បង្ក្រាបបណ្ដាញ Online Scam នៅក្រុងសែនមនោរម្យ  មណ្ឌលគិរី៖ ជនបរទេស ២៦២នាក់ ត្រូវបានរកឃើញ និងដកហូតឧបករណ៍បច្ចេកវិទ្យាជាងពាន់គ្រឿង

(កណ្ដាល)៖  កម្លាំងគណៈបញ្ជាការឯកភាពខេត្តមណ្ឌលគិរី ដោយមានការសម្របសម្រួលនីតិវិធីច្បាប់ពីតំណាងអយ្យការអមសាលាដំបូងខេត្ត បានបើកប្រតិបត្តិការបង្ក្រាបដ៏ធំមួយ ចូលឆែកឆេរទីតាំងអគារពាណិជ្ជកម្មមួយស្ថិតនៅក្រុងសែនមនោរម្យ កាលពីថ្ងៃទី១០ ខែមេសា ឆ្នាំ២០២៦ បន្ទាប់ពីមានសង្ស័យពាក់ព័ន្ធនឹងសកម្មភាពឆបោកតាមប្រព័ន្ធបច្ចេកវិទ្យា (Online Scam)។

ប្រតិបត្តិការនេះ ត្រូវបានអនុវត្តឡើងដំបូងតាមសំណើអន្តរាគមន៍ពីស្ថានទូតឥណ្ឌាប្រចាំកម្ពុជា ដើម្បីស្វែងរកជនជាតិឥណ្ឌា។ ទោះយ៉ាងណា នៅពេលចុះអនុវត្តជាក់ស្តែង សមត្ថកិច្ចបានប្រទះឃើញមានការប្រមូលផ្តុំស្នាក់នៅរបស់ជនបរទេសយ៉ាងច្រើនក្នុងទីតាំងខាងលើ បណ្តាលឱ្យមានការសម្រេចចិត្តឆែកឆេរបន្ថែម។

លទ្ធផលនៃប្រតិបត្តិការបង្ហាញថា អាជ្ញាធរបានរកឃើញជនបរទេសសរុបចំនួន ២៦២នាក់ ក្នុងនោះមានស្ត្រី ៤៧នាក់ មកពី៩សញ្ជាតិផ្សេងៗគ្នា រួមមាន ចិន ថៃ ឥណ្ឌា មីយ៉ាន់ម៉ា នេប៉ាល់ ប៉ាគីស្ថាន រ៉វ៉ាន់ដា ប៊ូរ៉ុនឌី និងហ្វីលីពីន។ ជាមួយគ្នានេះ សមត្ថកិច្ចក៏បានដកហូតឧបករណ៍បច្ចេកវិទ្យាច្រើនសន្ធឹកសន្ធាប់ រួមមាន កុំព្យូទ័រលើតុ ៤២០គ្រឿង និងទូរសព្ទដៃ ១,៤៥០គ្រឿង។

តាមការបំភ្លឺពីជនជាតិបរទេសខ្លះ បានឱ្យដឹងថា ពួកគេត្រូវបានអូសទាញឱ្យចូលមកកម្ពុជា តាមរយៈការសន្យាផ្តល់ការងារជាមួយប្រាក់ខែខ្ពស់ ប៉ុន្តែជាក់ស្តែងត្រូវបានបង្ខំឱ្យចូលរួមក្នុងសកម្មភាពឆបោកអនឡាញ។ ករណីនេះបង្ហាញពីល្បិចកលថ្មីៗរបស់ក្រុមឧក្រិដ្ឋជនក្នុងការជ្រើសរើស និងប្រើប្រាស់កម្លាំងមនុស្សពីបរទេស។

សមត្ថកិច្ចជំនាញបានសន្និដ្ឋានថា បណ្ដាញនេះបានប្រើប្រាស់បច្ចេកវិទ្យាដើម្បីឆបោកទៅលើគោលដៅនៅប្រទេសថៃ តាមរយៈការក្លែងបន្លំលក់ទំនិញអនឡាញ និងទៅសហរដ្ឋអាមេរិក តាមរយៈការបោកប្រាស់ពាក់ព័ន្ធនឹងការវិនិយោគរូបិយប័ណ្ណឌីជីថល (Crypto)។

ក្នុងចំណោមជនពាក់ព័ន្ធ មានមេខ្លោងជនជាតិចិន២នាក់ និងមីយ៉ាន់ម៉ា១នាក់ ត្រូវបានសមត្ថកិច្ចកសាងសំណុំរឿងបញ្ជូនទៅតុលាការ ខណៈជនបរទេស ២៥៩នាក់ទៀត ត្រូវបានបញ្ជូនទៅអគ្គនាយកដ្ឋានអន្តោប្រវេសន៍ ដើម្បីអនុវត្តនីតិវិធីតាមច្បាប់។

អាជ្ញាធរបានបញ្ជាក់ថា កំពុងបន្តស្រាវជ្រាវតាមចាប់ខ្លួនម្ចាស់ទីតាំង ដែលនៅក្នុងស្ថានភាពគេចវេស និងមិនទាន់សហការជាមួយសមត្ថកិច្ច។ សម្ភារៈដែលបានដកហូតកំពុងត្រូវបានវិភាគបន្ថែម ដើម្បីស្វែងរកបណ្តាញពាក់ព័ន្ធផ្សេងទៀត។

ជាមួយគ្នានេះដែរ អាជ្ញាធរបានអំពាវនាវដល់បុគ្គលដែលពាក់ព័ន្ធ ឬបានជ្រុលខ្លួនចូលរួមក្នុងសកម្មភាពឆបោកអនឡាញ ឱ្យចេញមកសារភាព និងសហការជាមួយសមត្ថកិច្ច ដើម្បីរួមចំណែកបង្ក្រាបបទល្មើសឱ្យមានប្រសិទ្ធភាព។

គួរបញ្ជាក់ថា ច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា ដែលទើបចូលជាធរមានកាលពីថ្ងៃទី០៧ ខែមេសា ឆ្នាំ២០២៦ បានកំណត់បទល្មើសថ្មីៗ និងទណ្ឌកម្មតឹងរឹង រួមទាំងការកំណត់ទោសដល់ជាប់ពន្ធនាគាររហូតដល់មួយជីវិត និងពិន័យជាប្រាក់ខ្ពស់ ដើម្បីទប់ស្កាត់ និងបង្ក្រាបសកម្មភាពឆបោកឌីជីថលនៅកម្ពុជា៕