សន្តិសុខរឹងមាំ ថ្ងៃទី១ នៃ «កំពង់ស្ពឺសង្ក្រាន្ត ២០២៦» ប្រព្រឹត្តទៅដោយរលូន និងសុវត្ថិភាពពេញលេញ

(កំពង់ស្ពឺ)៖ នៅក្នុងឱកាសអបអរសាទរ ពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំ២០២៦ ថ្ងៃទី១ ក្រោមការយកចិត្តទុកដាក់ និងដឹកនាំផ្ទាល់ពីលោកឧត្តមសេនីយ៍ត្រី ម៉េង ស្រ៊ុន មេបញ្ជាការ កងរាជអាវុធហត្ថខេត្តកំពង់ស្ពឺ នៅថ្ងៃទី១៤ ខែមេសា ឆ្នាំ២០២៦ កម្លាំងកងរាជអាវុធហត្ថខេត្ត បានចូលរួមសហការយ៉ាងសកម្ម ក្នុងការចុះការពារ សន្តិសុខ សុវត្ថិភាព និងរក្សាសណ្តាប់ធ្នាប់សាធារណៈ។

បេសកកម្មនេះ ត្រូវបានអនុវត្តនៅក្នុងព្រឹត្តិការណ៍ «កំពង់ស្ពឺសង្ក្រាន្ត» ឆ្នាំ២០២៦ ដែលរៀបចំដោយរដ្ឋបាលខេត្តកំពង់ស្ពឺ ស្ថិតនៅជុំវិញបរិវេណវិមានឯករាជ្យ និងសួនច្បារ​សម្តេចសង្ឃរាជ ជួន ណាត ក្រុងច្បារមន ខេត្តកំពង់ស្ពឺ។

កម្លាំងជំនាញបានរៀបចំផែនការការពារយ៉ាងម៉ឺងម៉ាត់ ដោយដាក់ពង្រាយកម្លាំងតាមគោលដៅសំខាន់ៗ ដើម្បីធានាឱ្យប្រជាពលរដ្ឋ និងភ្ញៀវទេសចរទាំងអស់ អាចចូលរួមកម្សាន្តយ៉ាងសប្បាយរីករាយ ប្រកបដោយភាពកក់ក្តៅ សុវត្ថិភាព និងគ្មានការរំខាន។

គួរបញ្ជាក់ផងដែរថា នៅថ្ងៃទី១ នៃព្រឹត្តិការណ៍នេះ ស្ថានភាពទូទៅប្រព្រឹត្តទៅដោយរលូន មិនមានបញ្ហាសន្តិសុខ ឬហេតុការណ៍អវិជ្ជមានណាមួយកើតឡើងឡើយ បង្ហាញពីភាពរួមចំណែក និងការទទួលខុសត្រូវខ្ពស់របស់កម្លាំងអាវុធហត្ថក្នុងការបម្រើប្រជាពលរដ្ឋ។

ព្រឹត្តិការណ៍ «កំពង់ស្ពឺសង្ក្រាន្ត» កំពុងបន្តទាក់ទាញការចូលរួមយ៉ាងច្រើនកុះករ ពីប្រជាពលរដ្ឋ និងភ្ញៀវទេសចរជាតិ-អន្តរជាតិ បង្កើតបរិយាកាសអ៊ូអរ និងពោរពេញដោយអត្ថន័យនៃវប្បធម៌ប្រពៃណីខ្មែរ៕ ដោយ៖ The Mirror