កម្លាំងអាវុធហត្ថកំពង់ស្ពឺបន្តរឹតបន្តឹងសន្តិសុខថ្ងៃចុងក្រោយ «កំពង់ស្ពឺសង្ក្រាន្ត ២០២៦» ធានាសុវត្ថិភាពពេញលេញជូនពលរដ្ឋ និងភ្ញៀវទេសចរ

(កំពង់ស្ពឺ)៖ ថ្ងៃទី១៦ ខែមេសា ឆ្នាំ២០២៦ ខណៈដែលកម្មវិធី «កំពង់ស្ពឺសង្ក្រាន្ត ២០២៦» កំពុងឈានដល់ថ្ងៃបញ្ចប់ នៃពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំមមី អដ្ឋស័ក ព.ស.២៥៧០ ការងារពង្រឹងសន្តិសុខ សុវត្ថិភាព និងសណ្ដាប់ធ្នាប់សាធារណៈ ត្រូវបានអនុវត្តយ៉ាងម៉ឺងម៉ាត់។

ក្នុងឱកាសនេះ មន្ត្រីទទួលខុសត្រូវបានចុះត្រួតពិនិត្យស្ថានភាពជាក់ស្តែងលើកម្លាំងកងរាជអាវុធហត្ថខេត្តកំពង់ស្ពឺ ដែលកំពុងឈរជើងអនុវត្តភារកិច្ចការពារ និងរក្សាសុវត្ថិភាពជូនប្រជាពលរដ្ឋ ក៏ដូចជាភ្ញៀវទេសចរណ៍ជាតិ និងអន្តរជាតិ ដែលបានមកចូលរួមកម្សាន្តយ៉ាងច្រើនកុះករ។

ជាមួយគ្នានេះ លោកឧត្ដមសេនីយ៍ត្រី ម៉េង ស៊្រុន មេបញ្ជាការកងរាជអាវុធហត្ថខេត្តកំពង់ស្ពឺក៏បានធ្វើការណែនាំ និងលើកទឹកចិត្តដល់កម្លាំងទាំងអស់ បន្តអនុវត្តតួនាទីដោយមានវិន័យខ្ពស់ ស្មារតីទទួលខុសត្រូវ និងការយកចិត្តទុកដាក់យ៉ាងម៉ឺងម៉ាត់ ដើម្បីធានាថា បរិយាកាសទូទៅមានសុវត្ថិភាព រលូន និងមានសណ្ដាប់ធ្នាប់ល្អ រហូតដល់បញ្ចប់កម្មវិធី។

ទន្ទឹមនោះ លោកឧត្ដមសេនីយ៍ត្រីក៏បានសម្តែងការអបអរសាទរ និងជូនពរដល់កម្លាំងទាំងអស់ សូមមានសុខភាពល្អ សុវត្ថិភាព និងជោគជ័យក្នុងការបំពេញភារកិច្ចជាបន្តបន្ទាប់៕