំ និងសាខាបក្សភូមិ ព្រមទាំងប្រជាពលរដ្ឋមួយចំនួនដែលបានមកទទួលសេវារដ្ឋបាលផងដែរ។ មុនចាប់ផ្តើមកម្មវិធី អង្គពិធីបានគោរពទង់ជាតិ ទង់បក្ស និងគោរពវិញ្ញាណក្ខន្ធយ៉ាងគោរពតាមប្រពៃណី។

ក្នុងឱកាសនោះ លោក ទួន ផាវ ប្រធានគណបក្សឃុំអមលាំង បានធ្វើរបាយការណ៍សង្ខេបអំពីសកម្មភាពការងារកន្លងមក ព្រមទាំងលើកឡើងបញ្ហាប្រឈម និងសំណូមពរជូនដល់ថ្នាក់ដឹកនាំដើម្បីពិនិត្យដោះស្រាយ។

លោក ម៉េង ស្រ៊ុន បានអនុញ្ញាតឱ្យក្រុមការងារនានាបង្ហាញមតិយោបល់ និងលើកយកបញ្ហាជាក់ស្តែងរបស់ប្រជាពលរដ្ឋ ដោយផ្តោតលើការសម្របសម្រួលដោះស្រាយតាមជំនាញឱ្យបានទាន់ពេលវេលា។ លោកក៏បានបន្តជំរុញយុទ្ធនាការធ្វើ និងបន្តសុពលភាពអត្តសញ្ញាណប័ណ្ណជូនប្រជាពលរដ្ឋនៅក្នុងឃុំអមលាំង ដែលមានចំនួន ១៧ភូមិ ដើម្បីធានាថាពលរដ្ឋទទួលបានសេវារដ្ឋបាលគ្រប់គ្រាន់ និងត្រឹមត្រូវតាមបច្ចេកទេស។

ជាមួយគ្នានេះ លោកបានថ្លែងអំណរគុណ និងកោតសរសើរដល់ក្រុមការងារគ្រប់លំដាប់ថ្នាក់ ដែលបានខិតខំប្រឹងប្រែងបម្រើប្រជាពលរដ្ឋ ជាពិសេសក្នុងយុទ្ធនាការធ្វើអត្តសញ្ញាណប័ណ្ណ និងការងាររដ្ឋបាលផ្សេងៗ។

ក្នុងនាមជាការលើកទឹកចិត្ត លោក ម៉េង ស្រ៊ុន បានប្រគល់ថវិកាចំនួន ៥,១៧០,០០០រៀល សម្រាប់ធ្វើប័ណ្ណសមាជិកបក្សជូនសមាជិកចំនួន ៦,៩៩៦នាក់ ព្រមទាំងប្រគល់ឯកសារកែតម្រូវអត្រានុកូលដ្ឋាន និងអត្តសញ្ញាណប័ណ្ណជូនប្រជាពលរដ្ឋចំនួន ១៣នាក់។

លើសពីនេះ ក្រុមការងារចំនួន៥១នាក់ ក៏ទទួលបានគ្រឿងឧបភោគបរិភោគ និងថវិកាជាការលើកទឹកចិត្ត បង្ហាញពីការយកចិត្តទុកដាក់ដល់កម្លាំងនៅមូលដ្ឋាន។

ទន្ទឹមគ្នានោះ លោកបានជូនពរដល់ក្រុមការងារទាំងអស់ឲ្យទទួលបានពុទ្ធពរទាំងបួនប្រការ គឺ អាយុ វណ្ណៈ សុខៈ និងពលៈ ដើម្បីបន្តបំពេញភារកិច្ចបម្រើប្រជាពលរដ្ឋឲ្យកាន់តែប្រសើរឡើង៕