ពង្រឹងសមត្ថភាពការពារ! ម៉ូតូអគ្គិសនីថ្មី ត្រូវបានលោកស្នងការ ឈឿន សុចិត្ត ប្រគល់ជូនកម្លាំងនគរបាលខេត្តកណ្តាល

(កណ្តាល)៖ នៅព្រឹកថ្ងៃចន្ទ ១១រោច ខែចេត្រ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី១៣ ខែមេសា ឆ្នាំ២០២៦នេះ កម្លាំងនគរបាលខេត្តកណ្តាលបានទទួលការគាំទ្របន្ថែមផ្នែកសម្ភារៈបច្ចេកទេស ដើម្បីពង្រឹងប្រសិទ្ធភាពការងាររក្សាសន្តិសុខ និងសណ្តាប់ធ្នាប់សាធារណៈ។

ពិធីប្រគល់-ទទួលម៉ូតូអគ្គិសនីនេះ បានប្រារព្ធធ្វើឡើងក្រោមអធិបតីភាពដ៌ខ្ពង់ខ្ពស់លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល ដោយអនុវត្តតាមបទបញ្ជាចង្អុលដឹកនាំដ៏ខ្ពង់ខ្ពស់របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ។

ម៉ូតូអគ្គិសនីទាំងនេះ គឺជាអំណោយដ៏ថ្លៃថ្លារបស់ឯកឧត្តមអភិសន្តិសបណ្ឌិត ស សុខា ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ដែលមានគោលបំណងលើកកម្ពស់សមត្ថភាពប្រតិបត្តិការរបស់កម្លាំងនគរបាល នៅតាមបណ្ដាផែនការងារជំនាញ និងអធិការដ្ឋាននគរបាលស្រុក/ក្រុង។

ការផ្តល់ជូននេះ នឹងជួយអោយកម្លាំងនគរបាលអាចចុះអន្តរាគមន៍បានរហ័ស ប្រើប្រាស់ធនធានបានមានប្រសិទ្ធភាព និងរួមចំណែកក្នុងការកាត់បន្ថយផលប៉ះពាល់បរិស្ថាន តាមរយៈការប្រើប្រាស់យានយន្តអគ្គិសនី។

អាជ្ញាធរបានបញ្ជាក់ថា ការបន្តគាំទ្របែបនេះ គឺជាកត្តាសំខាន់មួយក្នុងការធានាសន្តិសុខ សុវត្ថិភាព និងសណ្តាប់ធ្នាប់សង្គម ឱ្យកាន់តែមានប្រសិទ្ធភាព និងចីរភាពនៅមូលដ្ឋាន៕