ព្រៃឡង់កំពុងប្រឈមហានិភ័យ? មេឃុំចេញលិខិតអនុញ្ញាតដឹកឈើ ត្រូវមន្ត្រីជំនាញពិនិត្យ

(កំពង់ធំ)៖ មន្ត្រីជំនាញនៃក្រសួងបរិស្ថាន កំពុងចុះពិនិត្យ និងបើកការស្រាវជ្រាវលម្អិត លើករណីមេឃុំសុចិត្រ ស្រុកសណ្ដាន់ ខេត្តកំពង់ធំ ដែលត្រូវបានរាយការណ៍ថា បានចេញលិខិតអនុញ្ញាតឱ្យមានការដឹកជញ្ជូនឈើ ចេញពីតំបន់ការពារធម្មជាតិ «ព្រៃឡង់»។

តាមសេចក្តីរាយការណ៍ ការចេញលិខិតអនុញ្ញាតនេះ ត្រូវបានធ្វើឡើងបន្ទាប់ពីមានការស្នើសុំដោយបុគ្គលម្នាក់ឈ្មោះ វង ទ្រី រស់នៅភូមិក្រាំង ឃុំសុចិត្រ ដើម្បីដឹកជញ្ជូនឈើពីភូមិស្រែព្រីង ទៅកាន់ភូមិក្រាំង ក្នុងគោលបំណងសាងសង់លំនៅឋាន។ ទោះជាយ៉ាងណា តំបន់ដែលបានរាយការណ៍ថាមានការកាប់ និងដឹកឈើ គឺស្ថិតនៅក្នុងដែនជម្រកសត្វព្រៃព្រៃឡង់ ដែលជាតំបន់ការពារដ៏សំខាន់មួយ។

ជុំវិញបញ្ហានេះ ក្រសួងបរិស្ថាន បានបញ្ជាក់ថា កំពុងអនុវត្តវិធានការច្បាប់យ៉ាងតឹងរឹង ដោយចាត់ឱ្យមន្ត្រីជំនាញចុះពិនិត្យ ស្រាវជ្រាវ និងប្រមូលភស្តុតាង ដើម្បីកំណត់ភាពត្រឹមត្រូវនៃព័ត៌មាន និងចាត់វិធានការតាមផ្លូវច្បាប់ ប្រសិនបើរកឃើញថាមានបទល្មើសពិតប្រាកដ។

មហាជនបានលើកឡើងថា ការចេញលិខិតអនុញ្ញាតដែលពាក់ព័ន្ធនឹងធនធានធម្មជាតិ គួរត្រូវបានអនុវត្តយ៉ាងម៉ត់ចត់ និងស្របច្បាប់ ព្រោះបើមានការធ្វេសប្រហែស អាចបង្កឱ្យមានការបំពានលើតំបន់ការពារ និងប៉ះពាល់ដល់បរិស្ថានយ៉ាងធ្ងន់ធ្ងរ។

អ្នកជំនាញថា អាជ្ញាធរមូលដ្ឋានគួរត្រូវបានពង្រឹងការយល់ដឹងច្បាប់ពាក់ព័ន្ធ និងកំណត់តួនាទីឲ្យច្បាស់ ក្នុងការចេញលិខិតពាក់ព័ន្ធនឹងធនធានធម្មជាតិ ដើម្បីជៀសវាងការយល់ច្រឡំ ឬការប្រើប្រាស់អំណាចលើសសិទ្ធិ។

ករណីនេះ កំពុងក្លាយជាចំណាប់អារម្មណ៍សាធារណៈ ខណៈប្រជាពលរដ្ឋ និងសង្គមស៊ីវិល រំពឹងថា ការស្រាវជ្រាវនឹងត្រូវអនុវត្តដោយតម្លាភាព និងយុត្តិធម៌ ដើម្បីការពារធនធានធម្មជាតិ និងរក្សាទំនុកចិត្តលើការអនុវត្តច្បាប់៕