បំភ្លឺច្បាស់ហើយ! មិនមែនស្នងការរងទេ! អតីតស្នងការរង ត្រូវបានបន្ថយឋានៈ ហើយឃាត់ខ្លួនពាក់ព័ន្ធករណីកំហែងយកប្រាក់

(កណ្តាល)៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្ដាល បានចេញសេចក្តីបញ្ជាក់ជាផ្លូវការ ដើម្បីកែតម្រូវព័ត៌មានមួយចំនួនដែលកំពុងចែកចាយលើបណ្តាញសារព័ត៌មាន និងបណ្ដាញសង្គម ពាក់ព័ន្ធនឹងករណីឃាត់ខ្លួនមន្ត្រីនគរបាលម្នាក់។

តាមការបញ្ជាក់បានឲ្យដឹងថា បុគ្គលដែលត្រូវបានឃាត់ខ្លួន មិនមែនជាស្នងការរងនគរបាលខេត្តកណ្ដាលបច្ចុប្បន្ននោះទេ ប៉ុន្តែជាអតីតស្នងការរង គឺលោកឧត្តមសេនីយ៍ត្រី អ៊ុល ប៊ុណ្ណា។ បច្ចុប្បន្ន លោកត្រូវបានបន្ថយឋានន្តរសក្កិមកជា វរសេនីយ៍ឯក និងមានតួនាទីជាមន្ត្រី បន្ទាប់ពីបានល្មើសវិន័យកងកម្លាំងនគរបាលជាតិ។

ប្រភពដដែលបន្តថា ជនពាក់ព័ន្ធត្រូវបានកម្លាំងសមត្ថកិច្ចចាប់ឃាត់ខ្លួនក្នុងបទល្មើសជាក់ស្តែង និងបានកសាងសំណុំរឿងបញ្ជូនទៅអយ្យការអមសាលាដំបូងខេត្តកណ្ដាល ដើម្បីចាត់ការតាមនីតិវិធីច្បាប់ ពាក់ព័ន្ធករណីកំហែងយកប្រាក់ពីភាគីពាក់ព័ន្ធ។

ហេតុការណ៍នេះ បានកើតឡើងនៅថ្ងៃទី១៣ ខែមេសា ឆ្នាំ២០២៦ វេលាម៉ោងប្រហែល ១៧ និង ៣០នាទី នៅចំណុចការដ្ឋានសំណង់មួយ ស្ថិតក្នុងភូមិកំពង់ថ្កុល សង្កាត់សំពៅពូន ក្រុងសំពៅពូន ខេត្តកណ្ដាល។

បច្ចុប្បន្ន ចៅក្រមស៊ើបសួរ បានចេញដីកាបង្គាប់ឲ្យឃុំខ្លួនជនសង្ស័យ ដាក់ពន្ធនាគារជាបណ្តោះអាសន្នរួចហើយ ខណៈនីតិវិធីច្បាប់កំពុងបន្តអនុវត្ត។

អាជ្ញាធរអំពាវនាវដល់សាធារណជន និងបណ្តាញសារព័ត៌មានទាំងអស់ សូមយកចិត្តទុកដាក់ពិនិត្យប្រភពព័ត៌មានឲ្យបានច្បាស់លាស់ មុនធ្វើការចែកចាយ ដើម្បីជៀសវាងការភាន់ច្រឡំ និងការប៉ះពាល់ដល់កិត្តិយសស្ថាប័ន៕