លោកស្នងការ ជួន ណារិន្ទ ចុះត្រួតពិនិត្យសភាពការណ៍ ថ្ងៃទី១ «នគរសង្ក្រាន្ត ២០២៦» ធានាសន្តិសុខយ៉ាងរឹងមាំ

(ភ្នំពេញ)៖ នារសៀលថ្ងៃទី១៤ ខែមេសា ឆ្នាំ២០២៦ ដែលជាថ្ងៃទី១ នៃពិធីបុណ្យចូលឆ្នាំថ្មី ប្រពៃណីជាតិខ្មែរ ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានចុះត្រួតពិនិត្យសភាពការណ៍ទូទៅ និងពិនិត្យកម្លាំងសមត្ថកិច្ច ដើម្បីបង្កើនប្រសិទ្ធភាពការពារ រក្សាសណ្តាប់ធ្នាប់ និងធានាសន្តិសុខជូនប្រជាពលរដ្ឋ។

ការចុះត្រួតពិនិត្យនេះ ធ្វើឡើងក្នុងបរិបទព្រឹត្តិការណ៍ «នគរសង្ក្រាន្ត» ឆ្នាំ២០២៦ ដែលជាកម្មវិធីវប្បធម៌ដ៏ធំមួយ ប្រព្រឹត្តទៅនៅរាជធានីភ្នំពេញ ដោយមានការចូលរួមយ៉ាងសកម្មពីប្រជាពលរដ្ឋ និងភ្ញៀវទេសចរ។

គួរបញ្ជាក់ថា កម្មវិធី «នគរសង្ក្រាន្ត» ត្រូវបានរៀបចំរយៈពេល៦ថ្ងៃ ចាប់ពីថ្ងៃទី១៤ ដល់ថ្ងៃទី១៩ ខែមេសា ឆ្នាំ២០២៦ ដោយសហភាពសហព័ន្ធយុវជនកម្ពុជា សហការជាមួយរដ្ឋបាលរាជធានីភ្នំពេញ ក្នុងគោលបំណងលើកស្ទួយវប្បធម៌ប្រពៃណីជាតិ និងបង្កើតបរិយាកាសសប្បាយរីករាយសម្រាប់ប្រជាពលរដ្ឋ។

នៅថ្ងៃទី១ នៃព្រឹត្តិការណ៍នេះ មានបងប្អូនប្រជាពលរដ្ឋយ៉ាងច្រើនកុះករ បានមកចូលរួមលេងកម្សាន្តក្រោមបរិយាកាសអ៊ូអរ សប្បាយរីករាយ និងសន្តិសុខល្អប្រសើរ ដោយមានការរៀបចំ និងគ្រប់គ្រងយ៉ាងម៉ឺងម៉ាត់ពីសំណាក់អាជ្ញាធរ និងកងកម្លាំងសមត្ថកិច្ចគ្រប់ផ្នែក។

សកម្មភាពនេះ បានបង្ហាញពីការយកចិត្តទុកដាក់ខ្ពស់ និងភាពត្រៀមខ្លួនរួចជាស្រេចរបស់កងកម្លាំងនគរបាល ក្នុងការបម្រើ និងការពារសុវត្ថិភាពជូនប្រជាពលរដ្ឋ ឲ្យអាចអបអរសាទរពិធីបុណ្យជាតិបានយ៉ាងសប្បាយរីករាយ និងអស់កង្វល់៕ ដោយ៖ The Mirror