រដ្ឋមន្ត្រីសុខាភិបាល «ឆ្មក់» ចុះពិនិត្យមណ្ឌលសុខភាព! ជំរុញសេវាឱ្យមានគុណភាព និងគោរពអ្នកជំងឺ

(មណ្ឌលគីរី)៖ ឯកឧត្តម ឈាង រ៉ា រដ្ឋមន្ត្រីក្រសួងសុខាភិបាលបានអនុវត្តការចុះពិនិត្យដោយមិនជូនដំណឹងមុន ទៅកាន់មណ្ឌលសុខភាពអូររាំង ខេត្តមណ្ឌលគីរី ក្នុងគោលបំណងតាមដាន និងវាយតម្លៃគុណភាពសេវាសុខាភិបាលជាក់ស្តែង។

ការត្រួតពិនិត្យនេះ បានរកឃើញចំណុចវិជ្ជមានមួយចំនួន រួមមាន ការផ្តល់សេវាដល់ប្រជាពលរដ្ឋមានភាពល្អប្រសើរ និងការព្យាបាលអ្នកជំងឺសមស្របតាមស្តង់ដារ។

ទន្ទឹមនឹងនេះ ក៏មានចំណុចត្រូវកែលម្អ ដូចជា ការរក្សាអនាម័យ ការរៀបចំគ្រប់គ្រងសេវា ការបំពេញបរិក្ខារបន្ទប់សម្រាល និងការលើកកម្ពស់ការចូលប្រើសេវា និងអត្រាចាក់វ៉ាក់សាំង។

ឯកឧត្តមរដ្ឋមន្ត្រី បានជំរុញឱ្យមណ្ឌលសុខភាពទូទាំងប្រទេស បន្តពង្រឹងគុណភាពសេវា ធានាឱ្យប្រជាពលរដ្ឋមានទំនុកចិត្ត និងទទួលបានការថែទាំប្រកបដោយសេចក្តីថ្លៃថ្នូរ៕