«កោះកុងក្លាយជាទីលានល្បែងស៊ីសង?» អាជ្ញាធរនៅឯណា ខណៈប្រជាពលរដ្ឋរាយការណ៍លេងអាណាធិបតេយ្យរាប់ឆ្នាំ!(មានVideos)
(កោះកុង)៖ ខេត្តកោះកុង ត្រូវបានប្រជាពលរដ្ឋក្នុងមូលដ្ឋានរាយការណ៍ថា កំពុងក្លាយជាតំបន់មានការរីករាលដាលនៃល្បែងស៊ីសងខុសច្បាប់យ៉ាងអាណាធិបតេយ្យ ដោយគ្មានសកម្មភាពបង្ក្រាបឲ្យមានប្រសិទ្ធភាពពីសំណាក់អាជ្ញាធរមូលដ្ឋាន។
ប្រភពពីប្រជាពលរដ្ឋបានឲ្យដឹងថា ល្បែងស៊ីសងដែលកំពុងដំណើរការយ៉ាងសកម្មរួមមាន អាប៉ោង មាន់ជល់ ដែលត្រូវបានលេងយ៉ាងបើកចំហរ ស្ទើរតែគ្រប់ឃុំ និងគ្រប់ស្រុក។ ជាពិសេស តំបន់ដូចជា កោះស្ដេច ដំណាក់ក្របី កើតវង្ស បុរីសាគរ ថ្មស ស្រែអំបិល និងអណ្ដូងទឹក ត្រូវបានរាយការណ៍ថា មានសកម្មភាពខ្លាំងជាងគេ ក្នុងនោះអណ្ដូងទឹកត្រូវបានគេពិពណ៌នាថា “ក្តៅ” ជាងគេ។
ប្រជាពលរដ្ឋបន្តថា សកម្មភាពជល់មាន់ និងល្បែងផ្សេងៗបានបន្តអស់រយៈពេលរាប់ខែ រហូតដល់រាប់ឆ្នាំ ដោយគ្មានការរារាំង ឬបង្ក្រាបយ៉ាងតឹងរឹង។ ជាពិសេស នៅថ្ងៃសៅរ៍ និងថ្ងៃអាទិត្យ សកម្មភាពល្បែងកាន់តែមានភាពច្រើន និងអ៊ូអរ។
បញ្ហានេះបានបង្កការព្រួយបារម្ភយ៉ាងខ្លាំងចំពោះសុវត្ថិភាពសង្គម និងសណ្តាប់ធ្នាប់សាធារណៈ ព្រោះល្បែងស៊ីសងជាដើមហេតុនាំឲ្យកើតមានបទល្មើសផ្សេងៗ ដូចជា អំពើហិង្សា បំណុល និងអសន្តិសុខក្នុងសហគមន៍។
ប្រជាពលរដ្ឋស្នើសុំឲ្យអាជ្ញាធរពាក់ព័ន្ធ ជាពិសេសកម្លាំងសមត្ថកិច្ចក្នុងខេត្តកោះកុង(លោកស្រី ឈី វ៉ា អភិបាលខេត្តកោះកុង, លោកឧត្តមសេនីយ៍ទោ គង់ មនោ ស្នងការនគរបាលខេត្ត និងលោកឧត្តមសេនីយ៍ត្រី តាំង ឈុនស្រេង មេបញ្ជាការកងរាជអាវុធហត្ថខេត្ត) ពង្រឹងការត្រួតពិនិត្យ និងអនុវត្តច្បាប់ឲ្យមានប្រសិទ្ធភាព ដើម្បីទប់ស្កាត់ និងបញ្ឈប់សកម្មភាពល្បែងស៊ីសងខុសច្បាប់ទាំងនេះឲ្យបានទាន់ពេលវេលា។
ការអនុវត្តច្បាប់យ៉ាងម៉ឺងម៉ាត់ និងស្មើភាព គឺជាគន្លឹះសំខាន់ក្នុងការធានាសន្តិសុខ និងសុភមង្គលរបស់ប្រជាពលរដ្ឋក្នុងមូលដ្ឋាន៕
