អភិបាលខេត្តកណ្ដាលជំរុញមន្ត្រីឲ្យខិតខំបម្រើរាស្ត្រ ខណៈព្រមានហានិភ័យ Scam Online និងប្រេងឡើងថ្លៃ

(កណ្ដាល)៖ នារសៀលថ្ងៃទី១៣ ខែមេសា ឆ្នាំ២០២៦ ឯកឧត្តម នូ សាខន ប្រធានក្រុមប្រឹក្សាខេត្ត និងឯកឧត្តម គួច ចំរើន អភិបាលខេត្តកណ្ដាល បានអញ្ជើញជាអធិបតីក្នុងពិធីសំណេះសំណាលជាមួយមន្ត្រីរាជការ មន្ត្រីកិច្ចសន្យា និងមន្ត្រីចូលនិវត្តន៍ ប្រមាណជាង៥០០នាក់ ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិ នៅសាលាខេត្តកណ្ដាល ក្នុងបរិយាកាសស្និទ្ធស្នាល និងរីករាយ។

ក្នុងឱកាសនោះ ឯកឧត្តម គួច ចំរើន បានកោតសរសើរចំពោះកិច្ចខិតខំរបស់មន្ត្រីគ្រប់លំដាប់ថ្នាក់ ក្នុងការបំពេញភារកិច្ចបម្រើប្រជាពលរដ្ឋ និងជំរុញឱ្យបន្តពង្រឹងប្រសិទ្ធភាពសេវាសាធារណៈឱ្យកាន់តែល្អប្រសើរ និងឆាប់រហ័ស។

ជាមួយគ្នានេះ ឯកឧត្តមអភិបាលខេត្ត បានបញ្ជាក់ពីគោលជំហររឹងមាំរបស់រាជរដ្ឋាភិបាល ក្នុងការដោះស្រាយបញ្ហាព្រំដែនតាមវិធានការច្បាប់ និងការទូត ដោយគ្មានបំណងឱ្យមានសង្គ្រាមកើតឡើយ ព្រមទាំងអំពាវនាវឱ្យប្រជាពលរដ្ឋជឿជាក់ និងគាំទ្រកងកម្លាំងការពារព្រំដែន។

ពាក់ព័ន្ធបញ្ហាតម្លៃប្រេងឡើងថ្លៃ ឯកឧត្តមបានបញ្ជាក់ថា ជាបញ្ហាសកល ប៉ុន្តែរាជរដ្ឋាភិបាលបានអន្តរាគមន៍ដោយកាត់បន្ថយពន្ធ ដើម្បីសម្រួលជីវភាពប្រជាពលរដ្ឋ។

ខណៈបទល្មើសបច្ចេកវិទ្យា ឯកឧត្តមបានបញ្ជាក់ពីវិធានការរឹងមាំ ក្នុងការបង្ក្រាប Scam Online និងអំពាវនាវឱ្យប្រជាពលរដ្ឋប្រុងប្រយ័ត្នពេលជួលអគារឱ្យជនបរទេស។

បន្ថែមពីនេះ ឯកឧត្តមក៏បានណែនាំឱ្យប្រជាពលរដ្ឋថែទាំសុខភាពក្នុងរដូវក្តៅ និងផ្ញើសារជូនពរឆ្នាំថ្មីឱ្យមានសុខភាពល្អ សំណាងល្អ និងជោគជ័យគ្រប់ភារកិច្ច៕