ស្នងការខេត្តកណ្តាលដាក់បទបញ្ជាតឹងរឹង ការពារសុវត្ថិភាពពលរដ្ឋអំឡុងចូលឆ្នាំ

(កណ្តាល)៖ លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាលនៅព្រឹកថ្ងៃទី១៣ ខែមេសា ឆ្នាំ២០២៦នេះ បានអញ្ជើញដឹកនាំកិច្ចប្រជុំផ្សព្វផ្សាយផែនការការពារសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ។

កិច្ចប្រជុំបានប្រព្រឹត្តទៅក្រោមការអនុវត្តតាមបទបញ្ជាដឹកនាំរបស់ថ្នាក់ដឹកនាំក្រសួងមហាផ្ទៃ និងអាជ្ញាធរខេត្ត ដោយមានការចូលរួមពីស្នងការរង អធិការគ្រប់ស្រុក-ក្រុង និងមន្ត្រីពាក់ព័ន្ធជាច្រើន។

ក្នុងឱកាសនេះ លោកស្នងការខេត្តបានណែនាំឲ្យកម្លាំងនគរបាលគ្រប់ផ្នែក បង្កើនការយកចិត្តទុកដាក់ក្នុងការថែរក្សាសន្តិសុខ សណ្តាប់ធ្នាប់ និងសម្រួលចរាចរណ៍ ជូនប្រជាពលរដ្ឋទាំងមុន កំឡុង និងក្រោយពេលបុណ្យ។

ជាពិសេស ត្រូវដាក់កម្លាំងប្រចាំការនៅតាមគោលដៅសំខាន់ៗ កន្លែងងាយកកស្ទះ និងតំបន់រៀបចំកម្មវិធីសង្ក្រាន្ត ព្រមទាំងបង្កើនការល្បាតពួនស្ទាក់ ដើម្បីការពារទ្រព្យសម្បត្តិប្រជាពលរដ្ឋដែលធ្វើដំណើរចេញពីលំនៅឋាន។

វិធានការនេះ មានគោលបំណងធានាឲ្យបងប្អូនប្រជាពលរដ្ឋអាចអបអរសាទរបុណ្យចូលឆ្នាំថ្មីបានយ៉ាងសុវត្ថិភាព សុខសាន្ត និងរីករាយទូទាំងខេត្តកណ្តាល៕