សម្ដេចតេជោ ហ៊ុន សែន៖ របួសកូនដៃមួយ មិនគួរធ្វើឲ្យខ្លួនប្រាណទាំងមូលពិការនោះឡើយ ក្នុងបរិបទចូលឆ្នាំខ្មែរ

(ភ្នំពេញ)៖ សម្ដេចតេជោ ហ៊ុន សែន បានលើកឡើងអំពីតម្លៃនៃតុល្យភាពសង្គម និងសេដ្ឋកិច្ច ក្នុងឱកាសពិធីបុណ្យចូលឆ្នាំប្រពៃណីខ្មែរ ដោយបានប្រៀបធៀបថា “របួសកូនដៃមួយ មិនគួរធ្វើឲ្យខ្លួនប្រាណទាំងមូលពិការនោះឡើយ”។

សម្ដេចតេជោបានសង្កត់ធ្ងន់ថា សកម្មភាពសប្បាយរីករាយរបស់ប្រជាពលរដ្ឋក្នុងពិធីចូលឆ្នាំ មិនគួរត្រូវបានបកស្រាយថាជាការមើលរំលងបញ្ហាសង្គមទាំងមូលឡើយ ព្រោះសង្គមជាតិទាមទារឱ្យមានដំណើរការទាំងផ្នែកវប្បធម៌ សេដ្ឋកិច្ច និងជីវភាពប្រចាំថ្ងៃ។

ជាមួយគ្នានេះ សម្ដេចតេជោ ហ៊ុន សែន ក៏បានលើកឡើងថា ប្រទេសកម្ពុជា​នៅតែមានបញ្ហាប្រឈមមួយចំនួន ជាពិសេសតំបន់ព្រំដែន ដែលកងកម្លាំងប្រដាប់អាវុធ និងប្រជាជនមួយផ្នែកកំពុងប្រឈមនឹងស្ថានភាពលំបាក។ ទោះជាយ៉ាងណា រាជរដ្ឋាភិបាលបានខិតខំជួយសម្របសម្រួល និងគាំទ្រដល់ប្រជាពលរដ្ឋដែលរងផលប៉ះពាល់។

សម្ដេចក៏បានលើកជាសំណួរថា ក្នុងបរិបទដែលប្រទេសមិនមានវិបត្តិសុខាភិបាលធ្ងន់ធ្ងរដូចអំឡុងឆ្នាំ២០២០ តើគួរបញ្ឈប់សកម្មភាពសេដ្ឋកិច្ច និងវប្បធម៌ទាំងមូល ដើម្បីជៀសវាងសកម្មភាពសង្គម ឬយ៉ាងណា។

សម្ដេចតេជោបានបន្ថែមថា ប្រជាពលរដ្ឋជាង ១៧លាននាក់ ត្រូវការដំណើរការសេដ្ឋកិច្ចប្រក្រតី ដូចជាការលក់ដូរ សេវាកម្ម រោងចក្រ កសិដ្ឋាន និងស្ថាប័នសាធារណៈ ដែលជាដង្ហើមសំខាន់នៃសង្គមជាតិ។

សម្ដេចតេជោបានអំពាវនាវឲ្យប្រជាពលរដ្ឋ ទាំងក្នុង និងក្រៅប្រទេស ចូលរួមអបអរសាទរពិធីបុណ្យចូលឆ្នាំប្រពៃណីខ្មែរ ដោយសុខសាន្ត សាមគ្គី និងរក្សាតុល្យភាពរវាងវប្បធម៌ និងស្ថានភាពសង្គម ដើម្បីឲ្យប្រទេសបន្តដំណើរទៅមុខដោយស្ថិរភាព៕