ក្មេងទំនើងវាយគប់រថយន្ត «អាវតា០៧» កណ្ដាលក្រុង! នគរបាលខណ្ឌដូនពេញចាប់ខ្លួនបាន៦នាក់ បន្តតាមរកបក្ខពួក

(ភ្នំពេញ)៖ ក្រុមក្មេងទំនើងដែលធ្វើសកម្មភាពហិង្សាវាយ និងគប់រថយន្តមួយគ្រឿងម៉ាកអាវតា០៧ ស៊េរីឆ្នាំ២០២៥ ពណ៌ខ្មៅ បណ្ដាលឲ្យរងការខូចខាត បន្ទាប់ពីមានជម្លោះពាក់ព័ន្ធគ្រោះថ្នាក់ចរាចរណ៍ជាមួយម៉ូតូ ត្រូវបានកម្លាំងនគរបាលជំនាញធ្វើការស្រាវជ្រាវ និងឃាត់ខ្លួនបានចំនួន៦នាក់ហើយ។

ប្រតិបត្តិការនេះ អនុវត្តតាមបទបញ្ជាដ៏តឹងរឹងរបស់លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ដោយមានការដឹកនាំផ្ទាល់ពីលោកឧត្តមសេនីយ៍ត្រី ប៊ុន សត្យា និងលោកឧត្តមសេនីយ៍ទោ លី ប៊ុនអេង រួមជាមួយលោកវរសេនីយ៍ឯក ម៉ម សាវ៉ុន បានដឹកនាំកម្លាំងជំនាញ សហការជាមួយអធិការដ្ឋាននគរបាលខណ្ឌដូនពេញ ចុះបង្ក្រាបយ៉ាងសកម្ម។

ហេតុការណ៍នេះកើតឡើងនៅវេលាម៉ោងប្រមាណ៧៖៣៧នាទីយប់ ថ្ងៃទី១៦ ខែមេសា ឆ្នាំ២០២៦ នៅចំណុចមុខហាងម៉ាស្សា «ម៉ាយូរ៉ា» តាមបណ្ដោយផ្លូវលេខ៤៧ សង្កាត់ស្រះចក ខណ្ឌដូនពេញ រាជធានីភ្នំពេញ។

ជនសង្ស័យទាំង៦នាក់ សុទ្ធតែជាក្មេងវ័យក្មេង ដែលបានរួមគ្នាបង្កហិង្សាដោយចេតនា មានស្ថានទម្ងន់ទោស ដោយប្រើដុំថ្មវាយ និងគប់បំផ្លាញរថយន្តរបស់ជនរងគ្រោះ។ ក្នុងនោះ សមត្ថកិច្ចបានដកហូតវត្ថុតាង រួមមានដុំថ្មចំនួន៤ដុំ និងផ្លាកលេខរថយន្ត១បន្ទះ។

បច្ចុប្បន្ន ជនសង្ស័យត្រូវបាននាំខ្លួនទៅសាកសួរនៅអង្គភាពជំនាញ ដើម្បីចាត់ការតាមនីតិវិធីច្បាប់ ខណៈសមត្ថកិច្ចក៏កំពុងបន្តស្វែងរកបក្ខពួកពាក់ព័ន្ធផ្សេងទៀត ដើម្បីយកមកទទួលខុសត្រូវចំពោះមុខច្បាប់។

ករណីនេះ បង្ហាញឲ្យឃើញពីបញ្ហាក្មេងទំនើងនៅតំបន់ទីក្រុង ដែលត្រូវការការចូលរួមពីគ្រួសារ សាលារៀន និងអាជ្ញាធរ ក្នុងការអប់រំ និងទប់ស្កាត់ មិនឲ្យបន្តកើតមានសកម្មភាពហិង្សាដែលប៉ះពាល់ដល់សន្តិសុខសង្គម៕