ពលរដ្ឋទាមទារបកស្រាយ និងស្នើបណ្ឌិត ម៉ុង រិទ្ធី ជួយតាមដាន៖ ករណីកាប់ដើមអាកាស្យាជិតភ្នំជីសូរ មានអ្នកទទួលខុសត្រូវឬទេ?

(តាកែវ)៖ ករណីកាប់ដើមអាកាស្យាចាស់ៗជាច្រើនម៉ឺនដើម នៅតំបន់ខាងកើតភ្នំជីសូរ ខេត្តតាកែវ កំពុងបង្កការចាប់អារម្មណ៍ និងជជែកគ្នាយ៉ាងទូលំទូលាយ ពាក់ព័ន្ធនឹងតួនាទី និងការទទួលខុសត្រូវរបស់អាជ្ញាធរ និងស្ថាប័នពាក់ព័ន្ធ។

បើយោងតាមការលើកឡើងរបស់ ឯកឧត្តមបណ្ឌិត ម៉ុង ឫទ្ធី ក្នុងដំណើរទស្សនកិច្ចត្រឡប់ទៅស្រុកកំណើត កាលពីថ្ងៃទី១៨ ខែមេសា ឆ្នាំ២០២៦ បានបញ្ជាក់ថា ដើមអាកាស្យាប្រមាណជាង៦ម៉ឺនដើម ដែលត្រូវបានដាំចាប់ពីឆ្នាំ១៩៩៥-១៩៩៦ បច្ចុប្បន្នស្ទើរតែបាត់អស់ ដោយនៅសល់តែគល់ បង្កជាសំណួរថា តើឈើទាំងនោះត្រូវបានដុតចោល ឬលក់ និងអ្នកណាជាអ្នកទទួលខុសត្រូវលើការគ្រប់គ្រងធនធានទាំងនេះ។

អ្វីដែលបង្កការព្រួយបារម្ភបន្ថែម គឺការឆ្លើយតបពីអាជ្ញាធរមូលដ្ឋានមួយចំនួន ដែលបានបញ្ជាក់ថា “មិនដឹង” អំពីករណីនេះ ខណៈទំហំនៃការកាប់ឈើមានច្រើន និងមិនអាចកើតឡើងដោយគ្មានការយល់ឃើញពីអ្នកពាក់ព័ន្ធឡើយ។

ជាក់ស្តែង ការអភិវឌ្ឍន៍ហេដ្ឋារចនាសម្ព័ន្ធ ដូចជាការបើកផ្លូវ និងការកែលម្អប្រឡាយទឹក ត្រូវបានគេមើលឃើញថាមានភាពចាំបាច់ ប៉ុន្តែការអភិវឌ្ឍន៍គួរត្រូវអនុវត្តដោយមានតម្លាភាព គោរពច្បាប់ និងរក្សាតម្លៃធនធានធម្មជាតិជាអាទិភាព។

សាធារណជនបានលើកឡើងថា ករណីនេះ មិនត្រឹមតែជាបញ្ហាបាត់បង់ធនធានបរិស្ថានប៉ុណ្ណោះទេ ប៉ុន្តែថែមទាំងជាបញ្ហាគំរូសង្គម ដែលអាចប៉ះពាល់ដល់ការយល់ដឹងរបស់យុវជនជំនាន់ក្រោយ ប្រសិនបើមិនមានការបកស្រាយច្បាស់លាស់ និងចាត់វិធានការត្រឹមត្រូវ។

ក្នុងបរិបទនេះ សាធារណជនកំពុងរង់ចាំការឆ្លើយតបពីអាជ្ញាធរខេត្តតាកែវ និងស្ថាប័នពាក់ព័ន្ធ ដើម្បីបំភ្លឺការពិត កំណត់អ្នកទទួលខុសត្រូវ និងធានាថា ការអភិវឌ្ឍន៍នាពេលអនាគត នឹងធ្វើឡើងក្នុងបរិយាកាសមានច្បាប់ តម្លាភាព និងចីរភាព។

ករណីនេះ បង្ហាញយ៉ាងច្បាស់ថា ការរក្សាតុល្យភាពរវាង “អភិវឌ្ឍន៍” និង “ការពារ” គឺជាកត្តាសំខាន់ ដែលត្រូវការការចូលរួមយ៉ាងសកម្មពីគ្រប់ភាគី ដើម្បីថែរក្សាមូលដ្ឋានធនធានជាតិឲ្យបានយូរអង្វែង។

មហាជនក៏ស្នើសុំដល់ឯកឧត្តមបណ្ឌិត ម៉ុង ឫទ្ធី ឲ្យជួយស្រាវជ្រាវ តាមដាន រកឲ្យឃើញក្រុមមនុស្សដែលបានកាប់ដើមអាកាស្យាជាង៦០០០០ដើមដើម្បីផ្ដន្ទាទោសតាមច្បាប់ឲ្យបានតឹងរ៉ឹងផង៕