ដើមអាកាស្យា៦ម៉ឺនដើម «បាត់សល់តែគល់» សំណួររបស់ឯកឧត្តមបណ្ឌិត មុង រិទ្ធី ទៅកាន់អាជ្ញាធរ តើអ្នកណាត្រូវឆ្លើយ?

(តាកែវ)៖ ការបង្ហោះរបស់ឯកឧត្តមបណ្ឌិត ម៉ុង រិទ្ធី នៅព្រឹកថ្ងៃទី១៨ ខែមេសា ឆ្នាំ២០២៦ បានបង្កើតការចាប់អារម្មណ៍ខ្លាំងពីសាធារណជន បន្ទាប់ពីលោកត្រលប់ទៅលេងស្រុកកំណើត និងឡើងដល់ ប្រាសាទភ្នំជីសូរ ដែលជាកន្លែងមានអតីតបទពិសោធន៍ឈឺចាប់ក្នុងសម័យសង្គ្រាម។

ក្រៅពីការរំលឹកអតីតកាល លោកក៏បានចុះពិនិត្យស្ថានភាពហេដ្ឋារចនាសម្ព័ន្ធ និងគម្រោងដែលលោកធ្លាប់ចូលរួមសាងសង់ក្នុងឆ្នាំ១៩៩៥-១៩៩៦ ដែលរហូតដល់ពេលនេះមានអាយុកាល៣១ឆ្នាំ។

ទោះជាយ៉ាងណា អ្វីដែលធ្វើឲ្យលោកមានចម្ងល់ធំបំផុត គឺដើមអាកាស្យាប្រមាណជាង៦ម៉ឺនដើម ដែលលោកធ្លាប់ដាំ ត្រូវបានរកឃើញថា «នៅសល់តែគល់» នៅសល់តែគល ប៉ុណ្ណោះ។

សំណួរដែលបានលើកឡើង មិនមែនជាការបដិសេធការអភិវឌ្ឍន៍ទេ ប៉ុន្តែជាការទាមទារតម្លាភាព៖ តើដើមឈើទាំងនោះត្រូវបានកាប់ដុត ឬលក់? ប្រសិនបើលក់ តើអ្នកណាជាអ្នកសម្រេច និងប្រាក់ចំណូលទៅណា? សំណួរទាំងនេះ មិនត្រឹមតែជាការស្វែងរកចម្លើយផ្ទាល់ខ្លួនទេ ប៉ុន្តែជាការចង់ឲ្យមានគំរូល្អសម្រាប់ជំនាន់ក្រោយ។

បន្ថែមពីនេះ ប្រភពពីពលរដ្ឋក៏បានលើកឡើងដល់តួនាទីរបស់លោក កៅ វគ្គសែល អភិបាលស្រុកសំរោង ដែលត្រូវបានស្នើឲ្យចេញមុខបកស្រាយច្បាស់លាស់ ពាក់ព័ន្ធនឹងការបាត់បង់ធនធានធម្មជាតិ និងការគ្រប់គ្រងទ្រព្យសម្បត្តិសាធារណៈក្នុងតំបន់។

ប្រភពផ្សេងទៀតបានលើកឡើងថា បញ្ហានេះបង្ហាញពីតម្រូវការដ៏ចាំបាច់នៃការគ្រប់គ្រងមានគណនេយ្យភាព និងការបង្ហាញព័ត៌មានជាសាធារណៈ។ ការអភិវឌ្ឍន៍មិនគួរត្រូវបានយកមកធ្វើជាអធិប្បាយគ្របដណ្តប់លើការបាត់បង់ធនធានដោយគ្មានការពន្យល់ឡើយ។

សំណួរនេះមិនគ្រាន់តែជាការសួររបស់មនុស្សម្នាក់ ប៉ុន្តែជាសំឡេងមួយដែលរំលឹកដល់អាជ្ញាធរថា នៅសល់តែគល់ «ការអភិវឌ្ឍន៍ត្រូវដើរជាមួយតម្លាភាព និងទំនួលខុសត្រូវ» មិនមែនទុកសំណួរឲ្យសង្គមសង្ស័យបន្តទៀតឡើយ៕