សន្តិសុខរឹងមាំល្អប្រសើរ! កម្លាំងនគរបាលខេត្តកណ្ដាលការពារពិធីនគរសង្គ្រាន្ត២០២៦ ឲ្យប្រព្រឹត្តទៅដោយរលូន និងសុវត្ថិភាពខ្ពស់

(កណ្ដាល)៖ នៅថ្ងៃទី១ នៃពិធីនគរសង្គ្រាន្តឆ្នាំ២០២៦ ខេត្តកណ្ដាល កម្លាំងនគរបាលខេត្តកណ្ដាល ក្រោមការដឹកនាំយ៉ាងម៉ឺងម៉ាត់ និងមានប្រសិទ្ធភាពពីលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តបានបំពេញភារកិច្ចការពារសន្តិសុខ សណ្ដាប់ធ្នាប់ និងសុវត្ថិភាពសាធារណៈបានយ៉ាងល្អប្រសើរ បង្កើតបរិយាកាសមានរបៀបរៀបរយ និងសុខសាន្តជូនប្រជាពលរដ្ឋ។ នេះបើតាមការបញ្ជាក់របស់លោកឧត្ដមសេនីយ៍ត្រី ឡាក់ ម៉េងធី ស្នងការរងទទួលផែនការងារព្រហ្មទណ្ឌនិងជាអ្នកនាំពាក្យនៃស្នងការដ្ឋាននគរបាលខេត្តកណ្តាល។

លោកឧត្តមសេនីយ៍ ឡាក់ ម៉េងធី បានឲ្យដឹងទៀតថា ស្ថានការណ៍សន្តិសុខ និងសណ្ដាប់ធ្នាប់ទូទៅ ត្រូវបានគ្រប់គ្រងយ៉ាងមានប្រសិទ្ធភាព ធានាឲ្យប្រជាពលរដ្ឋ និងភ្ញៀវទេសចរណ៍អាចចូលរួមអបអរសាទរបុណ្យឆ្នាំថ្មីបានយ៉ាងសប្បាយរីករាយ ប្រកបដោយសុវត្ថិភាព និងរលូនគ្មានឧបសគ្គគួរឲ្យកត់សម្គាល់។

គួរជម្រាបជូនថា នៅព្រឹកថ្ងៃអង្គារ ១២រោច ខែចេត្រ ឆ្នាំមមី អដ្ឋស័ក ពុទ្ធសករាជ ២៥៦៩ ត្រូវនឹងថ្ងៃទី១៤ ខែមេសា ឆ្នាំ២០២៦ លោកឧត្តមសេនីយ៍ទោ ឈឿន សុចិត្ត បានអញ្ជើញចូលរួម និងដឹកនាំកម្លាំងនគរបាលក្រោមឱវាទ ចូលរួមការពារសន្តិសុខសណ្ដាប់ធ្នាប់ ក្នុងពិធីទទួលទេវតាឆ្នាំថ្មី ដែលប្រារព្ធឡើងនៅមុខសាលពិព័រណ៍អចិន្ត្រៃយ៍ សួនច្បារមាត់ទន្លេក្រុងតាខ្មៅ ក្រោមអធិបតីភាពដ៏ខ្ពង់ខ្ពស់របស់ ឯកឧត្តម នូ សាខន ប្រធានក្រុមប្រឹក្សាខេត្តកណ្ដាល និងឯកឧត្តម គួច ចំរើន អភិបាល នៃគណៈអភិបាលខេត្តកណ្ដាល ដោយមានការចូលរួមយ៉ាងច្រើនពីប្រជាពលរដ្ឋ និងភ្ញៀវទេសចរណ៍។

សកម្មភាពនេះ បង្ហាញឲ្យឃើញពីភាពរួសរាយរាក់ទាក់ ការទទួលខុសត្រូវខ្ពស់ និងសមត្ថភាពអនុវត្តការងារយ៉ាងមានវិជ្ជាជីវៈរបស់កម្លាំងនគរបាលខេត្តកណ្ដាល ដែលបានរួមចំណែកយ៉ាងសំខាន់ក្នុងការរក្សាសុវត្ថិភាពសង្គម និងលើកកម្ពស់ភាពជឿជាក់របស់ប្រជាពលរដ្ឋ៕