ឯកឧត្តម ស សុខា៖ «ខ្មែរត្រូវបន្តឆ្ពោះទៅមុខ» ទោះជួបវិបត្តិក៏ដោយ

(ភ្នំពេញ)៖ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ដ្រី និងរដ្ឋមន្ដ្រីក្រសួងមហាផ្ទៃ បានអំពាវនាវឱ្យជនរួមជាតិខ្មែរទាំងអស់ រួមគ្នារក្សាឯកភាព និងបន្តដំណើរឆ្ពោះទៅមុខ ដោយមិនអនុញ្ញាតឱ្យវិបត្តិណាមួយ រារាំងការអភិវឌ្ឍជាតិ និងជីវភាពសង្គមឡើយ។

ការអំពាវនាវនេះ បានធ្វើឡើងក្រោយពីការទទួលសារដ៏មានអត្ថន័យជ្រាលជ្រៅពីសម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទី ដែលបានលើកឡើងយ៉ាងច្បាស់ថា «របួសកូនដៃមួយ មិនគួរធ្វើឱ្យខ្លួនប្រាណពិការទាំងមូល» ដែលជាគតិបណ្ឌិតលើកទឹកចិត្តឱ្យជាតិមិនបោះបង់ទិសដៅអភិវឌ្ឍន៍ ទោះបីជាកំពុងប្រឈមមុខនឹងបញ្ហាក៏ដោយ។

ឯកឧត្តម ស សុខា បានបញ្ជាក់ថា សារនេះមានន័យជ្រាលជ្រៅជាពិសេសក្នុងឱកាសបុណ្យចូលឆ្នាំថ្មីប្រពៃណីជាតិ ខណៈដែលបរិយាកាសសង្គមឆ្នាំនេះ មិនដូចឆ្នាំកន្លងមក ដោយសារតែជនរួមជាតិមួយចំនួននៅតែមានអារម្មណ៍ព្រួយបារម្ភពីស្ថានភាពតានតឹងតាមព្រំដែន។ ទោះជាយ៉ាងណា កម្ពុជានៅតែប្រកាន់ខ្ជាប់នូវគោលការណ៍ដោះស្រាយដោយសន្តិវិធី ផ្អែកលើច្បាប់អន្តរជាតិ និងកិច្ចព្រមព្រៀងដែលមានស្រាប់។

ជាមួយគ្នានេះ ឯកឧត្តមបានលើកឡើងថា ការរក្សាប្រក្រតីភាពសេដ្ឋកិច្ច និងសង្គម គឺជាកត្តាសំខាន់បំផុត ដើម្បីធានាការរស់នៅរបស់ប្រជាពលរដ្ឋជាង ១៧លាននាក់។ ការបិទសកម្មភាពសេដ្ឋកិច្ច ឬបញ្ឈប់ជីវភាពប្រចាំថ្ងៃ មិនមែនជាជម្រើសល្អឡើយ ប៉ុន្តែផ្ទុយទៅវិញ គួរតែរួមគ្នាធ្វើឱ្យសង្គមកាន់តែរស់រវើក និងរីកចម្រើនបន្តទៅមុខ។

ឯកឧត្តមក៏បានអំពាវនាវឱ្យប្រជាពលរដ្ឋអបអរសាទរឆ្នាំថ្មីដោយការទទួលខុសត្រូវ គោរពច្បាប់ ជាពិសេសច្បាប់ចរាចរណ៍ផ្លូវគោក និងបន្តបំពេញភារកិច្ចរៀងៗខ្លួនឱ្យបានល្អ ដើម្បីរួមចំណែកក្នុងការកសាងជាតិ។

លើសពីនេះ ឯកឧត្តមបានសម្តែងការគោរព និងលើកទឹកចិត្តដល់វីរយុទ្ធជនជួរមុខ ដែលកំពុងបំពេញភារកិច្ចការពារអធិបតេយ្យភាព និងបូរណភាពទឹកដី ដោយលះបង់សុភមង្គលផ្ទាល់ខ្លួន មិនអាចជួបជុំគ្រួសារនៅថ្ងៃបុណ្យ។

ឯកឧត្តម ស សុខា បានគូសបញ្ជាក់ថា ការរក្សាភាពរឹងមាំនៃសង្គម និងការបន្តអភិវឌ្ឍជាតិ គឺជាចម្លើយដ៏មានតម្លៃបំផុត ចំពោះវិបត្តិគ្រប់ប្រភេទ ហើយជាអំណោយចិត្តដ៏មានន័យសម្រាប់វីរយុទ្ធជនដែលកំពុងឈរពារ​ជាតិ៕